بىراق ولاردىڭ كوزدەن تاسالانباق بولعان «جاسىرىنباق» ويىنى ۇزاققا بارمادى. وبلىستىق پوليتسيا دەپارتامەنتىنىڭ قىزمەتكەرلەرى «ميگرانت» جەدەل-پروفيلاكتيكالىق ءىس-شاراسىن وتكىزىپ, سوت شەشىمىن ورىنداۋدان باس تارتىپ جۇرگەندەردى انىقتادى. سونداي-اق جەكە باسىن كۋالاندىراتىن قۇجاتى بولماعان شەتەل ازاماتتارى دا ۇستالدى.
– اتالعان ءىس-شارانىڭ ماقساتى – ەل اۋماعىندا شەتەلدىكتەرگە ءتيىستى باقىلاۋدى كۇشەيتۋ. سونداي-اق ەل زاڭناماسىن جۇيەلى تۇردە بۇزاتىن شەتەلدىكتەردىڭ قولدانىستاعى زاڭناما تالابىنا سايكەس ەلدەن شىعىپ كەتۋىن قامتاماسىز ەتۋ, – دەيدى وبلىستىق پوليتسيا دەپارتامەنتىنىڭ باستىعى, پوليتسيا پولكوۆنيگى قامزا ۇمبەتقاليەۆ. – ءبىزدىڭ قىزمەتكەرلەر قازاقستان رەسپۋبليكاسىنىڭ كوشى-قون زاڭناماسىن بۇزىپ, ەل اۋماعىنان ءوز ەركىمەن شىعىپ كەتۋ جونىندەگى سوتتىڭ قاۋلىسىن ورىنداماي جۇرگەن وزبەكستان رەسپۋبليكاسىنىڭ 24 ازاماتىن اشكەرەلەدى. پوليتسيا قىزمەتكەرلەرى شەتەلدىكتەردى ەلدەن ماجبۇرلەپ شىعارۋ شاراسىن جۇرگىزدى.
ال اتىراۋ قالالىق پوليتسيا باسقارماسى باستىعىنىڭ ءبىرىنشى ورىنباسارى, پوليتسيا پودپولكوۆنيگى ەرلان بيعامباەۆتىڭ ايتۋىنشا, «ميگرانت» جەدەل-پروفيلاكتيكالىق ءىس-شاراسى كەزىندە 200-دەن استام شەتەلدىك ازاماتقا ءتۇسىندىرۋ جۇمىسى جۇرگىزىلىپتى. سونىمەن بىرگە وبلىس ورتالىعىنا تاياۋ ورنالاسقان جۇلدىز, تومارلى, كوكتەم, اقجار, ەركىنقالا, بالاۋسا, جۇمىسكەر, راكۋشا, العاباس, تاسقالا, كوكارنا, ۆودنيكوۆ ەلدى مەكەندەرىندەگى جەكە تۇرعىن ءۇي سەكتورى مەن ساياجايلار تەكسەرىلدى. ناتيجەسىندە, جەكە باسىن كۋالاندىراتىن قۇجاتى جوق 25 شەتەلدىك ازاماتتىڭ جۇرگەنى بەلگىلى بولدى. ولاردىڭ جەكە باسى انىقتالعاننان كەيىن قازاقستان رەسپۋبليكاسىندا بولۋ زاڭدىلىعى تەكسەرىلدى. ەلىمىزدىڭ كوشى-قون تۋرالى زاڭدىلىعىن بۇزعان «مەيماندارعا» قاتىستى اكىمشىلىك شارالار قولدانىلدى.
– تەكسەرۋ كەزىندە كوشى-قون زاڭدىلىعىن بۇزۋدىڭ 119 دەرەگى تىركەلدى. قولدانىستاعى زاڭناماعا سايكەس وزبەكستان رەسپۋبليكاسىنىڭ 119 ازاماتى جانە قازاقستان رەسپۋبليكاسىنىڭ 41 ازاماتى اكىمشىلىك جاۋاپكەرشىلىككە تارتىلدى, – دەيدى ول.
اتىراۋ وبلىسى
