وسى جىلدارى وبلىس, اۋدان ءتىپتى قاجەت بولعان جاعدايدا شاعىن قالا تيپتەس كەنتتەردىڭ وزىندە گازەتتىڭ «جەرگىلىكتى ءتىلشىسى» دەيتىن اتپەن قالامى جۇيرىك, جازۋ-سىزۋعا بەيىم كوممۋنيست نەمەسە كومسومول مۇشەلەرى قىزمەت اتقارعان. سونىڭ ءبىرى – بۇگىنگى تاڭدا سەكسەننىڭ سەڭگىرىنە شىعىپ وتىرعان قارت قالامگەر – امانتاي كاكەن. بۇل كىسى ۇلتتىق قاۋىپسىزدىك سالاسىنىڭ اردەگەرى بولا تۇرا, حالقىمىزدىڭ باستان كەشكەن نالالى كۇندەر مەن زۇلماتتى جىلداردىڭ جان اۋىرتار جاڭعىرىعىن ارحيۆتىك قۇجاتتار نەگىزىندە جاسقانباي جازىپ جۇرگەن جاقسى اعامىز.
جوعارىدا ايتقانىمىزداي امانتاي عازەز ۇلىنا 1966 جىلى 31 جەلتوقسان كۇنى «سوتسياليستىك قازاقستان» گازەتىنىڭ «تسەلينوگراد وبلىسى بويىنشا جەرگىلىكتى ءتىلشىسى» دەيتىن كۋالىك بەرىلىپتى. ءوزىنىڭ ايتۋى بويىنشا, بۇل مارتەبە ەكىنىڭ بىرىنە بۇيىرا بەرمەيدى. بۇنداي كۋالىكتى الۋ ءۇشىن اۋەلى جەرگىلىكتى وبكوم مەن اتقارۋ كوميتەتى كەپىلدىك بەرەدى ەكەن.
اعامىزدىڭ بۇل كۋالىككە قول جەتكىزۋىنە سول تۇستا گازەتتىڭ تىڭ ولكەسىندەگى مەنشىكتى ءتىلشىسى وراقباي سماعۇلوۆتىڭ دا اسەرى بارى انىق. ويتكەنى اقسۋ كەنىشىندە ەلەكتريك بولىپ جۇرگەن قوعام بەلسەندىسى امانتاي كاكەنوۆ بىردە وندىرىستە تەحنيكا قاۋىپسىزدىگى ەرەجەلەرىنىڭ قاتاڭ ساقتالماعاندىعىنان جانە باسشى ينجەنەر-تەحنيك قىزمەتكەرلەرىنىڭ ورالىمسىزدىعىنان كارەردە تەحنوگەندىك اپاتقا جول بەرىلىپ, تەحنيكالىق قۇرال-جابدىقتار كەن ورنىنداعى زابويدا سۋ استىندا قالىپ قويعانى تۋرالى وراق اعاسىنا تەلەفون ارقىلى حابارلاپ, وسى ماسەلە جايلى ورتالىق گازەتكە ماقالا جازعىسى كەلەتىنىن ايتادى.
ارادا ءبىر كۇن وتكەندە ورەكەڭ ءوزى كەلىپ, جاعدايدى كوزىمەن كورگەن سوڭ ىنىسىنە «جاز» دەپ لەپەس تاستايدى. ءسويتىپ, «سوتسياليستىك قازاقستاننىڭ» 1963 جىلعى 31 تامىز كۇنگى سانىنا «جاۋاپكەرشىلىك قايدا؟» دەگەن اتپەن سىن ماقالا جارىق كورەدى. ول تۇستا گازەتتىڭ بەدەلى بەس باتپان. ونەركاسىپ-وندىرىستىك پارتيا كوميتەتىنىڭ سەكرەتارى س.كراسنوستانوۆ: «ا.كاكەنوۆ جازعان سىن ماقالانى ارنايى تالقىلادىق, اۆتور كەن كارەرىنىڭ جۇمىسىندا ەلەۋلى كەمشىلىكتەر ورىن الىپ وتىرعاندىعىن دۇرىس كورسەتكەن. تەكسەرۋدە گازەتتە كورسەتىلگەن فاكتىلەر انىقتالدى. ورىن العان كەمشىلىكتەردى الداعى ۋاقىتتا بولدىرماۋ ءۇشىن ناقتى شارالار بەلگىلەندى» دەپ شىرىلداپ جاۋاپ جازىپتى («سوتسياليستىك قازاقستان», 28.11.1963).
ءسويتىپ, قالامىن قانداپ, ماقالا جازۋ ىسىنە قۇلاعىمەن ءىن قازعان قارساقتاي دانىككەن جەرگىلىكتى ءتىلشى كەشىكپەي تسەلينوگراد وبلىسى ەرەيمەنتاۋ اۋدانى «ولەڭتى» سوۆحوزىنىڭ اتاقتى جىلقىشىسى قاپپاس جانيەۆ جايلى وچەرك جازادى. بۇل دا جارىق كورەدى. ونسىز دا ەڭبەگى ورگە ءجۇزىپ تۇرعان جىلقىشى 1966 جىلى 20 ناۋرىزدا سوتسياليستىك ەڭبەك ەرى اتانادى.
كەزىندە «تىڭ ولكەسى» گازەتىن باسقارعان, كەيىن «سوتسياليستىك قازاقستان» باسىلىمىندا رەداكتوردىڭ ورىنباسارى بولعان ساپارجان حايداروۆ 1976 جىلى جارىق كورگەن «جۇرەك سىزى» اتتى وچەركتەر مەن پۋبليتسيستيكالىق ماقالالار جيناعىنىڭ 9-بەتىندە: «تسەلينوگراد وبلىسى «ولەڭتى» سوۆحوزى ايگىلى شارۋاشىلىقتىڭ ءبىرى. سوۆحوزدىڭ تابىسىنا ق.جانيەۆ باستاعان جىلقىشىلار قوماقتى ۇلەس قوسىپ كەلەدى. سوعان وراي 1966 جىلى جىلقىشىلاردىڭ ەرەن ەڭبەگى جوعارى باعالاندى. سول قۋانىش تۇسىنداعى ساتتەر جەرگىلىكتى جۋرناليست امانتاي كاكەنوۆ داپتەرىنە ءتۇستى. ءبىز ول جازبانى تۇگەل قابىلدادىق» دەپ تاڭبالاپ جازىپتى. قىزىق بولعاندا وراقباي سماعۇلوۆ ءوزىنىڭ ورنى مەنشىكتى تىلشىلىككە امانتاي اعامىزدى دايىنداپ, ەندى مىنە-مىنە دەپ تۇرعاندا ابەكەڭدى مەملەكەتتىك قاۋىپسىزدىك سالاسى «جۇلىپ» اكەتكەن.
