قوعام • 18 اقپان، 2021

ەلىمىزدە 11030 ايەل بەدەۋلىكپەن ەسەپتە تۇر

117 رەت كورسەتىلدى

ەلىمىزدە «اڭساعان ءسابي» الەۋمەتتىك باعدارلاماسى باستالدى، دەپ حابارلايدى Egemen.kz

قازاقستاندا ەكۇ باعدارلاماسىنا 2021 جىلى بولىنگەن كۆوتا سانى 7000-عا دەيىن كوبەيدى. بۇل كۆوتا بەرۋ كورسەتكىشتەرىن كەڭەيتۋگە، ولاردى الۋ كەزەگىنىڭ ازايۋىنا مۇمكىندىك بەرەدى. بۇگىندە ەلىمىزدە 11030 ايەل بەدەۋلىكپەن ەسەپتە تۇر.

«نۇر-سۇلتان قالاسىندا بەدەۋلىك بويىنشا ەسەپتە تۇرعاندار سانى – 1331. ءبىزدىڭ وتباسىن جوسپارلاۋ بولىمشەسى قرت كورسەتۋ – ەكۇ-عا دايىنداۋ جونىندەگى ۇيىمداستىرۋ-ادىستەمەلىك جانە ۇيلەستىرۋ ورتالىعى رەتىندە جەتەكشى ۇيىم بولىپ تابىلادى. بيىلعى جىلى ەلورداعا 486 كۆوتا ءبولىندى. ازىرگە 200 كۆوتا بەرىلىپ، پاتسيەنتتەر دايىندالۋدا. وسى جىلى باستاپقى مەديتسينالىق-سانيتارلىق كومەك كورسەتۋ ۇيىمدارى بۇرىن قارالماعان جانە جەكە مەديتسينا ورتالىقتارىنا قارالعان بەدەۋلىك كورسەتكىشتەرى بار پاتسيەنتتەردى انىقتاپ، بەلسەندى جۇمىس جۇرگىزۋدە»، دەيدى نۇر-سۇلتان قالاسىنداعى №2 قالالىق كوپبەيىندى اۋرۋحانا ديرەكتورىنىڭ امبۋلاتوريالىق قىزمەت جونىندەگى ورىنباسارى ساۋلە جامانتايقىزى يبراەۆا.

ەكۇ ءۇشىن كىمدەر ءوتىنىش بەرە الادى؟

بۇل ەمشارا تەراپيالىق جولمەن ەمدەۋ ناتيجە بەرمەيتىن بەدەۋلىك دياگنوزى قويىلعان پاتسيەنتتەرگە ارنالعان. ەكۇ-عا وتباسىلىق جۇپتار دا، جەكە ادام دا قاتىسا الادى. مىندەتتى تۇردە ۇمىتكەردىڭ ەرىكتى جازباشا كەلىسىمى بولۋى كەرەك. سونداي-اق، قازاقستان ازاماتى بولۋى جانە دەنساۋلىق ساقتاۋ مينيسترلىگى بەلگىلەگەن مەديتسينالىق پارامەترلەرگە (رەپرودۋكتيۆتى جاس – 18-دەن 42 جاسقا دەيىن، قالىپتى سوماتيكالىق جانە ەندوكريندىك مارتەبە، جوعارى فولليكۋليارلىق رەزەرۆ) سايكەس كەلۋى قاجەت.

ماماندار مىنا جاعدايلاردا عانا ناۋقاستى ەكستراكورپورالدى ۇرىقتاندىرۋدان باس تارتۋى مۇمكىن: جاتىردىڭ تۋا بىتكەن نەمەسە جۇرە بىتكەن اۋىتقۋلارى، سوماتيكالىق جانە پسيحيكالىق بۇزىلۋلار، انالىق بەز ىسىكتەرى، جەدەل قابىنۋ جانە كەز-كەلگەن لوكاليزاتسيا ونكولوگياسى.

ەكۇ-عا جولداما الۋ ءۇشىن نە ىستەۋ كەرەك؟

ەكۇ-عا جولداما الۋ ءۇشىن الدىمەن تىركەلگەن جەرى بويىنشا ەمحاناعا بارۋ قاجەت. ۇيىم ماماندارى پاتسيەنتتى بەدەۋلىگى بار ديسپانسەرلىك پاتسيەنتتەردىڭ ەلەكتروندىق تىركەلىمىنە قوسادى جانە بىرقاتار تەكسەرۋلەر تاعايىندايدى. 12 اي ىشىندە باستاپقى مەديتسينالىق-سانيتارلىق كومەك كورسەتۋ ۇيىمى، ياعني ەمحانا بەيىندى ماماننىڭ قورىتىندىسى نەگىزىندە پاتسيەنتتىڭ قۇجاتتارىن جوعارى تەحنولوگيالىق مەديتسينالىق قىزمەتتەر جونىندەگى جەرگىلىكتى كوميسسياعا جىبەرەدى. وڭ شەشىم قابىلدانعان جاعدايدا، ايەلدى «ەمدەۋگە جاتقىزۋ بيۋروسى» پورتالىنا تىركەپ، ەمشاراعا دايىنداي باستايدى. پاتسيەنت ەكستراكورپورالدى ۇرىقتاندىرۋ ءۇشىن كلينيكانى ءوز بەتىنشە تاڭداۋعا قۇقىلى.

ءمامس بويىنشا ەكۇ پروتسەدۋراسىنان جىلىنا ءبىر رەت تەگىن وتۋگە بولادى. ءمامس جۇيەسىندە ەكۇ ەمشاراسىن جاسار الدىندا ەرلى-زايىپتىلاردى تەكسەرۋ تىزبەگە سايكەس جۇزەگە اسىرىلادى. ءمامس جۇيەسىندە ەكۇ – تسيكلدىڭ بازالىق باعدارلاماسى قاراستىرىلعان.

سوڭعى جاڭالىقتار

دجەرۆونتا دەۆيس جەڭىل سالماقتى تاڭدادى

كاسىپقوي بوكس • بۇگىن، 17:45

ۇقساس جاڭالىقتار