مۇزدىق دحاۋليگانگي وزەنىنىڭ ارناسىنا قۇلاپ, ۇلكەن سۋ تاسقىنىن تۋدىرعان. بۇل وقيعا ءۇندىستاننىڭ سولتۇستىك ۋتتاراكحاند شتاتىنداعى چامولي وكرۋگىندە ورىن العان. سالدارىنان 171 ادام جوعالىپ, 26 ادام قايتىس بولدى. حابار-وشارسىز كەتكەندەردىڭ كوپشىلىگى ەكى سۋ ەلەكتر ستانساسىن سالۋمەن اينالىسقان جۇمىسشىلار بولعان دەگەن مالىمەت بار.
قۇتقارۋ جانە ىزدەستىرۋ جۇمىسى ءجۇرىپ جاتىر. جىلدام سۋ اعىنى مەن تاۋ جىنىستارى تاۋدان شىققان كەزدە سالىنىپ جاتقان تاعى ءبىر شاعىن گيدروستانسانى قيراتتى. قايعىلى وقيعا سالدارىنان تۇرعىن ۇيلەر قيراپ, اعاشتار سىندى. ۋتتاراكحاند شتاتىنىڭ پوليتسيا باستىعى اشوك كۋمار CNN جۋرناليستەرىمەن سويلەسكەن كەزدە 26 ادامنىڭ دەنەسى قيراندىلار استىنان شىعارىلعانىن ايتتى. ونىڭ ايتۋىنشا, 171 ادامدى ىزدەۋ جۇمىسى جالعاسۋدا, ونىڭ ىشىندە گيدروستانسالاردىڭ ءبىرىنىڭ قۇرىلىسى كەزىندە سالىنعان تۋننەلدە قالعان 35 جۇمىسشى بار.
تۋننەلدەن جۇمىسشىلاردى ىزدەۋ جانە شىعارۋ بويىنشا قۇتقارۋ جۇمىسىنا قيراندىلار كەدەرگى كەلتىرىپ, ونى باياۋلاتادى. وتكەن جەكسەنبىدە قۇتقارۋشىلار كىشكەنتاي تۋننەلدەن 12 ادامدى شىعارىپ الدى. وقيعا سالدارىنان 13 اۋىلدىڭ 2500 تۇرعىنى ەلەكتر جارىعىنسىز قالدى.
ەسكە سالا كەتسەك, بۇدان بۇرىن ءۇندىستاننىڭ تاۋلى ايماعىنداعى ۋتتاراكحاند شتاتىندا مۇز كوشكىنى سالدارىنان وزەن سۋى تاسىپ, تابيعات اپاتىنان 150-گە جۋىق ادامنىڭ ءىز-ءتۇزسىز كەتكەنىن حابارلاعان بولاتىنبىز.
كەيىنىرەك ءۇندىستان پرەمەر-ءمينيسترى نارەندرا مودي ۋتتاراكحاند شتاتىنداعى مۇز كوشكىنى سالدارىنان تۋىنداعان سۋ تاسقىنىنىڭ باقىلاۋعا الىنعانىن مالىمدەدى.
