– كوبىنە جولاۋشىلار بيلەتتەردى ساتىپ الۋ كەزىندە تىكەلەي باعىتتاعى مارشرۋتتى تاڭدايدى («نۇر-سۇلتان – الماتى», «اقتاۋ – الماتى» جانە ت.ب.), ال قاۋىرت تاسىمال كەزىندە مەجەلى جەرگە دەيىن بيلەتتەردى ساتىپ الۋ مۇمكىندىكتەرىنە يە بولماي جاتقان شاقتارى بار. ەندى جاڭا قىزمەتتى ەنگىزۋ ارقىلى بيلەت كاسسيرى جولاۋشىعا ءبىر نەمەسە بىرنەشە پويىز اياسىندا قاجەتتى مارشرۋتتى تاڭداۋعا كومەكتەسە الادى. بۇل رەتتە تەمىر جول بيلەتتەرىن راسىمدەۋ, اۋىسىپ وتىرۋ پۋنكتتەرىندە كەلىسىلگەن پويىزداردىڭ كەلۋى مەن جونەلتىلۋى اراسىنداعى كەمىندە 1 ء(بىر) ساعات ايىرماسىن ەسكەرە وتىرىپ جۇزەگە اسىرىلادى, – دەدى «جولاۋشىلار تاسىمالى» اق باس ديرەكتورىنىڭ ماركەتينگ جانە ساتۋ جونىندەگى ورىنباسارى ۆيكتور بوشمانن.
– قاجەتتى ورىن بولماعان جاعدايدا جولاۋشى ءوزىنىڭ ءجۇرىپ-تۇرۋى ءۇشىن قانداي دا ءبىر مارشرۋتتى تاڭداۋعا قۇقىلى. مىسالى, نۇر-سۇلتاننان الماتىعا دەيىن ول ءبىرىنشى بيلەتتى قاراعاندىعا دەيىن, ال ەكىنشىسىن قاراعاندىدان الماتىعا دەيىن الا الادى. مىسالى, نۇر-سۇلتاننان شىمكەنتكە دەيىن اۋىسىپ وتىرۋ مۇمكىندىگى بولعان جاعدايدا, جولاۋشى شۋ قالاسىنا دەيىن بيلەت ساتىپ الا الادى, ال شۋ قالاسىنان باسقا پويىزبەن شىمكەنتكە بارا الادى, – دەپ ناقتىلادى «نۇرلى جول» تەمىر جول ۆوكزالىنىڭ بيلەت كاسساسى مەڭگەرۋشىسىنىڭ مىندەتىن اتقارۋشى الماگۇل ىسقاقوۆا.
ەسكە سالا كەتەيىك, تەمىر جول بيلەتتەرىن ساتۋ پويىزدىڭ جونەلتىلۋىنە 45 تاۋلىك قالعاندا اشىلىپ, پويىزدىڭ جونەلتىلۋىنە 10 مينۋت قالعاندا جابىلادى. سونداي-اق بالاما تاڭداۋ مۇمكىندىگى جوق جولاۋشىلارعا بوس ورىن بولماعان جاعدايدا «كۇتۋ پاراعى» قىزمەتى قولجەتىمدى بولادى. بىلتىر اتالعان قىزمەتتى 65 400 مىڭنان استام جولاۋشى پايدالانعان.
جول ءجۇرۋ قۇجاتتارىن (بيلەتتەردى) قايتارۋ بيلەتتەردى ساتىپ الۋ ءتاسىلى مەن ورنىنا (قولما-قول نەمەسە قولما-قول اقشاسىز ەسەپ ايىرىسۋ) بايلانىستى جولاۋشىلاردى, باگاجدى, جۇك-باگاجدى جانە پوشتا جونەلتىلىمدەرىن تەمىر جول كولىگىمەن تاسىمالداۋ قاعيدالارىنا سايكەس جۇرگىزىلەدى.
كوروناۆيرۋس پاندەمياسىنا بايلانىستى جولاۋشىلاردان جول بويىندا وزىمەن بىرگە جەكە قورعانىش قۇرالدارىن الىپ ءجۇرۋدى جانە سانيتارلىق-ەپيدەميالىق تالاپتاردى ساقتاۋدى سۇرايمىز, دەيدى «جولاۋشىلار تاسىمالى» اق ءباسپاسوز قىزمەتى.
«ەگەمەن-اقپارات»
