وقىس وقيعالاردان كەيىن جاۋاپتى مەكەمەلەر قاڭعىباس يتتەرگە قارسى كۇرەس شارالارىن جانداندىرا باستادى. ۇيرەنشىكتى ادەت. شي شىقپاي, شارا قولدانىلىپ, كوڭىل اۋدارىلا بەرمەيدى. ايتپەسە, كوكشەتاۋ قالاسىنىڭ شەتكى اۋداندارى تۇرماق, ورتالىعىنىڭ وزىندە قارعىباۋ تاعىلماعان, تۇمىلدىرىق كيگىزىلمەگەن يەسىز يتتەر ءۇيىر-ۇيىرىمەن قاڭعىپ ءجۇر.
– اۋىل تۇرعىندارىنا يتتەرىنە يە بولۋى كەرەكتىگى جونىندە الدەنەشە رەت ەسكەرتتىك. بۇل جولى مەكتەپتەن كەلە جاتقان ءىنىسىن قارسى الۋعا شىققان وقۋشى قىزعا قاڭعىرعان يتتەر باس سالعان, – دەيدى كراسنويار اۋىلى اكىمدىگىنىڭ باس مامانى جانات اۋباكىروۆ, – ادامعا اۋىز سالعان سوڭ قۇتىرعان دەپ كۇماندانۋعا دا ابدەن بولادى. قازىر ءمان-جاي مۇقيات تەكسەرىلۋدە.
شالعايداعى ەلدى مەكەندەردە بۇل ماسەلەنىڭ قانشالىقتى شەشىلىپ جاتقاندىعى بەلگىسىز. جامان ىندەت جايلاعالى قارعا ادىم جەر ۇزاپ شىعۋعا قايمىعاتىن اۋىل تۇرعىندارى «باس جارىلسا – بورىك, قول سىنسا جەڭ ىشىندە» دەپ جۇرە بەرۋلەرى دە مۇمكىن. وبلىستىق بالالار اۋرۋحاناسىنا بىلتىر يت قاپقان 156 بالا مەديتسينالىق كومەك الۋعا جۇگىنگەندىگى سونىڭ ايعاعى بولسا كەرەك. بيىلعى جىلى وسىنداي ءۇش وقيعا ورىن الىپ وتىر.
– كراسنويار اۋىلىنان جەتكىزىلگەن وقۋشى قىزعا العاشقى كومەك كورسەتىلدى. قۇتىرۋ اۋرۋىنىڭ الدىن الۋعا ەكپە ەگىلدى, – دەيدى تراۆماتولوگ دارىگەر سەرگەي ۆۋرتس.
دەگەنمەن يەسىز يتتەر تالاعان جۇزدەگەن بالانىڭ جۇرەگى شايلىعىپ, جۇيكەسىنە سالماق تۇسپەدى كىم ايتا الار؟! قازىر كوزى شالعانداردىڭ ايتۋىنا قاراعاندا, بۇرالقى «دوستاردىڭ» قالانىڭ جەكە سەكتورلارىندا, اسىرەسە كراسنويار اۋىلىنداعى بۇرىنعى ەت كومبيناتى, وبلىس ورتالىعىنداعى جايلاۋ جانە زاستانتسيوننىي شاعىن اۋداندارىندا تىم كوبەيىپ كەتكەندىگى بەلگىلى بولىپ وتىر. وكىنىشكە قاراي, تاياۋدا وسى شاعىن اۋدانداردا قاڭعىباس يتتەردىڭ ادامعا شابۋىل جاساۋىنىڭ ەكى وقيعاسى تىركەلىپتى.
– كوز بايلانا ۇيگە قايتىپ كەلە جاتقانىمدا, تايىنشاداي ەكى الاباي يت تاپ بەردى,– دەيدى قاڭعىباس يتتەن زارداپ شەككەن قالا تۇرعىنى تۇرار ماعزۇموۆ. – جان ۇشىرىپ قورعانۋعا تىرىستىم. مۇنداي جاعداي بىرنەشە رەت ورىن الدى. ءاربىر وقيعادان كەيىن ءتورت رەت شاعىمداندىم. بىراق ەشقانداي ناتيجە شىعاتىن ەمەس. كورشىلەرىمە دە «يت باقساڭ, يە بول» دەپ ەسكەرتكەنمىن. ولار دا جۇرت ءسوزىن ەسكەرەر ەمەس. ونىڭ ۇستىنە قاڭعىباس يتتەر قاپتاپ ءجۇر. ءتۇن تۇگىل, كۇندىز ۇيدەن شىعۋدان قالدىق. ءبارىمىز دە بالا-شاعا باعىپ وتىرمىز عوي.
– كراسنويار اۋىلىنداعى وقيعانىڭ ورنىنا بىردەن جەتتىك, – دەيدى قالالىق پوليتسيا باسقارماسىنىڭ ينسپەكتورى التىنبەك بۇكەنوۆ. – قاباعان يتتەردىڭ يەسىن تاۋىپ, اكىمشىلىك جاۋاپكەرشىلىككە تارتتىق.
بىراق مۇنىمەن ماسەلە تۇپكىلىكتى شەشىلە قويمايتىندىعى بەلگىلى. ەندىگى ارادا قالا اكىمدىگى قاڭعىباس يتتەردىڭ قاتەرىن قاپەرگە الىپ, ناقتى ءبىر شارا قولدانۋ قاجەت ءتارىزدى.
كوكشەتاۋ
