ادامدار باعىمىزعا بۇيىرعان جەرىمىزگە قانشالىقتى جاۋاپتى ەكەنىمىزدى ءالى دە تۇسىنبەي كەلەدى. الىسقا بارماي-اق, بىلتىر ەلوردانىڭ شەتىندە كوبەيتۇز كولىنە قاتىستى ماسەلەنى مىسالعا كەلتىرسەك جەتكىلىكتى. بۇل ورايدا قوعامنىڭ ەكولوگيالىق ءبىلىمىن تەرەڭدەتۋ ءۇشىن جاپپاي تانىمدىق ءىس-شارالاردى ۇيىمداستىرۋدى جولعا قويعان ارتىق بولماس دەپ ويلايمىن. تۇتاستاي بۇل باعىتتاعى اعارتۋشىلىق جۇمىستى ءبىلىم وردالارىنان باستاپ, جەكەلەگەن كومپانيالاردا جۇرگىزگەنى ابزال. البەتتە, تاربيە تال بەسىكتەن باستالادى. سوندىقتان تابيعاتىمىزدى ايالاۋدى, اسىرەسە, جاستاردىڭ بويىنا جاستايىنان سىڭىرگەن دۇرىس. ويتكەنى «ۇيادا نە كورسەڭ, ۇشقاندا سونى ىلەسىڭ» دەپ بەكەر ايتىلماسا كەرەك. بۇل رەتتە ەكولوگتەر بولسىن, قوعام بەلسەندىلەرى, تۇتاستاي اينالامىزدا بولىپ جاتقان قۇبىلىستارعا بەيجاي قارامايتىن ازاماتتار جەر پلانەتاسى ءبىزدىڭ ورتاق ءۇيىمىز ەكەنىن جان-جاعىنداعى ادامدارعا ءتۇسىندىرۋى ءتيىس. تۇسىنەمىن, بۇل ۇران رەتىندە ەستىلۋى مۇمكىن. الايدا بۇل ماسەلەگە ءمان بەرىپ, دۇرىستاپ نازار اۋدارىلسا ەكەن دەيمىن. ءالى ەسىمدە, مەكتەپتە وقىعاندا «جاس ناتۋراليستەر» ۇيىرمەسى بولاتىن. وندا مۇعالىمدەرىمىز بالالاردى ارنايى مەكەمەلەرگە اپارىپ, كەز كەلگەن وسىمدىكتەردى قالاي كۇتىپ, ءوسىرۋ كەرەكتىگى جايلى ساباقتار جۇرگىزەتىن. وسىلايشا, جاس بالانىڭ تۇسىنىگىندە قورشاعان ورتاعا قاتىستى كوزقاراسى قالىپتاسىپ, جاستايىنان الەۋمەتتىك جاۋاپكەرشىلىگى قالىپتاسادى.
اسەل يسانوۆا,
«تامىر» جابايى تابيعاتتاعى مەكتەبىنىڭ نەگىزىن قالاۋشى, ەكولوگيالىق بەلسەندى
