ەكپەنى ەڭ ءبىرىنشى بولىپ وبلىس اكىمىنىڭ ورىنباسارى ەرلان سپانوۆ, ايماقتىڭ باس سانيتارلىق دارىگەرى ەرمۇعانبەت داۋلەتباەۆ, دەنساۋلىق ساقتاۋ باسقارماسى باسشىسىنىڭ ورىنباسارى رۇستەم ايتباەۆ جانە وبلىستىق جەدەل جاردەم قىزمەتىنىڭ باس دارىگەرى يرينا شتەيگەرۆالد سالدىردى.
العاش ەكپە العانداردىڭ دەنى – ەمحانا قىزمەتكەرلەرى. ۆاكتسينا سالماس بۇرىن ولاردىڭ ارقايسى تەراپەۆت دارىگەردىڭ تەكسەرۋىنەن ءوتىپ, كەلىسىمىن الدى. پاتسيەنتتەر ەكپەدەن شىققان سوڭ, ارنايى كابينەتكە كىرىپ, جارتى ساعات مامانداردىڭ باقىلاۋىندا وتىردى.
جالپى, ەكى اپتا بويى ەپيدەميالىق جاعدايى كۇرت تومەندەپ «قىزىلعا» ورانعان قوستاناي وبلىسى اقپاننىڭ العاشقى كۇنى اۋپىرىمدەپ بارىپ «جاسىل» ايماققا قايتا اۋىسقان. وڭىردە پاندەميا باستالعالى ىندەت جۇقتىرعان جۇرتتىڭ سانى 10 مىڭنان اسىپ كەتتى. وبلىس اكىمدىگى جانىنان جۇمىس ىستەپ جاتقان جەدەل اقپارات ورتالىعىنىڭ مالىمەتىنشە, 2020 جىلعى 03 ساۋىردەن بيىلعى 31 قاڭتارعا دەيىنگى ارالىقتا COVID-19-دىڭ 10309 جاعدايى تىركەلىپ, 8811 ناۋقاس ەمدەلىپ شىققان.
وتكەن اپتانىڭ اياعىندا قوستانايعا كورونوۆيرۋسقا قارسى 1200 ەكپە ۆاكتسينا جەتكىزىلگەن. وبلىستىق دەنساۋلىق ساقتاۋ باسقارماسى كەلگەن جۇكتى قابىلداپ الىپ, وڭىردەگى ەكپە جۇمىستارىنا تارتىلعان بارلىق ەمحانالارعا تاراتىپ بەرگەنى تۋرالى ءمالىم ەتتى.
اتالعان باسقارماعا قاراستى ءدارى ساياساتى ءبولىمىنىڭ جەتەكشىسى گۇلنار وسپانوۆانىڭ ايتۋىنشا, ايماق تۇرعىندارىنا كورونوۆيرۋسقا قارسى ۆاكتسينا تەگىن ءارى ەرىكتى تۇردە ەگىلەدى. ەكپە قابىلداعىسى كەلمەگەندەر جازباشا تۇردە باس تارتۋى ءتيىس. ال 18 جاسقا تولماعان جاسوسپىرىمدەر مەن 65 جاستان اسقان قارت ادامدارعا ۆاكتسينا سالىنبايدى.
وڭىردەگى COVID-19-عا قارسى ەكپە جۇمىستارى كەزەڭ-كەزەڭىمەن جۇزەگە اسىرىلماق. اقپاننىڭ العاشقى كۇنى دەنساۋلىق ساقتاۋ سالاسىنىڭ قىزمەتكەرلەرى ەكپە سالدىرا باستادى. ودان كەيىن اراعا 21 كۇن سالىپ ناۋرىز ايىندا مۇعالىمدەرگە كەزەك كەلەدى. ال ءساۋىر ايىنىڭ باسىندا جاپپاي تەگىن ەكپە باستالادى. بۇل كەزەڭدە اركىم ءوز قالاۋى بويىنشا ۆاكتسينا سالدىرتا الادى. ال كورونوۆيرۋس جۇقتىرىپ, ءبىر اۋناپ شىققاندار ىندەتتەن ايىققان سوڭ التى اي وتكەن سوڭ عانا ەكپە جاساتا الادى.
