ەلدى مەكەندەگى ىندەتتى جۇقتىرۋ كورسەتكىشتەرى وبلىستىق دەڭگەيدەن اسىپ كەتكەن. ءسويتىپ, ماماندار ۆيرۋس وشاعىن زارارسىزداندىرىپ, قىزمەتكەرلەر مەن قارتتاردى پتر تەستىلەۋدەن وتكىزەدى. سونداي-اق بيلىك بۇل وڭىرگە 6 اقپاننان باستاپ قاتاڭداتىلعان كارانتيندىك شارالاردى ەنگىزبەك.
وسىعان وراي ەلدى مەكەندە مەكتەپكە دەيىنگى مەكەمە, ءبىلىم سالاسىنا قاتىستى ءتۇرلى ۇيىرمەلەر, سپورتتىق جاتتىعۋ زالدارى مەن مادەني نىسانداردىڭ جۇمىسى توقتايدى, ءارى مەكتەپتەر قاشىقتىقتان وقىتۋ جۇيەسىنە كوشەدى. دەمالىس كۇندەرى مونشا, ساۋنا, بازار جۇمىستارىنا تىيىم سالىنادى. مۇنداعى ەكىنشى دەڭگەيلى بانكتەر, پوشتا بولىمشەلەرى, نوتاريۋس, لومبارد, ساقتاندىرۋ كومپانيالارى, شاعىن كرەديتتىك ۇيىمدار الدىن الا جازىلۋ ادىسىمەن ساعات 09:00 – 16:00 ارالىعىندا عانا جۇمىس ىستەيدى.
وكىنىشكە قاراي, شاقانداعى قارتتار ۇيىندە كورونوۆيرۋستى 70 قاريا جانە 26 قىزمەتكەر جۇقتىرعان.
«قازىرگى ۋاقىتتا اۋرۋ وشاعى تولىق جويىلدى. سىرقاتتى جۇقتىرعاندار مەن ولارمەن ارالاسقان ادامدار انىقتالىپ تەكسەرىلىپ جاتىر. ال مەكەمەدە دەزينفەكتسيالىق شارالار جۇرگىزىلىپ, ناۋقاستارعا كومەك كورسەتىلىپ جاتىر», دەپ مالىمدەدى تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتىنىڭ رەسمي وكىلى ايگۇل شاتەكوۆا.
