قاراعاندى وبلىسىنىڭ اقتوعاي اۋدانىندا سيرەپ بارا جاتقان مارالدى ءوسىرۋ قولعا الىندى. بۇل تۋرالى «24 kz» حابارلادى.
بىلتىر «اقتوعاي مال ونىمدەرى» شارۋاشىلىعىنىڭ باسشىسى ەرجان قىدىربەرلين ەلىمىزدىڭ شىعىس وڭىرىنەن مارالدىڭ 23 انالىعىن جەتكىزىپ, قورىققا جىبەرگەن ەكەن. جىل ىشىندە ونىڭ سانى 35-كە جەتىپتى. كەلەشەكتە ءتۇز تاعىسى سانىن ونان ءارى كوبەيتۋدى ماقسات تۇتىپ وتىر. جالپى, دۇنيە جۇزىندە مارال ءوسىرۋ بويىنشا جاڭا زەلانديا الدىڭعى ورىندا تۇر. ودان كەيىن وسى ءىستى جۇيەلى جولعا قويعان قىتاي, كانادا, رەسەي, كورەي ەلدەرىن اتاپ وتۋگە بولادى. «مارالداردى 3-4 جىلدان كەيىن ءوز ەرىكتەرىنە جىبەرەمىز. بىلۋىمىزشە, مارال مۇيىزىنەن الىناتىن «پانتا» وسىدان ءۇش مىڭ جىل بۇرىن تيبەتتىك مەديتسينادا كەڭىنەن قولدانىلعان ەكەن. قازىر دە ول ۇلكەن سۇرانىسقا يە»,-دەيدى «اقتوعاي مال ونىمدەرى» شارۋاشىلىعىنىڭ باسشىسى ەرجان قىدىربەرلين.
شارۋاشىلىق باسشىسى مارال وسىرۋدە ونىڭ حالىق ءۇشىن قاجەتتىلىگىنە باسا ءمان بەردى. ويتكەنى, مارال مۇيىزىنەن الىناتىن «پانتا» جۇرەك-قان تامىرلارى اۋرۋىنا, ىسىك جارالارىنا جانە باسقا دا سىرقاتتارعا مىڭ دا ءبىر ەم ەكەن. وسى تۇستا شارۋاشىلىقتىڭ جىلقى وسىرۋمەن دە شۇعىلداناتىنىن اتاپ وتكىمىز كەلەدى. جىلقىلاردى شارۋاشىلىق باسشىسى يتاليا, گەرمانيا ەلىنەن الدىرعان.
باقىتبەك كەنەش ۇلى.
دەرەككوز: «24 kz»
فوتو: Priroda sibirl.ru
