وسكەمەندەگى Veritas وزىق دامۋ ورتالىعىندا ومىرتقا سۇيەگىن بەكىتۋگە ارنالعان پولي جانە مونواكسيالدى ۆينتتەر, بۇراندا سىندى يمپلانت ونىمدەرىن جاساۋ جوباسى وسىدان ءۇش جىل بۇرىن قولعا الىنعان. زاماناۋي ستانوكتاردا ادام اعزاسىنا بەكىتىلەتىن شاعىن بۇيىمداردى جاساۋعا اركىمنىڭ ىڭعايى بولا بەرمەيدى. سوندىقتان دا ۇلكەن جوبانى دوڭگەلەتۋ ءۇشىن د.سەرىكباەۆ اتىنداعى تەحنيكالىق ۋنيۆەرسيتەتتىڭ بىلىكتى, تاڭداۋلى ماماندارى جۇمىلدىرىلدى. ولار ماسكەۋگە, ەكاتەرينبۋرگكە, گەرمانياعا بارىپ, ستانوكتاردا جۇمىس ىستەۋ كۋرستارىنان وتكەن. شەتەلدەردەن بىلىمدەرىن شىڭداپ كەلىپ, نازىك ىسكە شىنداپ كىرىسكەندەردىڭ ءبىرى – باعدات ازاماتوۆ. ول وسى Veritas وزىق دامۋ ورتالىعىنىڭ عىلىمي قىزمەتكەرى. ۇلكەن ءىستى ۇندەمەي تىندىرىپ جۇرگەن دە باعداتتىڭ كومانداسى.
ولار قازىرگى ۋاقىتتا ادام ومىرتقاسىنىڭ اراسىنا بەكىتەتىن يمپلانت ونىمدەرىن جاساۋدى قولعا العان. قولعا العان دەيمىز, الدىڭعى 3D باسپا ارقىلى شىعارعان كەيدجدەرىنىڭ ءبىرىن نۇر-سۇلتان قالاسىنداعى تراۆماتولوگيا جانە ورتوپەديا عىلىمي زەرتتەۋ ينستيتۋتىنىڭ دارىگەرلەرى ناۋقاستارعا پايدالانىپ تا ۇلگەرگەن. بىراق بۇل العاشقى سىناق قانا. سونىڭ وزىندە ءساتتى جۇزەگە اسقان. اتالعان ومىرتقاارالىق كەيدجدەر قازىرگى كەزدە كلينيكالىق سىنامادان ءوتىپ جاتىر. ودان وتكەن سوڭ عانا مەديتسينالىق بۇيىمدار رەەسترىنە ەنگىزىلىپ, تولىقتاي پايدالانۋعا بولادى. مەديتسينا عىلىمىنىڭ دامىعاندىعى شىعار, قازىرگى تاڭدا يمپلانت ونىمدەرىنە دەگەن سۇرانىس جوعارى.
كىم ءبىلسىن, ايتەۋىر دارىگەرلەردىڭ ايتۋىنشا, اياقتارىن باسا الماي اۋىرسىناتىنداردىڭ كوبى – ۇزاق ۋاقىت وتىرىپ جۇمىس ىستەيتىندەر نەمەسە تىم اۋىر كوتەرگەندەر ەكەن. ياعني بەلدەگى شەمىرشەك ءوسىپ شىعىپ, اسەرى اياققا بەرىلەتىن كورىنەدى. ال ونىڭ ءبىر ەمى – وپەراتسيامەن الىپ تاستاپ, ورنىنا تيتان كەيدجىن سالۋ دەسەدى. بۇل 3D باسپامەن جاسالعان كەيدجدەردىڭ ەرەكشەلىگى – ادام اعزاسىنا ورناتىلعان سوڭ شەمىرشەكپەن ءبىتىسىپ كەتەدى. سىرتقى قاباتى كەدىر-بۇدىر بولاتىنى دا سول.
يمپلانتتاردى جاساۋدىڭ ەكى جولى بار, ولار 3D باسپا, ياعني تيتان ۇنتاعىنان 3D باسپا ارقىلى باسىپ شىعارۋ جانە ارنايى ستانوكتاردا مەحانيكالىق تاسىلمەن جونۋ.
پلاستينا كۇيىندە جەتكىزىلگەن تيتاننان يمپلانت ونىمدەرىنىڭ جاسالۋ جولىن Veritas وزىق دامۋ ورتالىعىنىڭ عىلىمي قىزمەتكەرى باعدات ازاماتوۆ جىلىكتەپ ايتىپ بەردى, مۇمكىندىگىنشە جاسالۋ جولىن دا كورسەتتى. ارينە, وتە كۇردەلى پروتسەسس بولعاندىقتان, كەيدجدىڭ ءبىر توپتاماسىنىڭ باستان اياق جاسالۋىنا كەمى ەكى كۇن ۋاقىت كەتەدى.
– قازىرگى جاساپ جۇرگەنىمىز – ومىرتقانى بەكىتۋگە ارنالعان پولياكسيالدى ۆينتتەر. وسى پولياكسيالدى ۆينتتەر 4 بولشەكتەن تۇرادى. بۇيىمداردى مىناۋ ستانوكتاردا جونادى, – دەپ عىلىمي مامان ءتۇرلى-ءتۇستى بۇراندالاردى كورسەتتى.
