ايتا كەتۋ كەرەك, ەسەپ بەرۋ كەزدەسۋىن وبلىستىڭ بارلىق تەلەارنالارى تىكەلەي ەفيردە كورسەتتى. سونىمەن بىرگە وبلىس اكىمدىگىنىڭ رەسمي اككاۋنتى Instagram Akimat09, Saryarqa TV YouTube-ارناسى, ەkaraganda.kz سايتى دا ونلاين-ەسەپتەن اقپارات تاراتتى.
وبلىس باسشىنىڭ ايتۋىنشا, ءبىر اي ىشىندە بارلىق دەڭگەيدەگى اكىمدەر تۇرعىندارمەن 423 كەزدەسۋ وتكىزىپتى. وعان 44 مىڭعا جۋىق ادام قاتىسقان.
اتقارۋشى بيلىكتىڭ الدىندا تۇرعان ماعىزدى مىندەتتىڭ ءبىرى – تۇرعىنداردى جۇمىسپەن قامتۋ. وسى ورايدا ءوڭىر باسشىسى بىلتىر مەملەكەتتىك باعدارلامالاردىڭ ارقاسىندا وبلىستا 35 مىڭ جاڭا جۇمىس ورنى اشىلعانىن ءمالىم ەتتى. بۇل جۇمىسسىزدىق دەڭگەيىن 4,6% كورسەتكىش مۇعدارىندا ۇستاپ تۇرۋعا مۇمكىندىك بەرگەن.
ونلاين-ەسەپتىك كەزدەسۋدە جەڭىس قاسىمبەك دەنساۋلىق ساقتاۋ سالاسىن دامىتۋ ماسەلەسىنە كەڭىنەن توقتالدى.
– وتكەن جىلى قارقارالى اۋدانىنىڭ قاراعايلى كەنتىندە جانە نۇرا اۋدانىنىڭ شاحتەر اۋىلىندا جاڭا اۋىلدىق دارىگەرلىك امبۋلاتوريالار سالىندى. اباي جانە شەت اۋداندارىندا ورتالىق اۋداندىق اۋرۋحانالار جوندەلدى. وسى جىلى اقتوعاي مەن نۇراداعى ورتالىق اۋداندىق اۋرۋحانالار دا وسىنداي وزگەرىستەردى كۇتىپ وتىر. اقادىر كەنتىنە جۇمىس ساپارىمەن بارعانىمدا اقساقالدار اۋرۋحانا عيماراتىن جوندەۋ تۋرالى ءوتىنىش ايتتى. بيىل مىندەتتى تۇردە ول جۇمىستى باستايمىز, – دەدى ول.
سونداي-اق ءوڭىر باسشىسى ونكولوگيالىق ديسپانسەردىڭ جەزقازعانداعى فيليالىن ۇيىمداستىرۋ ماسەلەسىن شەشۋگە ۋادە بەردى. سونداي-اق قاراعاندىدا ەرەسەكتەرگە ارنالعان وبلىستىق كوپبەيىندى اۋرۋحانانىڭ, وبلىستىق ونكولوگيالىق ديسپانسەردىڭ وپەراتسيالىق-رەانيماتسيالىق كورپۋسىنىڭ قۇرىلىسى باستالعانىن اتاپ ءوتتى. ساۋلەلىك دياگنوستيكا جانە تەراپيا ورتالىعى ءۇشىن عيمارات سالۋ جوسپاردا بار. ۇزاق ۋاقىت كىدىرىستەن كەيىن وبلىستىق بالالار اۋرۋحاناسىنىڭ قۇرىلىسىن اياقتاۋ دا كەزەك كۇتتىرمەيتىن مىندەتتىڭ ءبىرى ەكەنىن تىلگە تيەك ەتتى.
– جيھازبەن جانە قاجەتتى تۇرمىستىق تەحنيكامەن جابدىقتالعان قىزمەتتىك پاتەرلەردى بەرۋ ەسەبىنەن دارىگەرلەر مەن جاس مامانداردى تارتۋ ماسەلەسىن شەشەمىز. ەكى جىل ىشىندە 227 دارىگەر باسپانامەن قامتىلدى. الداعى ەكى جىلدا ءبىزدىڭ وبلىسقا جۇمىس ىستەۋگە كەلگەن كەم دەگەندە 300 مامان پاتەر الادى, – دەدى ول.
