– جەدەل-ىزدەستىرۋ ءىس-شارالارىن وتكىزۋ بارىسىندا جەدەل ۋاكىلدەر پاۆلودار قالاسىنىڭ 22 جاستاعى تۇرعىنىن ۇستادى. كۇدىكتىنىڭ قىلمىس جاساۋعا مۇقيات دايىندالعانى, نەمىس ءوندىرۋشىسىنىڭ كولىگىن الدىن الا تاڭداعانى, كولىكتى ۇرلاپ اكەتۋ باعىتىن جوسپارلاعانى, نەگىزىنەن ۇرلىقتى ساعات 02:00-دەن 03:00-گە دەيىن جاساعانى انىقتالدى. ول تەك “اۋدي 80” ماركالى اۆتوكولىكتەردى ايداپ اكەتۋگە داعدىلانعان, ويتكەنى ولاردىڭ قوسالقى بولشەكتەرى نارىقتا سۇرانىسقا يە, – دەدى پاۆلودار وبلىسى پوليتسيا دەپارتامەنتى كريمينالدىق پوليتسيا باسقارماسىنىڭ باستىعى بالعاباي قاپاروۆ.
ول باستاپقىدا ۇرلانعان كولىكتەردىڭ بولشەكتەرىن تانىستارى ارقىلى ساتقان. كەيىن “OLX” قوسىمشاسى مەن عالامتورداعى “اۋدي” اۋەسقويلار توبى ارقىلى ساتۋدى جۇزەگە اسىرعان.
ۇستالعان كەزدە ەر ادامنان “اۋدي” ماركالى اۆتوكولىكتەردىڭ كىلتتەرى الىندى, ال ونىڭ گاراجىنان “اۋدي-80″ماركالى اۆتوكولىكتىڭ قوسالقى بولشەكتەرى تابىلدى.
سوتقا دەيىنگى تەرگەۋ بارىسىندا جەدەل ۋاكىلدەر ونىڭ 2019, 2020 جانە 2021 جىلدارى پاۆلودار وبلىسىنىڭ اۋماعىندا جاسالعان اۆتوكولىك ۇرلىعىنىڭ التى فاكتىسىنە قاتىسى بار ەكەنىن انىقتادى.
بارلىق فاكتىلەر بويىنشا قازاقستان رەسپۋبليكاسى قك-ءنىڭ 188-بابى (ۇرلىق) سوتقا دەيىنگى تەرگەۋ امالدارى جۇرگىزىلۋدە, ۇستالعان ازامات اقسۋ قالاسىنىڭ ۋاقىتشا ۇستاۋ يزولياتورىنا قامالدى.
