وتكەن جىلى پاندەميانىڭ سالدارىنان مۇناي ءوندىرۋ كولەمىنىڭ 10 پايىزعا تومەندەۋى وڭىردەگى مۇناي كاسىپورىندارى جانىندا شوعىرلانعان شاعىن جانە ورتا كاسىپكەرلىك نىساندارىنا زاردابىن تيگىزىپ, ۇلكەن كومپانيالاردان الاتىن تاپسىرىستار كولەمى تىم ازايىپ كەتتى نە مۇلدە بولماي قالدى. دەگەنمەن, پاندەميا كەزىندە ادامدار مەن تەحنيكا قوزعالىسىنىڭ ايتارلىقتاي شەكتەۋلى بولعاندىعىنا قاراماستان, ەكونوميكانىڭ بىرنەشە سالالارىندا تومەندەۋ بولعان جوق.
«سوعان قاراماستان قولدا بار مۇمكىندىكتەردى پايدالانىپ, ەكونوميكانىڭ كۇرت تومەندەۋىنە جول بەرمەيتىن جانە ءارى قاراي قالپىنا كەلتىرەتىن شارالار قابىلداۋ ناتيجەسىندە جاعداي تۇراقتاندى. ناتيجەسىندە نەگىزگى الەۋمەتتىك-ەكونوميكالىق كورسەتكىشتەر بويىنشا وڭ ديناميكاعا قول جەتكىزىلدى. اتاپ ايتقاندا, ونەركاسىپتىك كاسىپورىن 1,8 ترلن تەڭگەنىڭ ءونىمىن ءوندىرىپ, 646,8 ملرد تەڭگە ينۆەستيتسيا تارتىلدى», دەپ اتاپ ءوتتى وڭداسىن ورازالين.
وتكەن جىل بويىنشا اقتوبە وبلىسى اۋىل شارۋاشىلىعىنىڭ دامۋى بويىنشا رەسپۋبليكادا الدىڭعى ورىنعا شىقتى.
جۇمىستىڭ ءتيىمدى ۇيىمداستىرىلۋىنىڭ ارقاسىندا, كوكتەمنەن باستاپ ون ەكى اۋدانداعى اۋىل شارۋاشىلىعى قۇرىلىمدارى مەن شارۋا قوجالىقتارىنا 20,4 ملرد تەڭگە كولەمىندە سۋبسيديا, 47,8 ملرد تەڭگە جەڭىلدەتىلگەن نەسيەلەر بەرىلدى. وعان شارۋالار نەگىزىنەن تۇقىم, تىڭايتقىش ساتىپ الدى, نە الدىڭعى جىلداردان بەرى جينالعان قارىزدارىن جاپتى.
كوكتەمدەگى قاتاڭ كارانتينگە قاراماستان ەگىس جۇمىستارىن دەر كەزىندە جۇرگىزۋگە مۇمكىندىك بولعاندىقتان, شارۋالار كۇزگى ءونىم جيناۋ كەزىندە ايتارلىقتاي قيىندىق كورگەن جوق. جەرگىلىكتى تاۋار وندىرۋشىلەر ونىمدەرىن قىس بويى جەرگىلىكتى رىنوكتا ساتۋعا مۇمكىندىك الدى. وسىلايشا جەرگىلىكتى شارۋاشىلىقتار ءوز ونىمدەرىن ىشكى رىنوكتا ساتۋدان قيىندىق كورگەن جوق. وعان تاۋار وتكىزۋدەگى بيۋروكراتيالىق كەدەرگىلەردىڭ جويىلۋى مەن پاندەمياعا بايلانىستى سىرتتان كەلەتىن تاۋارلارعا قويىلعان شەكتەۋلەردىڭ ارقاسىندا قول جەتكىزدى. كوپشىلىك شارۋا قوجالىقتارى كۇزدە ساتىلعان ونىمنەن تۇسكەن تابىسىنا ليزينگپەن تەحنيكا الدى.
مەملەكەتتىك قولداۋ جەم-ءشوپتى سۋبسيديالاۋ كولەمىنىڭ ارتۋى ارقاسىندا مۇمكىن بولعاندىقتان, جىل سوڭىندا وڭىردەگى اۋىل شارۋاشىلىعىنىڭ دامۋى 6,7%-عا جوعارىلاپ, وسى سالاداعى وندىرىلگەن ءونىم كولەمى 324,7 ملرد تەڭگەنى قۇرادى.
بيىلعى كوكتەمدە اۋىل شارۋاشىلىعىن قولداۋ جۇمىستارى جالعاساتىن بولادى.
