ماقتاارال اۋدانىنىڭ ءتارتىپ ساقشىلارى «اتامەكەن» كەدەن بەكەتى ارقىلى ەسىرتكىنى زاڭسىز الىپ وتپەك بولعان رەسەي فەدەراتسياسىنىڭ ازاماتىن قۇرىقتاعان. وزبەكستان رەسپۋبليكاسىنان ءوزىنىڭ «داف» ماركالى كولىگىمەن كەلە جاتقان ەر ادام قازاقستان شەكاراسى ارقىلى اينالىستان الىنعان زاتتى الىپ وتپەكشى بولعان.
ناقتىراق ايتساق, «ماگيستر» اتتى يت بەلگى بەرىپ, ءتارتىپ ساقشىلارى اتالعان ازاماتتى تەكسەرۋ بارىسىندا ونىڭ ش ۇلىعىنان ەسىرتكىگە ۇقساس زات تابىلعان.
ساراپتاماعا سايكەس الىنعان زاتتىڭ جالپى سالماعى ەكى گرامعا جۋىق گاشيش ەكەندىگى بەلگىلى بولعان. اتالعان جايت قر قك-ءنىڭ 286-بابى (اينالىستان الىپ قويىلعان زاتتاردىڭ نەمەسە اينالىسى شەكتەلگەن زاتتاردىڭ كونترابانداسى) جانە 296-بابى (ەسىرتكى, پسيحوتروپتىق زاتتارمەن, سول تەكتەستەرمەن, پرەكۋرسورلارمەن وتكىزۋ ماقساتىنسىز زاڭسىز جۇمىس ىستەۋ) بويىنشا تىركەلىپ, سوتقا دەيىنگى تەرگەپ-تەكسەرۋدىڭ بىرىڭعاي تىزىلىمىنە ەنگىزىلدى. كۇدىكتى قاماۋدا.
قازىرگى ۋاقىتتا ەسىرتكى زاتىن ساقتاۋ مەن شەكارادان جاسىرىن وتكىزۋ بويىنشا جيناقتالعان ماتەريالدار شەشىم قابىلدانۋ ءۇشىن سوتقا جولداندى. تۇركىستان وبلىسىنىڭ پوليتسەيلەرى اينالىستان الىنىپ تاستالعان زاتتاردى قولدانۋ, ساقتاۋ, وتكىزۋ, تاسىمالداۋدىڭ سوڭى قىلمىستىق جاۋاپكەرشىلىككە الىپ كەلەتىنىن ەسكەرتەدى.
