رۋحانيات • 10 اقپان، 2021

«عاشىق-جۇرەك» پرەمەراسى ۇسىنىلدى

114 رەت كورسەتىلدى

قازاق ادەبيەتىنىڭ ءىرى وكىلدەرىنىڭ ءبىرى، ايگىلى اقىن مۇقاعالي ماقاتاەۆتىڭ تۋعانىنا 90 جىل تولدى. وسىعان وراي نۇر-سۇلتان قالاسى اكىمدىگىنىڭ مۋزىكالىق جاس كورەرمەن تەاترى «عاشىق-جۇرەك» پوەتيكالىق-مۋزىكالىق قويىلىمىن ساحنالاپ، پرەمەراسىن ۇسىندى، دەپ حابارلايدى Egemen.kz.

اقيىق اقىننىڭ 90 جىلدىعىنا ارنالعان پرەمەراعا قر مادەنيەت جانە سپورت ۆيتسە-ءمينيسترى نۇرقيسا داۋەشوۆ، نۇر-سۇلتان قالاسى اكىمىنىڭ ورىنباسارى باقتيار ماكەن ۇلى، قازاقستاننىڭ ەڭبەك سىڭىرگەن قايراتكەرى، حالىقارالىق «الاش» ادەبي سىيلىعىنىڭ يەگەرى داۋلەتكەرەي كاپ ۇلى، قازاقستاننىڭ ەڭبەك سىڭىرگەن قايراتكەرى، جۋرناليست ءشاربانۋ قوناقبايقىزى بەيسەنوۆا جانە قازاقستاننىڭ جازۋشىلار وداعى مۇشەلەرى، باسقا دا كوپتەگەن اقىن جازۋشىلار ارنايى قاتىستى.

1

شارا بارىسىندا قر مادەنيەت جانە سپورت ۆيتسە-ءمينيسترى نۇرقيسا داۋەشوۆ اقيىق اقىن م.ماقاتاەۆتىڭ ونەگەگە تولى  شىعارمالارى كەلەر ۇرپاققا قالدىرعان اسىل مۇرا ەكەنىن، سونداي-اق قر پرەزيدەنتى قاسىم-جومارت كەمەل ۇلى توقاەۆ بارشا قازاقستاندىقتاردى بۇگىنگى ەرەكشە كۇنمەن ارنايى قۇتتىقتاعانىن بىلاي جەتكىزدى:

- مۇقاعالي ماقاتاەۆتىڭ وسيەت پەن ونەگەگە تولى  شىعارمالارى – كەلەر ۇرپاققا قالدىرعان اسىل مۇراسى. مەملەكەت باسشىسى قاسىم-جومارت كەمەل ۇلى توقاەۆ بارشا قازاقستاندىقتاردى بۇگىنگى ەرەكشە كۇنمەن ارنايى قۇتتىقتادى. مادەنيەت جانە سپورت مينيسترلىگى بيىل م. ماقاتاەۆتىڭ 90 جىلدىعىنا وراي باسقا وڭىرلەرمەن بىرلەسىپ كوپتەگەن شارالاردى جوسپارلاۋدا. وسىنداي شارالار ءبىزدىڭ رۋحانياتىمىزدى بايىتا تۇسەدى. نۇر-سۇلتان قالاسى اكىمدىگىنىڭ مۋزىكالىق جاس كورەرمەن تەاترى كەشە عانا اشىلسا دا، ءوز كورەرمەندەرىنىڭ جۇرەگىنەن ەرەكشە ورىن الىپ ۇلگەردى. وعان وتە قۋانىشتىمىز. سوندىقتان ارقاشان قازاق ونەرىنىڭ، قازاق مادەنيەتىنىڭ تۋى بيىك بولسىن! شىعارماشىلىق ۇجىمعا العىس ايتامىن جانە ساتتىلىك تىلەيمىن! – دەدى ۆيتسە-مينيستر نۇرقيسا داۋەشوۆ.

