سارىاعاش اپب-نىڭ كەزەكشى بولىمىنە «102» ءنومىرى ارقىلى جەرگىلىكتى تۇرعىن حابارلاسقان. وندا زاڭسىز بۋكمەركەرلىك كەڭسەنىڭ جۇمىس جاساپ جاتقانى جايلى كورسەتكەن. اتالعان جايتتى پوليتسيا قىزمەتكەرلەرى قر قك-ءنىڭ 307-بابى (زاڭسىز ويىن بيزنەسىن ۇيىمداستىرۋ) بويىنشا تىركەدى.
حابار الىسىمەن پوليتسيا قىزمەتكەرلەرى وقيعا ورنىنا جەدەل تۇردە شىقتى. ول جەردى ءجىتى باقىلاپ, زاڭعا قايشى كەلەتىن زاتتار بولۋى مۇمكىن ەكەنى ەسكەرىلدى. سونداي-اق ويىنحانادان التى دانا پروتسەسسور, ءبىر دانا چەك شىعاراتىن كاسسالىق اپپارات ايعاقتى زات رەتىندە تاركىلەنىپ الىنىپ, ساراپتاما تاعايىندالدى. قازىرگى تاڭدا وسى ءىس بويىنشا سوتقا دەيىنگى تەرگەۋ امالدارى جۇرگىزىلۋدە.
سونىمەن قاتار سارىاعاشتىق پوليتسەيلەر ويىنحانا يەسىنە قر اقبتك-ءنىڭ 425-بابىمەن (حالىقتىڭ سانيتارلىق-ەپيدەميولوگيالىق سالاۋاتتىلىعى سالاسىنداعى زاڭناما تالاپتارىنىڭ, سونداي-اق گيگيەنالىق نورماتيۆتەردىڭ بۇزىلۋى) بويىنشا ءىس-قۇجاتتار جيناقتالىپ, زاڭدى شارا كورىلۋى ءۇشىن سەبب-گە جولداندى.
ءوز كەزەگىندە تۇركىستان وبلىسى پوليتسەيلەرى تۇرعىندارعا جانە كاسىپكەرلەرگە كارانتين تالاپتارىن, ياعني بەتپەردەلىك رەجيم مەن اراقاشىقتىقتى ساقتاۋدى, اسىرەسە زاڭسىز ويىنحانالار اشىپ, جاستاردىڭ ساناسىن ۋلاۋعا جول بەرمەۋدى ەسكەرتەدى.
