قازاقستان • 18 اقپان، 2021

ماقتاارالداعى بوس جاتقان جەرلەر مەملەكەتكە قايتارىلدى

6 رەت كورسەتىلدى

ماقتاارال اۋدانىندا يگەرىلمەي بوس جاتقان اۋىل شارۋاشىلىعى ماقساتىنداعى 70 گەكتار جەر انىقتالعان، دەپ حابارلايدى Egemen.kz

جەر ۋچاسكەلەرى بويىنشا سالىق بەرەشەگىن ءوندىرۋ تۋرالى حابارلامالار جولداندى.

اۋدان اۋماعىندا جەكە تۇلعالاردىڭ كاسىپكەرلىك ماقساتتاعى جەر تەلىمدەرىن تۇگەندەۋ جۇمىستارىنىڭ بارىسىندا 10 ازاماتقا تيەسىلى 5 گەكتارعا جۋىق جەر تەلىمى انىقتالىپ، تۇركىستان وبلىسىنىڭ جەر ينسپەكتسياسى باسقارماسىنا ءتيىستى شارا قابىلداۋ ءۇشىن جانە مەملەكەتتىك كىرىستەر دەپارتامەنتىنە سالىق بەرەشەگىن ءوندىرۋ بويىنشا ۇسىنىس حاتتار بەرىلگەن.

سونداي-اق تۇرعىن ءۇي ماقساتىندا 42 ازاماتقا تيەسىلى يگەرىلمەگەن 6،5 گەكتار جەر كولەمى انىقتالىپ، 1 گەكتار جەرگە بەرىلگەن شەشىمدەردىڭ كۇشى جويىلدى. قالعان جەر ۋچاسكەسىنىڭ يەلەرىنە حابارلامالار تاراتىلدى. سونىمەن قاتار، مىرزاكەنت كەنتىنىڭ باس جوسپارىنا سايكەس، ەڭبەكشى جانە جاڭاجول اۋىلدىق وكرۋگتەرىنەن اۋىل شارۋاشىلىعى ماقساتىنداعى جەر ۋچاسكەلەرىن مەملەكەت مۇقتاجدىعى ءۇشىن 24 جەر يەلەنۋشىنىڭ 140 گەكتاردان اساتىن جەرى الىنعان. ونىڭ ىشىندە 70 گەكتار جەر يەلەرى ءوز ەركىمەن باس تارتقان.

ودان بولەك، اۋدان اۋماعىندا 14 مىڭنان استام اۋلاعا 4،5 گەكتار جەر تەلىمى تيەسىلى. بۇگىنگى تاڭدا ۇيىرگەلىك جەرلەردى يگەرۋ ماسەلەسى وتە ماڭىزدى بولىپ تۇر. قوسىمشا تابىس كوزى بولىپ تابىلاتىن جەرگە ءتۇرلى كوكونىس، باقشا جانە مال ازىقتىق داقىلداردى، سونىمەن قاتار جەمىس اعاشتارىن وتىرعىزىپ، پايدا تابۋعا بولاتىندىعى تۋرالى ءتۇسىندىرۋ جۇمىستارى جۇرگىزىلگەن.

سوڭعى جاڭالىقتار

ۇقساس جاڭالىقتار