«پاۆلودار وبلىسىنىڭ جەدەل قىزمەتكەرلەرى رەسەي فەدەراتسياسىندا وعان قاتىستى مەملەكەتارالىق ىزدەۋ جاريالانعان 38 جاستاعى ەر ادامدى ۇستادى. ۇستالعان ازامات 2017 جىلى التاي وڭىرىندە تۇرىپ, ۇرلىق جاساعان. سوت ۇكىمى بويىنشا باس بوستاندىعىنان ايىرۋمەن بايلانىستى ەمەس جازا تۇرىنە سوتتالعان ازامات پروباتسيالىق باقىلاۋ شارتتارىن بۇزۋعا بىرنەشە رەت جول بەرگەن. جازاسىنىڭ قالعان بولىگى قاتاڭداتىلۋى مۇمكىن ەكەنىن تۇسىنگەن ازامات پاۆلودار وبلىسى ۋسپەن اۋدانىنىڭ اۋىلدارىنىڭ بىرىندە جاسىرىنىپ, بەلگىلى ءبىر كاسىبي بىلىكتىلىكتى تالاپ ەتپەيتىن جۇمىستار اتقاراتىن جۇمىسشى رەتىندە جۇمىسقا ورنالاسقان», دەدى پاۆلودار وبلىسى پوليتسيا دەپارتامەنتى كريمينالدىق پوليتسيا باسقارماسىنىڭ باستىعى بالعاباي قاپاروۆ.
بالعاباي قاپاروۆ قىلمىس جاساعان ادامداردى ىزدەستىرۋ ءىسى ۇزدىكسىز جۇرگىزىلىپ جاتقانىن ايتىپ ءوتتى. جىل باسىنان بەرى ءتۇرلى قىلمىستار جاساعانى ءۇشىن 14 قىلمىسكەر, ال وتكەن جىلداردان بەرى ىزدەۋدە جۇرگەندەر ساناتىنان ءتورت كۇدىكتى ۇستالدى.
«ىزدەستىرۋ باعىتى بويىنشا جۇمىس ۇنەمى جۇرگىزىلەدى. ۇزاق اقپارات جيناۋ جانە نۇسقالاردى قايتا تەكسەرۋ ناتيجەسىندە قىلمىستار اشىلادى. بۇل جۇمىستى كۇشەيتۋ ماقساتىندا وبلىس اۋماعىندا ون كۇندىك «كۇماندى پاتەر» جەدەل-الدىن الۋ ءىس-شاراسى ءوتتى. وسى كەزەڭدە پوليتسياعا 3505 ادام جەتكىزىلدى, ولاردىڭ بارلىعى ەسەپكە الىندى, قىلمىستاردى اشۋعا قاجەتتى جەدەل اقپاراتتار جينالدى», دەدى ول.
