سىبايلاس جەمقورلىققا قارسى ءىس-قيمىل اگەنتتىگى قازاقستان رەسپۋبليكاسى پرەزيدەنتىنىڭ جانىنداعى مەملەكەتتىك باسقارۋ اكادەمياسىمەن جانە «سامۇرىق-قازىنا» ۇلتتىق ءال-اۋقات قورى» اق بىرلەسىپ كۆازيمەملەكەتتىك جانە جەكە سەكتورلاردا سىبايلاس جەمقورلىققا قارسى كومپلاەنستى ىلگەرىلەتۋ بويىنشا العاشقى وقىتۋ سەمينارىن وتكىزدى.
سەمينار جۇمىسىنا مەملەكەتتىك مەكەمەلەر مەن كۆازيمەملەكەتتىك سەكتور سۋبەكتىلەرىنىڭ باسشىلارى قاتىستى, بارلىعى 1000-نان استام ادام.
ايتا كەتۋ كەرەك, كۆازيمەملەكەتتىك كومپانيالاردا سىبايلاس جەمقورلىققا قارسى كومپلاەنستى ەنگىزۋ بويىنشا مىندەت وتكەن جىلدىڭ سوڭىنان باستاپ زاڭنامالىق دەڭگەيدە ەنگىزىلدى جانە كورپوراتيۆتىك ادالدىق ستاندارتتارىنىڭ ساقتالۋىن باقىلاۋدى كوزدەيدى.
ءىس-شارانى اشقان اگەنتتىك توراعاسىنىڭ ءبىرىنشى ورىنباسارى ولجاس بەكتەنوۆ بيزنەستى پاراساتتى جۇرگىزۋدىڭ ماڭىزدىلىعىن اتاپ ءوتتى. ترانسپارەنسي قازاقستان سوتسيولوگيالىق زەرتتەۋىنىڭ ناتيجەلەرىنە سايكەس, سۇرالعان بيزنەستىڭ تەك 8,2%-ى 2020 جىلى سىبايلاس جەمقورلىق تاجىريبەسى تۋرالى حابارلادى. كاسىپكەرلەردىڭ 80%-دان استامى قازاقستاندا پارا بەرمەي جانە تەك قۇقىقتىق سالادا جۇمىس ىستەي وتىرىپ دامۋ مۇمكىن دەپ سانايدى.
و.بەكتەنوۆ كۆازيمەملەكەتتىك سەكتور كومپانيالارىنىڭ باسشىلىعىن كومپلاەنس-قىزمەتتەردى قۇرۋدى جەدەلدەتۋگە, ولاردى بىلىكتى كادرلارمەن جاساقتاۋعا شاقىردى.
مەملەكەتتىك باسقارۋ اكادەمياسىنىڭ رەكتورى ەرلان ءابىل سىبايلاس جەمقورلىققا قارسى كومپلاەنس جۇيەسىن قۇرۋ پروتسەسىندە ISO 37001 «پاراقورلىقپەن كۇرەس مەنەدجمەنتى جۇيەسى» حالىقارالىق ستاندارتىن ەنگىزۋ الەۋەتىن اتاپ ءوتتى.
«بۇگىندە مەملەكەتتىك سەكتورمەن قاتار اكادەميامەن پاراساتتى بيزنەس قاعيداتتارىن قالىپتاستىرۋ بويىنشا كەشەندى جۇمىس جۇرگىزىلۋدە. ول ءۇشىن كومپلاەنس-وفيتسەرلەردى وقىتۋ مودۋلدەرى جانە سىبايلاس جەمقورلىققا قارسى كومپلاەنس بويىنشا ۇيىمداردى سەرتيفيكاتتاۋ پروتسەسى ىسكە قوسىلدى», اكادەميا رەكتورى ايتتى.
«سامۇرىق-قازىنا» اق كومپلاەنس-قىزمەتىنىڭ باسشىسى داۋرەن اقشالوۆ وسى ينستيتۋتتى جۇزەگە اسىرۋدىڭ پراكتيكالىق تاجىريبەسىمەن ءبولىستى.
ءىس-شارا سوڭىندا ەلىمىزدىڭ بارلىق وڭىرلەرىندە كۆازيمەملەكەتتىك سەكتور سۋبەكتىلەرى ءۇشىن وڭىرلىك وقىتۋ سەمينارلارىن وتكىزۋ تۋرالى شەشىم قابىلداندى.
ەستەرىڭىزگە سالا كەتەيىك, بۇعان دەيىن اگەنتتىك توراعاسى اليك شپەكباەۆ الماتى قالاسى مەن الماتى وبلىسىنىڭ كاسىپكەرلەرىمەن كەزدەسۋ وتكىزگەن بولاتىن.
