تەحنولوگيا • 18 اقپان، 2021

«AquaPAC» قۇرىلعىسى اۋىز سۋ تاپشىلىعىن جويۋعا مۇمكىندىك بەرەدى

48 رەت كورسەتىلدى

اقتوبە قالاسىنداعى  فيزيكا-ماتەماتيكالىق باعىتىنداعى نازارباەۆ زياتكەرلىك مەكتەبىنىڭ 11 سىنىپ وقۋشىلارى ارمان جالعاسباەۆ، تولەگەن ايتەني جانە ەرنۇر جانعاليەۆ شالعايداعى ەلدى مەكەندەردە ورىن العان سۋ تاپشىلىعى ماسەلەسىن زەرتتەپ، ونىڭ شەشىمىن تاپتى، دەپ حابارلايدى Egemen.kz

«AquaPAC» قۇرىلعىسى اۋادان اۋىز سۋ الۋعا قاۋقارلى. عالامدىق ماسەلەلەردى شەشۋگە باعىتتالعان جوبا اۆتورلىق قۇقىققا دا يە.

«الەم بويىنشا جىلىنا 2 ميلليوننان استام ادام ساپاسىز سۋ سالدارىنان قايتىس بولادى. اۋىز سۋدىڭ جەتىسپەۋشىلىگىنەن ادامدار تۇزدى نەمەسە لاستانعان سۋ ىشۋگە ءماجبۇر. بۇل دەرەكتەر زەرتتەۋ بارىسىندا انىقتالىپ، جوبانىڭ وزەكتى ەكەندىگىنە دالەل. ال ءبىز ويلاپ تاپقان قۇرىلعىنىڭ كومەگىمەن اۋادان سۋ الۋعا بولادى: الدىمەن كوندەنساتسيا ءادىسى ارقىلى بۋ سۇيىقتىققا اينالادى، سۇزگىدەن وتەدى جانە ۋلتراكۇلگىن ساۋلەلەر ارقىلى وڭدەلەدى»، دەيدى جوبا اۆتورىنىڭ ءبىرى ارمان جالعاسباەۆ.

«AquaPAC» جوباسىنىڭ تاعى ءبىر ەرەكشەلىگى – سالماعى جەڭىل ءارى كولەمى ىقشامدى. سۋ قۇرىلعىنىڭ ىشىندە ورنالاسقان ارنايى بوتەلكەنىڭ ىشىنە جينالادى. جەتەكشىسى جانىبەك جانكۋلوۆتىڭ ءسوزىنشى، بۇل ونەرتابىس تۇتىنۋشىنى 1 تاۋلىككە جەتەتىن سۋ قورىمەن قامتاماسىز ەتە الادى.

«وقۋشىلار الەمدىك دەڭگەيدەگى ماسەلەلەردىڭ شەشۋ جولدارىن قاراستىرادى. بىرنەشە جىل بۇرىن تۋىنداعان يدەيانى ىسكە اسىرىپ وتىرمىز، جوبانى قاراپايىم قولجەتىمدى ماتەريالداردان جاسادىق. بىرنەشە ەكسپەريمەنتتەن كەيىن قۇرىلعىنىڭ جارامدى ەكەندىگىنە كوزىمىز جەتتى»، دەپ ءبولىستى نازارباەۆ زياتكەرلىك مەكتەبىنىڭ مۇعالىمى جانىبەك جانكۋلوۆ.

ايتا كەتۋ كەرەك، اقتوبەدەگى NIS وقۋشىلارى جىل سايىن 100-گە جۋىق يننوۆاتسيالىق جوبالار جاساپ، رەسپۋبليكالىق جانە حالىقارالىق دەڭگەيدەگى جارىستاردا جوعارى ناتيجە كورسەتىپ كەلەدى.

سوڭعى جاڭالىقتار

ۇقساس جاڭالىقتار