سقو دەنساۋلىق ساقتاۋ باسقارماسىنىڭ مالىمەتىنشە, وڭىردە 17 پۋنكت COVID-19-عا قارسى ۆاكتسينا ەگۋگە دايىندالعان. ونىڭ تورتەۋى پەتروپاۆلدا, قالعاندارى اۋدان ورتالىقتارىندا ورنالاسقان. وسىلايشا تەك اقپان ايىندا عانا ءوڭىردىڭ مىڭنان استام تۇرعىنىنا ەكپە ەگىلمەك. ءبىرىنشى كەزەكتە ۆاكتسينانى مەديتسينا قىزمەتكەرلەرى الادى.
«سقو-دا كوروناۆيرۋس ينفەكتسياسىنا قارسى ۆاكتسيناتسياعا دايىندىق قىزۋ جۇرگىزىلىپ جاتىر. بارلىق ەمحانالاردا ۆاكتسيناتسيا پۋنكتەرى اشىلدى. مەديتسينا قىزمەتكەرلەرى تولىق دايىندىقتان ءوتتى. رەسەيلىك «سپۋتنيك V» ۆاكتسيناسى ەگىلمەك», دەيدى سقو دەنساۋلىق ساقتاۋ باسقارماسىنىڭ ءبولىم باسشىسى اسەم قانعوجينا.
سقو-دا ءبىر اپتانىڭ ىشىندە كوروناۆيرۋستى جۇقتىرعاندار سانى 1,7 ەسە ارتتى.
ينفەكتسيالىق ستاتسيونارلار بۇگىندە 45 %-عا تولعان. جالپى وبلىستا كۆي جۇقتىرۋدىڭ 10658 جاعدايى تىركەلدى. 9700-دەن استام ادام جازىلىپ شىقسا, 42 ادام قايتىس بولدى.