پوەزيا مەن مۇقاعالي، اقىننىڭ ءوز ولەڭىندە تولعانعانىنداي، ەگىز ۇعىمعا اينالىپ كەتكەنى راس. پوەزيا دەسە بىردەن ويىمىزعا كەلە قالاتىن تۇلعالاردىڭ ءبىرى دە وسى مۇقاعالي ەكەنى انىق. سوندىقتان دا، حالقىمىزدىڭ اسىل پەرزەنتىنىڭ، ادەبيەتىمىزدەگى ۇلكەن سۋرەتكەردىڭ ەسىمى ارقاشاندا ەل ەسىندە ءجۇرۋى ءتيىس. وسى ماقساتتا ەلوردامىزداعى ءبىر مەكتەپكە اقىننىڭ ەسىمىن بەرۋدى ۇسىنىپ جاتقانىن نۇر-سۇلتان قالاسى اكىمىنىڭ ورىنباسارى باقتيار ماكەن ۇلى ايتىپ بەردى.

- مۇقاعالي اتامىزدىڭ مەرەيتويى قۇتتى بولسىن! بولاشاقتا وسى مەرەيتويدى جىل سايىن قارسى الىپ، باسقا مەكەمەلەردە دە، ءبىلىم وشاقتارىندا دا بىرىگىپ ۇيىمداستىرامىز دەگەن سەنىمىمىز مول. نۇر-سۇلتان قالاسىندا №74 مەكتەپكە مۇقاعالي ماقاتاەۆتىڭ اتىن بەرۋدى ۇسىنىپ جاتىرمىز. مەنىڭ ويىمشا، ەلوردادا رۋحانيات پەن مادەنيەتتىڭ دامۋىندا كوپ ەڭبەك اتقارىپ جۇرگەن تۇلعالاردىڭ اتىن شىعارۋ وتە ماڭىزدى. سوندىقتان بۇگىنگى مادەني كەشىمىز قۇتتى بولسىن! – دەدى نۇر-سۇلتان شاھارى اكىمىنىڭ ورىنباسارى باقتيار ماكەن.

جۋرناليست، قازاقستاننىڭ ەڭبەك سىڭىرگەن قايراتكەرى ءشاربانۋ بەيسەنوۆا بولسا، قازاقتىڭ قارا ولەڭىنىڭ ۇلكەن قۇدىرەتىن كورسەتكەن اقىن – م.ماقاتاەۆتىڭ ارۋاعى ءۇشىن وسىنداي قويىلىم كورسەتىلىپ جاتقانىنا، مۋزىكالىق جاس كورەرمەن تەاترى اشىلعاننان بەرى تۇراقتى كورەرمەنىنە اينالعانىن ايتىپ، ءوزىنىڭ جۇرەكجاردى تىلەگىن، العىسىن ءبىلدىردى.

- بۇگىن قازاقتىڭ قارا ولەڭىنىڭ ۇلكەن قۇدىرەتىن كورسەتكەن اقىن – مۇقاعالي ماقاتاەۆتىڭ قۇرمەتىنە وسىنداي قويىلىم كورسەتىلىپ جاتىر. ادام ءوزى ولەڭدى تازارۋ ءۇشىن وقيدى دەپ ويلايمىن. ادامنىڭ ساناسىن، كوڭىل-كۇيىن ءدال وسى ولەڭدەي، كۇيدەي تازارتاتىن قۇدىرەت جوق شىعار.  سوندىقتان جاستارىمىز ولەڭ وقىپ وسسە، ءبىزدىڭ ادەبيەتىمىزدى تانىپ بىلسە،  ەلىمىزدىڭ كەلەشەگى زور بولادى. ءبىز وسى تەاتر اشىلعاننان بەرى تۇراقتى كورەرمەنىنە اينالدىق. اقيىق اقىننىڭ 90 جىلدىعى قۇتتى بولسىن! جاقسى كەشتە كەزدەسەيىك! – دەدى ءشاربانۋ قوناقبايقىزى.

ال مۋزىكالىق جاس كورەرمەن تەاترىنىڭ ديرەكتورى، قازاقستاننىڭ ەڭبەك سىڭىرگەن قايراتكەرى اسحات ماكسيم ۇلى ماەميروۆ وسى «عاشىق-جۇرەك» قويىلىمىندا م.ماقاتاەۆتىڭ ولەڭدەرى ارقىلى ءوزىنىڭ بۇكىل بولمىسىن كورسەتپەك بولعانىن ايتىپ جانە بۇگىنگى كەشكە كەلگەن قوناقتارعا ريزاشىلىعىن ءبىلدىردى.

