وسىلايشا, مەگاپوليستىڭ كوشە شامدارىمەن قامتاماسىز ەتىلۋى 70 پايىزدى قۇرايتىن بولادى. جارىقتاندىرۋ بويىنشا جوبالار جەتىنشى شاقىرىلىمداعى شىمكەنت قالاسى ءماسليحاتىنىڭ كەزەكتەن تىس ەكىنشى سەسسياسىندا ماقۇلداندى.
سەسسيا جۇمىسىنا قاتىسقان قالا اكىمى مۇرات ايتەنوۆ شىمكەنت قالاسىندا ءارتۇرلى سالالاردا مەملەكەتتىك- جەكەمەنشىك ارىپتەستىك ء(مجا) اياسىندا سالىنىپ, پايدالانۋعا بەرىلگەن نىسانداردىڭ ارتقانىن ايتتى. سونىمەن قاتار, قالا باسشىسى ءمجا اياسىنداعى جوبالار ەكى تاراپقا دا ءتيىمدى ەكەنىن جەتكىزدى.
«شىمكەنت قالاسىنىڭ سىرتقى جارىقتاندىرۋدىڭ قۇرىلىسىن سالۋ, قايتا قۇرۋ جانە پايدالانۋ» جوباسى بويىنشا بايانداما جاساعان قالالىق ەنەرگەتيكا جانە كوممۋنالدىق شارۋاشىلىق باسقارماسى باسشىسىنىڭ مىندەتىن اتقارۋشى ب.بولاتبەكوۆ 2021-2027 جىلدارعا 16 411,9 ملن. تەڭگەگە مەملەكەتتىك مىندەتتەمە الۋ ۇسىنىلعانىن ءمالىم ەتتى.
«مەملەكەتتىك-جەكەشەلىك ارىپتەستىك جوباسىن ىسكە اسىرۋ مەرزىمى – 7 جىل, ونىڭ ىشىندە قۇرىلىس مەرزىمى – 36 ايدى قۇرايدى. بۇل جوبادا سىرتقى جارىقتاندىرۋ جەلىلەرىن سالۋ, ياعني, 14264 دانا جارىقديودتى شامدار, 14264 دانا باعانالار مەن 436 كم كابەل جۇرگىزىلەدى. ناتيجەسىندە ءتورت جىلدا 303 كوشە جارىقتاندىرىلاتىن بولادى. سونىمەن قوسا, ەسكى جارىقشامدار مەن توزعان باعانالاردى جاڭالارىنا اۋىستىرۋ – 5 182 جارىقشام, 1 929 باعانالار. جاياۋ جۇرگىنشىلەر ايماعىنا قوسىمشا شامدار ورناتۋ - 2 000 دانا. اۋە جەلىلەرىن كابەلدىك جەلىلەرگە اۋىستىرۋ -182 كم. سىرتقى جارىقتاندىرۋ باسقارۋ جاشىگىن جاڭعىرتۋ - 327 دانا. ديسپەتچەرلىك پۋنكت قۇرۋ باعدارلاماسىن ەنگىزۋ بار», دەدى ب.بولاتبەكوۆ.
سەسسيانىڭ كۇن تارتىبىندە بۇدان بولەك, شىمكەنت قالاسىنىڭ باسقارۋ سحەماسى تۋرالى شەشىمى مەن شىمكەنت قالاسى ءماسليحاتىنىڭ 2021 جىلعا ارنالعان جۇمىس جوسپارىنا وزگەرىستەر ەنگىزۋ ماسەلەسى قارالدى.