بۇيىمداردى جاساماس بۇرىن دميتري دوگادكين, سەرگەي رۋدەنكو سىندى ماماندار الدىمەن كومپيۋتەردە سىزباسىن سىزىپ, تەحنيكالىق قۇجاتتارىن جاسايدى. سودان سوڭ بارىپ 3D باسپا ارقىلى نەمەسە ستانوكتاردا مەحانيكالىق تۇردە جونىپ شىعادى. كەيدج تۇرلەرىنىڭ ءبىر پارتياسىن (24 دانا) باسىپ شىعارۋ ءۇشىن 8 ساعات كەتەدى. ال ءبىر بۇراندانى ارنايى ستانوكتا جونۋ پروتسەسى ءتورت-اق مينۋت ىشىندە اياقتالادى ەكەن. ۇستەل ۇستىندە ءتىزىلىپ تۇرعان ونىمدەردى قولعا الىپ كوردىك, جۇپ-جۇمىر بولعانىمەن, سالماعى مۇلدەم جوق.
– نۇر-سۇلتانداعى تراۆماتولوگيا جانە ورتوپەديا عىلىمي زەرتتەۋ ينستيتۋتىنىڭ ماماندارىمەن بىرلەسىپ بىرنەشە جاڭا يمپلانت جاساپ جاتىرمىز. بۇلار تابانعا, جامباس سۇيەگىنە جانە ومىرتقاعا ارنالعان. ءبىزدىڭ يمپلانتتارىمىز كلينيكاعا دەيىنگى سىناقتاردان ءوتىپ, جاقسى ناتيجەلەر كورسەتتى. ەندى يمپلانتتارىمىز كلينيكالىق سىناقتان ءوتىپ جاتىر. ءبارى ءساتتى بولسا, الداعى ۋاقىتتا ءونىمدى كەڭەيتە تۇسەمىز. بۇل يمپلانتتار ارقىلى ومىرتقا اراسىن كەرۋگە, جاقىنداتۋعا بولادى. قيسايعان ومىرتقانى تۇزەۋگە دە قابىلەتتى, – دەيدى ب.ازاماتوۆ.
– كەيدجدى ءبىر باسقاندا 24 داناسىن ءبىر-اق جاسايمىز. بۇل 8 ساعات ىشىندە باسىلادى. سودان سوڭ يمپلانتتاعى زياندى زاتتاردى شىعارۋ ءۇشىن ۆاكۋمدى پەشكە ورنالاستىرىپ, 1 250 تسەلسي گرادۋسقا دەيىن قىزدىرىپ, ءبىراز ۋاقىت ۇستايمىز. سول جەردە كەرنەۋلەرى الىنىپ, كەلەسى ساتىعا وتەدى. كەلەسى كەزەكتە ءار بۇيىمدى ميكرودوعالىق وكسيدتەۋ ارقىلى ءار تۇسكە بويايمىز, – دەدى ول بۇرانداسى مەن تەتىگى كوپ پەشتىڭ ەسىگىن جاۋىپ جاتىپ.
بۇراندالار مەن پلاستينالاردىڭ ءار تۇرگە بويالۋى البەتتە ءسان ءۇشىن ەمەس. ەرتەڭگى كۇنگى وپەراتسيا كەزىندە حيرۋرگ قاي بۇراندا قاي تەتىكتىكى ەكەنىن تەز تاۋىپ الۋ ءۇشىن بويايدى ەكەن. سونداي-اق ونىڭ قورعاۋ قابىلەتى دە بار. بوياۋدىڭ ءوزى حيميالىق جولمەن جۇزەگە اسادى. ياعني يمپلانت ونىمدەرىن قىشقىلدىڭ ىشىنە سالىپ, توقپەن كەرنەۋ بەرگەندە تيتان وكسيدتى قاپتامامەن قاپتالادى ەكەن. كەرنەۋدىڭ كۇشىنە قاراي ءتۇسى دە وزگەرەدى.
Veritas وزىق دامۋ ورتالىعىنىڭ ماماندارى سەمەي مەديتسينالىق ۋنيۆەرسيتەتىنىڭ دارىگەرلەرىمەن دە تىعىز جۇمىس ىستەيدى. سەمەي مەديتسينالىق ۋنيۆەرسيتەتىمەن ارنايى قارىم-قاتىناس تۋرالى مەموراندۋمعا قول قويىلعان. ونداعى ستۋدەنتتەر مەن دارىگەرلەر جاسالعان بۇيىمداردى جانۋارلارعا سالىپ, بەلگىلى ءبىر ۋاقىت سىناقتان وتكىزەدى. ءبارى ءساتتى اياقتالىپ جاتسا, ورتالىقتىڭ ماماندارى بۇعاناعا, جامباس سۇيەككە, اياق-قولعا ارنالعان تيتان پلاستينالار جاساۋدى جوسپارلاپ ءجۇر.
ءبىر قۋانتارلىعى, نازىك ءىستىڭ باسىندا باعدات ازاماتوۆتاي قاراكوزىمىزدىڭ جۇرگەندىگى. ول بۇعان دەيىن ءار سالادا جۇمىس ىستەپ كورگەن. بىراق كىشكەنتايىنان تەحنيكاعا اۋەس بولعاندىقتان, جانىنا جاقىن ماماندىقتى يگەرىپ الدى. ەندىگى ويى – ورتالىقتىڭ جۇمىسىن كەڭەيتۋ, كەڭەيتە ءجۇرىپ مەديتسينا سالاسىنا ءوزىنىڭ تامشىداي بولسىن ۇلەسىن قوسۋ.
وسكەمەن
