«مەملەكەتتىك جوسپارلاۋ جۇيەسىنە قاتىستى جاڭا تاسىلدەردى ازىرلەۋدىڭ نەگىزگى مىندەتى – ونىڭ تيىمدىلىگىن كۇشەيتۋ بولدى. ماسەلەن, ءبىرىنشى دەڭگەيدەگى قۇجاتتار ەلدىڭ ۇزاق مەرزىمدى جانە ورتا مەرزىمدى كەزەڭدەگى دامۋ بولجامىن ايقىندايدى. «قازاقستان – 2050» ستراتەگياسى مەملەكەتتىڭ ۇزاق مەرزىمدى دامۋىن ايقىندايتىن ەلدىڭ نەگىزگى قۇجاتى سانالادى. وسىعان بايلانىستى ۇزاق مەرزىمدى قۇجاتتى ىسكە اسىرۋ ءۇشىن جالپىۇلتتىق باسىمدىقتار قۇرالى ەنگىزىلەدى, ول «قازاقستان – 2050» ستراتەگياسى بولجامىن قىسقا مەرزىمدە ىسكە اسىرۋ ءۇشىن (2025 جىلعا دەيىن) نەگىزگى باسىمدىقتاردى بىرىكتىرەتىن جانە ايقىندايتىن بىرىڭعاي ينكليۋزيۆتى پلاتفورما بولادى», دەدى قايرات كەلىمبەتوۆ.
ق.كەلىمبەتوۆ اتاپ وتكەندەي, «ۇلتتىق دامۋ جوسپارى», «وڭىرلىك دامۋ جوسپارى», سونداي-اق «ۇلتتىق قاۋىپسىزدىك ستراتەگياسى» ورتالىق جانە وڭىرلىك دەڭگەيلەردە مەملەكەتتىك اپپاراتتىڭ ماقساتتارى مەن مىندەتتەرىن ايقىندايتىن بولادى.
اۋماقتىق دامۋ جوسپارى ەلدەگى ءاربىر ءوڭىردىڭ باسەكەلىك ارتىقشىلىقتارىن اشۋعا باعىتتالادى. سونداي-اق جوبالىق تاسىلگە سايكەس بارلىق سيپاتتامالارى بار ۇلتتىق جوبالار قۇرالى ەنگىزىلەتىن بولادى.
ەكىنشى دەڭگەيدەگى قۇجاتتار وڭىرارالىق ماسەلەلەر بويىنشا دا, سالالار اراسىنداعى ماسەلەلەر بويىنشا دا جۇرگىزىلەتىن ساياساتتى ايقىندايتىن بولادى.
ءۇشىنشى دەڭگەيدەگى قۇجاتتار – ىسكە اسىرۋ قۇجاتتارى بولادى. مەملەكەتتىك ورگانداردىڭ, كۆازيمەملەكەتتىك ۇيىمداردىڭ دامۋ جوسپارلارى, وڭىرلەردى دامىتۋ جوسپارلارى جوعارىدا تۇرعان قۇجاتتاردىڭ مىندەتتەرىن ىسكە اسىرۋ جونىندەگى تەتىكتەردى كورسەتەدى. وسىلايشا, «قازاقستان – 2050» جالپىۇلتتىق باسىمدىقتارى مەن پايىمىن ورىنداۋعا توعىستىرىلاتىن ءۇش دەڭگەيدەگى بارلىق قۇجاتتار اراسىندا ناقتى ءوزارا بايلانىس ورناتىلادى.
«وسىعان بايلانىستى, ۇكىمەتتەن مەملەكەتتىك جوسپارلاۋ جۇيەسىن ۇكىمەت قاۋلىسى تۇرىندە بەكىتۋدى سۇرايمىز. جالپىۇلتتىق باسىمدىقتاردىڭ قۇرامىندا ءۇش باعىت بويىنشا (ينستيتۋتتار ساپاسى, ازاماتتاردىڭ ءال-اۋقاتى جانە كۇشتى ەكونوميكا) 10 نەگىزگى باسىمدىق بار. قازىرگى ۋاقىتتا جالپىۇلتتىق باسىمدىقتار بويىنشا پرەزيدەنت جارلىعى جوباسى مەملەكەتتىك ورگانداردا ماقۇلداۋدا جاتىر. ونى مەملەكەتتىك ورگانداردىڭ بەلگىلى ءبىر بولىگى ماقۇلدادى, قالعاندارىنان دا جاقىن ارادا قاراۋدى سۇرايمىز. جالپىۇلتتىق باسىمدىقتار تۋرالى جارلىق جوباسىن 2021 جىلعى 10 اقپانعا دەيىن قول قويۋعا ەنگىزۋ قاجەت دەپ سانايمىز», دەدى قايرات كەلىمبەتوۆ.
