بۇعان دەيىنگى تاۋلىكتىك جوعارى كورسەتكىش بيىلعى 6 قاڭتاردا تىركەلگەن ەدى. سول كەزدە 6 081 سىناما الىنىپتى. قازىر وڭىردە 12 پتر-تەست زەرتحاناسى جۇمىس ىستەپ تۇر. بىلتىرعى ناۋرىزدان بەرى اتالعان زەرتحانالاردا 666 مىڭ پتر-تەست سىناماسى جۇرگىزىلدى.
ال اۋرۋحانالاردا 7 وتتەگى ستانساسى ىسكە قوسىلدى. بۇرىن مۇنداي ورتالىقتاندىرىلعان وتتەگى ستانساسى وبلىستىق پەريناتالدىق ورتالىقتىڭ بازاسىندا عانا بولعان ەكەن. الايدا بىلتىرعى كوروناۆيرۋس پاندەمياسىنىڭ ءبىرىنشى كەزەڭىندە اۋرۋحانالاردى وتتەگى ستانساسىمەن قامتۋ قاجەتتىگى بايقالدى. وسىعان وراي وبلىستىق كارديولوگيالىق ورتالىق پەن وبلىستىق اۋرۋحانادا, اتىراۋ قالاسىنداعى جاڭا مودۋلدىك ينفەكتسيالىق اۋرۋحانادا, قۇرمانعازى مەن قىزىلقوعا اۋداندىق اۋرۋحانالارىندا ورتالىقتاندىرىلعان وتتەگى ستانساسى جۇمىسىن باستادى.
ەندى بيىل №2 وبلىستىق اۋرۋحانادا دا جابدىقتالعان وتتەگى ستانساسى اشىلدى. وبلىستىق اۋرۋحانانىڭ ديرەكتورى ەربول يمانعاليەۆتىڭ ايتۋىنشا, ستانسالار اۆتوماتتى تۇردە باسقارىلىپ, وزدىگىنەن وتتەگى وندىرەدى.
– بۇعان دەيىن اۋرۋحانادا دەربەس وتتەگى تاسىمالىن جۇزەگە اسىراتىن نۇكتەلەر بولعان ەدى. بۇل وتكەن جىلعى جازداعى پاندەميا ورشىگەن تۇستا ازدىق ەتتى. سول سەبەپتەن قوس وكپەسىنە اۋا جەتپەي قينالعان ءار ناۋقاسقا وتتەگى باللونىن قولدانۋعا ءماجبۇر بولدىق. ەندى ءبىز مۇنداي ماجبۇرلىكتەن قۇتىلدىق. وتتەگى ستانساسىنىڭ قۋاتى ناۋقاستاردى تولىق قامتۋعا جەتەدى, – دەيدى ە.يمانعاليەۆ.
اۋرۋحاناداعى وتتەگى تسەحى كيسلورود تاراتاتىن 360 نۇكتەنى قامتاماسىز ەتىپ تۇر. ءتىپتى ەلەكتر ەنەرگياسى وشكەن جاعدايدا وعان قوسىمشا گەنەراتور پايدالانىلمايدى. ويتكەنى وتتەگى ستانساسىنىڭ قۋاتى مەن قىسىمى ءۇش كۇنگە دەيىن ساقتالادى. قازىر ينفەكتسيالىق ستاتسيوناردا كوروناۆيرۋس ينفەكتسياسىمەن اۋرۋى اسقىنعان ناۋقاستار جوق. دارىگەرلەر وتتەگىنى جانساقتاۋ بولىمىندە عانا پايدالانادى.
بيىل وسىنداي وتتەگى ستانساسىن يندەر اۋداندىق اۋرۋحاناسى مەن جىلىوي اۋدانىنىڭ ورتالىعى – قۇلسارى قالاسىندا سالىنىپ جاتقان مودۋلدىك ينفەكتسيالىق اۋرۋحانادا ىسكە قوسۋ جوسپارلانىپ وتىر.
اتىراۋ وبلىسى
