بۇل تۋرالى «شىڭعا ورلەۋ» قوعامدىق قورى ديرەكتورىنىڭ ورىنباسارى نازىكۇل يسابەكوۆا «الماتى» تەلەارناسىنداعى «باستى نازاردا» باعدارلاماسىندا ايتتى.
«شىڭعا ورلەۋ» جوباسى از قامتىلعان جانە كوپبالالى وتباسىنان شىققان بالالاردىڭ ۋاقىتىن ءتيىمدى پايدالانۋ ماقساتىندا ۇيىمداستىرىلعان. كلۋبتا بالالار ءوز قالاۋى بويىنشا ءتۇرلى ۇيىرمەگە تەگىن قاتىسا الادى. ولاردىڭ قاتارىندا دومبىرا, شاحمات, ۆوكال, قولونەر, حورەوگرافيا ساباقتارى بار. سونداي-اق دەنە شىنىقتىرۋ جانە وزىندىك دايىندىق ساعاتتارى بار. جوبانىڭ ەرەكشەلىگى دە سول, بالالارعا وقىتۋشىلار رەتىندە ارداگەرلەر ۇيىندەگى قاريالار مەن مۇگەدەكتەر شاقىرىلادى. الايدا ولارعا قويىلاتىن ارنايى تالاپتار بار.
«وقىتۋشىلاردى جۇمىسقا قابىلداۋدا وزىندىك ەرەجەلەرى بار. ديپلومىن, جۇمىس تاجىريبەسىن قارايمىز. ەگەر بالالارعا ۇيرەتەر ونەرى بولسا, جۇمىسقا الامىز. بۇرىن وقىتۋشى بولعان ارداگەرلەر, مۋزىكانتتار, ارتىستەر تاربيە جۇمىستارىنا اتسالىسىپ جاتىر. بۇگىندە الماتى قالاسىندا 5 اۋدان بويىنشا 102 وقىتۋشىنى جۇمىسقا الدىق», دەدى ن.يسابەكوۆا.
قازىرگى كەزدە الماتى قالاسىنىڭ 5 اۋدانىندا اتالعان جوبا اياسىندا كلۋبتار جۇمىس ىستەۋدە. ەندى بوستاندىق, مەدەۋ, تۇركسىب اۋداندارىندا اشىلماق. ءبىر كلۋبقا 2 اۋىسىمعا ءبولىنىپ 60 وقۋشى كەلەدى. ولار تەگىن تاماقتانىپ, ۇيىرمەلەرگە قاتىسادى. سونىمەن قاتار ءۇي جۇمىستارىن ۇلكەندەردىڭ كومەگىمەن ورىندايدى. ن.يسابەكوۆا ۇيىرمە بالالارعا ۇناپ جاتقانىن ايتتى.
«شىڭعا ورلەۋ» جوباسى ءساتتى بولدى. ءبىرىنشى ماۋسىمعا قاتىسقان بالالار مەن اتا-انالار جوباعا العىستارىن ءبىلدىرىپ جاتىر. ەكىنشى لەكپەن دە قاتىسقىسى كەلەتىندەرىن ايتتى. الايدا ءبىز كەز كەلگەن بالانى ۇيىرمەگە جازا المايمىز, بىزگە ءتىزىمدى مەكتەپ اكىمشىلىگى بەرەدى», دەدى ن.يسابەكوۆا.
ايتا كەتەيىك, جوبا ەل بيۋدجەتىنەن قارجىلاندىرادى.