- ءبىز بۇگىن كورەرمەندەردى قازاق پوەزياسىنىڭ اقيىق اقىنى م.ماقاتاەۆتىڭ ولەڭدەرىمەن تانىستىرۋدى ءجون سانادىق. بۇل «عاشىق-جۇرەك» قويىلىمى ولەڭدەر ارقىلى اقىننىڭ بۇكىل بولمىسىن كورسەتپەك! قازىر قوعامدا «جاستار پوەزيانى وقىمايدى، ولەڭدەردى كوپ تۇسىنبەيدى» دەگەن كەرەعار ۇعىم بار. سوندىقتان، وسى ساحنالانىپ جاتقان قويىلىم ەرەكشە شىنايى سەزىمدەردى تارقاتاتىن بولادى. جاس ۇرپاقتىڭ بويىندا اقىن شىعارماشىلىعى تۋرالى ەرەكشە وي قالىپتاستىرادى دەپ ويلايمىن! ۇلتىمىزدىڭ باعىنا ءبىتىپ، بارشا قازاقتىڭ جۇرەگىنە جىر بولىپ سىڭگەن مۇقاعالي ماقاتاەۆتىڭ تۋعان كۇنىنە ارنايى قويىلىپ جاتقان پرەمەراعا كەلگەندەرىڭىز ءۇشىن العىسىمدى بىلدىرەمىن!، – دەدى تەاتر ديرەكتورى اسحات ماەميروۆ.

1

«عاشىق-جۇرەك» سپەكتاكلى –  اۆتوردىڭ وي-ارمانىنان، جان سارايىنان، ىشكى تانىمى مەن تولعانىسىنان تۋعان ولەڭ-جىرلارى مەن اندەرىنە قۇرىلعان ساحنالىق قويىلىم. تەاتر اكتەرلەرى قالا تۇرعىندارى مەن قوناقتارىنا ۇيلەسىمدىلىك پەن تارتىمدى رەجيسسەرلىك كومپونەتتەردەن قۇرىلعان تاماشا مۋزىكالىق كەش سىيلادى.

قويىلىمنىڭ قويۋشى-رەجيسسەرى امان عۇماروۆ. مۇقاعالي ماقاتاەۆتىڭ بەينەسىن تەاتر اكتەرى قازىبەك ەسقارا، ال ونىڭ دوسى ءشامىلدىڭ بەينەسىن اكتەر ەرنازار جاڭاتىلەك سومدادى. سونداي-اق، سپەكتاكلگە تەاترىمىزدىڭ بارلىق ارتيستەرى قاتىستى. قويىلىمدى مۋزىكامەن سۇيەمەلدەگەن – تەاتر وركەسترى، مۋزىكاسىن ارلەگەن – بولات جولداسوۆ.

پوەتيكالىق-مۋزىكالىق قويىلىمدا مۇزبالاق اقىننىڭ «ەسىڭە مەنى العايسىڭ!»، «كۇن قايدا»، «انا، سەن باقىتتىسىڭ»، « جاپىراق جۇرەك جاس قايىڭ»،  «وتىزدان اسىپ بارامىن»، «قۇم عانا اۋعان»، «كۇرەڭ كۇز»، «باقىت دەگەن»، ء«سابي بولعىم كەلەدى»، «قايران جەڭگەم»، «قازاقستانىم» شىعارمالارى جانە ودان باسقا «التاي-اتىراۋ»  پوەماسى، سونداي-اق «باقىت دەگەن نە ءوزى؟!»، «شىدا، شىدا»، «سۇيەدى ەكەم»، ء«شامىل-اۋ»، تاعى باسقا  ولەڭدەرى وقىلدى.

41

ەلىمىزدە ورىن الىپ وتىرعان پاندەميا جاعدايىنا بايلانىستى مۋزىكالىق جاس كورەرمەن تەاترىندا بارلىق سانيتارلىق تالاپتار ساقتالدى. وسى تارتىپتە «عاشىق-جۇرەك» مۋزىكالىق پوەتيكالىق قويىلىمى 10، 11 اقپانعا دەيىن جالعاسادى.

سوڭعى جاڭالىقتار

ۇقساس جاڭالىقتار