بۇل كەشتە باستى پارتيالاردى مارينسكي تەاترىنىڭ ارتىستەرى – پريما-بالەرينا وكسانا سكوريك پەن سوليست ەۆگەني كونوۆالوۆ ورىندادى. استانالىق كورەرمەن سانكت-پەتەربوردان كەلگەن مەيمانداردى جىلى قابىلداپ, قويىلىم اياقتالعان سوڭ قوشەمەتىن ايامادى.
«رەپەرتۋارداعى سپەكتاكلدەرگە شەت ەلدىك ارتىستەردىڭ قاتىسۋى – كەز-كەلگەن تەاتردىڭ تاجىريبەسىندە بار. بىرىنشىدەن, كورەرمەندەرىمىز اتى اڭىزعا اينالعان مارينسكي تەاترى ارتىستەرىنىڭ ساحناداعى ويىنىن تاماشالاسىن, ولاردىڭ ونەرى كوز قۋانىشىنا اينالسىن دەگەن وي. سەبەبى, بۇل سپەكتاكلدى ۆاسيلي ۆاينونەن 1934 جىلى وسى تەاتردا قويعان. وسى قويىلىمنىڭ نۇسقاسى «استانا بالەت» تەاترىندا دا قويىلعان», دەپ اتاپ ءوتتى «استانا بالەت» تەاترىنىڭ كوركەمدىك جەتەكشىسى, رف ەڭبەك سىڭىرگەن ءارتىسى نۇرلان كانەتوۆ.
مارينسكي تەاترىنىڭ عالامات سوليستتەرى – وكسانا سكوريك پەن ەۆگەني كونوۆالوۆ, كلاسسيكالىق بيشىلەر. ايگىلى بالەت مەكتەبىنىڭ ءداستۇرىن ساقتاپ كەلە جاتقان ولار, ماشەنكا مەن ششەلكۋنچيك پارتياسىندا جوعارعى شەبەرلىك دەڭگەيى مەن ساحنالىق حاريزماسىن تانىتتى.
ەۆگەني كونوۆالوۆ – ەلوردامىزعا العاش كەلگەن ەكەن. ءارتىستىڭ ايتۋىنشا, كارانتين كەزىندەگى گاسترولدىك ساپار ەرەكشە قاستەرلى كورىنەدى.
«اكادەميادا ءبىلىم العان كەزدەن «ششەلكۋنچيكتە» بيلەپ كەلەمىن. باستاپقىدا كوردەبالەتتەگى شاعىن پارتيالاردى ورىنداپ, كەيىن تىشقان كورولىنىڭ پارتياسىن, يسپان ءبيىن جانە ت.ب. ورىندادىم. سوسىن بارىپ, حانزادانى سومداي باستادىم. مەن ءۇشىن «ششەلكۋنچيك» - ەڭ سۇيىكتى كلاسسيكالىق بالەتىم. ونى وسىنداي ادەمى ءارى زاماناۋي تەاتردا ورىنداعانىما ەرەكشە قۋانىشتىمىن. كورەرمەن قاۋىم وسى مەرەكەلىك اتموسفەرانى سەزىنىپ, سپەكتاكلدەن ءلاززات العان شىعار دەپ ۇمىتتەنەمىن», دەيدى مارينسكي تەاترىنىڭ ءسوليستى ەۆگەني كونوۆالوۆ.
ءۇمىت, جاقسىلىق پەن دارحاندىققا تولى ەرتەگىنىڭ عاجايىپ اتموسفەراسىن ماەسترو ارمان ورازعاليەۆتىڭ جەتەكشىلىگىدەگى سيمفونيالىق وركەستر تۋىنداتىپ وتىردى.
ايتا كەتۋ كەرەك, 30-قاڭتاردا ماشەنكا پارتياسىن «استانا بالەت» تەاترىنىڭ جەتەكشى ءسوليستى, قازاقستاننىڭ ەڭبەك سىڭىرگەن قايراتكەرى, كورەرمەننىڭ كوزايىمى – تاتيانا تەن ورىندايدى. ونىڭ ساحناداعى سەرىكتەسىن تەاتردىڭ جەتەكشى ءسوليستى, دارىندى ءارتىس سۇندەت سۇلتانوۆ سومدايدى.
رەسەي حالىق ءارتىسى التىناي اسىلمۇراتوۆا قويعان «ششەلكۋنچيك» سپەكتاكلىنە تەاتردىڭ ەرەسەك ارتىستەرى عانا ەمەس, قازاق ۇلتتىق حورەوگرافيا اكادەمياسىنىڭ وقۋشىلارى دا قاتىسادى. 2017 جىلى وتكەن پرەمەرادان كەيىن-اق, بۇل تۋىندى قالامىزدىڭ مادەني تىنىسىندا ايتۋلى قۇبىلىسقا اينالدى. مۇنى جىل سايىن كورسەتىلىمگە بيلەتتەردىڭ الدىن-الا ساتىلىپ, ۇنەمى انشلاگ بولۋىنان-اق اڭعارۋعا بولادى.
«ششەلكۋنچيك» بالەتىن ۇناتاتىن كورەرمەن قاۋىمدى قۇلاعدار ەتىپ قويايىق, 5 – 6 اقپاندا ايگىلى ەرتەگىنى «استانا بالەت» تەاترىنىڭ ساحناسىنان تاعى دا تاماشالاي الاسىز. ماشەنكا پارتياسىن تەاتردىڭ جەتەكشى سوليستتەرى – دارينا قايراشەۆا مەن انار دۇكيەۆا, ششەلكۋنچيكتى – ۋەسلي كارۆالو مەن سۇندەت سۇلتانوۆ سومدايدى.
