ۇستازدىق- ۇلى قىزمەت. شىمكەنت قالاسىندا 33 جىلدان بەرى مەكتەپ وقۋشىلارىنا ورىس ءتىلىن ۇيرەتىپ, سۇيىسپەنشىلىگىنە بولەنە بىلگەن ۇستازداردىڭ ءبىرى – گۇلزيرا انارتاەۆا. تاربيە بار جەردە, ءبىلىم دە بار دەگەن ۇستانىممەن جۇرەتىن ۇستازدىڭ شاكىرتتەرى حالىقارالىق وليمپيادادا جەڭىسكە جەتىپ, عىلىمي كونفەرەتسيالارعا بەلسەندى قاتىسىپ كەلگەن.
گۇلزيرا ۇلاسبەكقىزى قازىرگى تاڭدا ءو.ا.جولداسبەكوۆ اتىنداعى №9 IT- ليتسەيىندە ەڭبەگىن جالعاستىرىپ وتىر. ءوز سالاسىن جەتىك مەڭگەرگەن ۇستاز – 2019 جىلى «قازاقستاننىڭ 100 جاڭا ەسىم» ەنتسيكلوپەديا جوباسىنا ەنىپ, ەلىمىزدەگى ەڭ ۇزدىك پەداگوگتار قاتارىنان تابىلدى.
ۇزاق جىلدار بويى عىلىمي – ساراپتاما جۇمىستارىمەن اينالىسىپ كەلگەن پەداگوگ ءار ساباعىن جوعارى دەڭگەيدە ۇيىمداستىرىپ, وقۋشىلاردىڭ پانگە دەگەن قىزىعۋشىلىعىن ارتتىرىپ وتىرادى.
گ.انارتاەۆا پەداگوگيكالىق بىلىكتىلىكتى ارتتىرۋدىڭ دەڭگەيلى باعدارلاماسى بويىنشا سەرتيفيكاتتالعان, پەداگوگ-شەبەر. ول جاس مامانداردىڭ بىلىكتىلىگىن ارتتىرۋ جولىندا دا ءوز تاجىريبەلەرىمەن ءبولىسىپ كەلەدى.
وسى كۇنگە دەيىن ۇستازدىڭ ەسەلى ەڭبەكتەرى ەلەنىپ, قر ءبىلىم جانە عىلىم مينيسترلىگىنىڭ «قۇرمەت گراموتاسى» جانە وتكەن جىلى «ۇزدىك پەداگوگ-2020» ءتوس بەلگىسىمەن ماراپاتتالعان. سونىمەن قاتار, ءبىلىم سالاسىندا ءتۇرلى وليمپيادالاردا جەڭىمپاز بولىپ, حالىقارالىق عىلىمي كونفەرەنتسيالارعا بەلسەندى قاتىسقانى ءۇشىن العىس حاتتار مەن جوعارى دارەجەلى ديپلوم تابىستالعان.
شىمكەنت قالاسى اكىمدىگىنىڭ ءباسپاسوز قىزمەتى
