قاڭتار ايىنىڭ باسىنان باستاپ قاراعاندى وبلىسى ساتباەۆ قالالىق پوليتسيا بولىمىنە قالا تۇرعىندارىنان بەلگىسىز ازاماتشاعا الدانىپ قالعاندىقتارى تۋرالى ارىزدار تۇسە باستادى. الاياق جابىرلەنۋشىلەرمەن الەۋمەتتىك جەلى ارقىلى بايلانىسقا شىعىپ, ۇتىمدى بيزنەسكە اقشا قۇيۋعا ۇگىتتەگەن. ول جابىرلەنۋشىلەردى قوماقتى تابىس تابۋعا بولاتىندىنا سەندىرگەن.
الاياقتىڭ ايتقانىنا سەنگەن تۇرعىندار وزدەرىنىڭ جيعان-تەرگەن اقشالارىن بەلگىسىز بىرەۋگە جىبەرىپ وتىرعان. ءبىرى الاياققا 100-200 مىڭ تەڭگە جىبەرسە, ەندى ءبىرى 500-700 مىڭ جىبەرگەن. ساتباەۆتىڭ تاعى ءبىر تۇرعىنى الاياققا 2 ميلليون 700 مىڭ تەڭگە اقشا جىبەرىپ, سان سوعىپ قالعان. كەيىن, ۇستەمە اقشا بىلاي تۇرسىن, ءوز اقشالارىن الا الماي قالعان تۇرعىندار پوليتسياعا ارىز جازعان.
اتالعان فاكتىلەر بويىنشا قازاقستان رەسپۋبليكاسى قىلمىستىق كودەكسىنىڭ 190-بابىنا (الاياقتىق) سايكەس قىلمىستىق ءىس قوزعالدى. پوليتسيا قىزمەتكەرلەرى اتالعان قىلمىستى اشۋ جانە كۇدىكتىنى انىقتاۋ بويىنشا اۋقىمدى جۇمىستار اتقاردى. جۇرگىزىلگەن جەدەل-ىزدەستىرۋ ءىس-شارالارىنىڭ ناتيجەسىندە پوليتسيا قىزمەتكەرلەرى وسى ىسكە قاتىسى بار دەگەن كۇدىكپەن وسكەمەن قالاسىنىڭ 24 جاستاعى تۇرعىنىن انىقتاپ, ۇستادى.
تەرگەۋ ارەكەتتەرى بارىسىندا الاياق ازاماتشانىڭ وسىنداي الاياقتىقتىڭ 18 فاكتىسىنە قاتىسى بار ەكەنى بەلگىلى بولدى. ونىڭ ارباۋىنا تەك ساتباەۆ قالاسىنىڭ تۇرعىندارى عانا ەمەس, نۇر-سۇلتان قالاسىنىڭ تۇرعىندارى دا تۇسكەن. جابىرلەنۋشىلەرگە كەلتىرىلگەن شىعىن كولەمى شامامەن 10 ميلليوندى قۇرادى.
