تۋرنير كەستەسىندە ەكىنشى ورىندا تۇرعان ومبىلىق كوماندامەن وتكەن ويىندا يۋري ميحايليس شاكىرتتەرى بارىن سالدى. كەزدەسۋدىڭ 6-مينۋتىندا جەرلەستەرىمىز سان باسىمدىعىن ءتيىمدى پايدالانىپ, ەسەپ اشتى. گولدىڭ اۆتورى – ءاليحان اسەتوۆ. ارادا ءۇش مينۋت وتكەندە سان باسىمدىعىن ۇتىمدى پايدالانعان قوناقتار دا تارازى باسىن تەڭەستىرىپ كەتتى. «بارىستىڭ» ەكس-ويىنشىسى كوربەن نايتتان پاس العان ريد بۋشە نىسانانى ءدال كوزدەدى. ەكىنشى كەزەڭنىڭ 30-مينۋتىندا نيكيتا ءميحايليستىڭ سوققان شايباسىنىڭ ارقاسىندا «بارىس» ەسەپتە قايتا العا شىعىپ, ماتچتىڭ سوڭعى مينۋتىنا دەيىن وسى ناتيجەنى ساقتاپ تۇرعان بولاتىن. بىراق تاعى دا سان باسىمدىعىنىڭ ناتيجەسىندە كەزدەسۋدىڭ اياقتالۋىنا 5 سەكۋند قالعاندا كوربەن نايت ەسەپتى قايتا تەڭەستىردى.
وۆەرتايمعا ۇلاسقان ويىننىڭ 63-مينۋتىندا نيكيتا ءميحايليستىڭ سوققان شايباسى قازاقستاندىق كومانداعا جەڭىس سىيلادى – 3:2. بۇل جولى دا «بارىستا» ءبىر ويىنشى ارتىق ەدى. وسىلايشا جەرلەستەرىمىز قحل-داعى سوڭعى التى ويىنىنىڭ العاشقىسىن جىگەرلى جەڭىسپەن باستادى. «بارىس» كەلەسى كەزدەسۋىن بۇگىن «بارىس-ارەنادا» ەكاتەرينبۋرگتىڭ «اۆتوموبيليست» كومانداسىمەن وتكىزەدى.
