قازاقستاندا قارجىلىق مونيتورينگ اگەنتتىگى قۇرىلدى

قازاقستان • 28 قاڭتار، 2021

قازاقستاندا قارجىلىق مونيتورينگ اگەنتتىگى قۇرىلدى

4 رەت كورسەتىلدى

مەملەكەت باسشىسى قاسىم-جومارت توقاەۆتىڭ قازاقستان رەسپۋبليكاسىنىڭ مەملەكەتتىك باسقارۋ جۇيەسىن ودان ءارى جەتىلدىرۋ جونىندەگى شارالار تۋرالى جارلىعى شىقتى.

اقمارال اعزامقىزى

قازاقستان رەسپۋبليكاسى كونستيتۋتسياسىنىڭ 44-بابىنىڭ 5) تارماقشاسىنا سايكەس كولەڭكەلى ەكونوميكاعا قارسى ءىس-قيمىلدىڭ تيىمدىلىگىن ارتتىرۋ ماقساتىندا قاۋلى ەتەمىن:

1. قازاقستان رەسپۋبليكاسىنىڭ پرەزيدەنتىنە تىكەلەي باعىناتىن جانە ەسەپ بەرەتىن مەملەكەتتىك ورگان رەتىندە قازاقستان رەسپۋبليكاسىنىڭ قارجىلىق مونيتورينگ اگەنتتىگى (بۇدان ءارى – اگەنتتىك) قۇرىلسىن، وعان قازاقستان رەسپۋبليكاسى قارجى مينيسترلىگىنىڭ قىلمىستىق جولمەن الىنعان كىرىستەردى زاڭداستىرۋعا (جىلىستاتۋعا) جانە تەرروريزمدى قارجىلاندىرۋعا قارسى ءىس-قيمىل سالاسىنداعى، سونداي-اق ەكونوميكالىق جانە قارجىلىق قىلمىستار مەن قۇقىق بۇزۋشىلىقتاردىڭ الدىن الۋ، ولاردى انىقتاۋ، جولىن كەسۋ، اشۋ جانە تەرگەپ-تەكسەرۋ بويىنشا فۋنكتسيالارى مەن وكىلەتتىكتەرى بەرىلسىن.

2. اگەنتتىك بەرىلەتىن فۋنكتسيالار مەن وكىلەتتىكتەر شەڭبەرىندە قازاقستان رەسپۋبليكاسى قارجى مينيسترلىگىنىڭ قۇقىقتارى مەن وكىلەتتىكتەرىنىڭ قۇقىقتىق ميراسقورى بولىپ ايقىندالسىن.

3. «قازاقستان رەسپۋبليكاسى پرەزيدەنتىنىڭ اكىمشىلىگى تۋرالى ەرەجەنى بەكىتۋ تۋرالى» قازاقستان رەسپۋبليكاسى پرەزيدەنتىنىڭ 2008 جىلعى 11 ناۋرىزداعى № 552 جارلىعىنا (قازاقستان رەسپۋبليكاسىنىڭ ءپۇاج-ى، 2008 ج.، № 12-13، 116-قۇجات) مىناداي تولىقتىرۋ ەنگىزىلسىن:

جوعارىدا اتالعان جارلىقپەن بەكىتىلگەن قازاقستان رەسپۋبليكاسىنىڭ پرەزيدەنتىنە تىكەلەي باعىناتىن جانە ەسەپ بەرەتىن مەملەكەتتىك ورگانداردىڭ تىزبەسى مىناداي مازمۇنداعى جولمەن تولىقتىرىلسىن:

«قازاقستان رەسپۋبليكاسىنىڭ قارجىلىق مونيتورينگ اگەنتتىگى».

4. قازاقستان رەسپۋبليكاسى پرەزيدەنتىنىڭ اكىمشىلىگى:

1) قازاقستان رەسپۋبليكاسى پرەزيدەنتىنىڭ قاراۋىنا:

اگەنتتىك توراعاسىمەن بىرلەسىپ، اگەنتتىك جانە ونىڭ قۇرىلىمى تۋرالى ەرەجە جوبالارىن;

قازاقستان رەسپۋبليكاسىنىڭ ۇكىمەتىمەن بىرلەسىپ، قازاقستان رەسپۋبليكاسى قارجى مينيسترلىگىنىڭ جانە ءتيىستى ۆەدومستۆولىق باعىنىستاعى ۇيىمنىڭ شتات سانىن اگەنتتىككە قايتا ءبولۋ جونىندە ۇسىنىستار ەنگىزسىن;

2) وسى جارلىقتى ىسكە اسىرۋ بويىنشا وزگە دە شارالاردى قابىلداسىن.

5. قازاقستان رەسپۋبليكاسىنىڭ ۇكىمەتى:

1) قازاقستان رەسپۋبليكاسى پرەزيدەنتىنىڭ اكىمشىلىگىمەن كەلىسۋ بويىنشا قازاقستان رەسپۋبليكاسى قارجى مينيسترلىگىنىڭ جانە ءتيىستى ۆەدومستۆولىق باعىنىستاعى ۇيىمنىڭ شتات سانىن قايتا ءبولۋدى;

2) وسى جارلىقتى ىسكە اسىرۋ بويىنشا وزگە دە شارالاردى قابىلداۋدى قامتاماسىز ەتسىن.

6. وسى جارلىقتىڭ ورىندالۋىن باقىلاۋ قازاقستان رەسپۋبليكاسى پرەزيدەنتىنىڭ اكىمشىلىگىنە جۇكتەلسىن.

7. وسى جارلىق قول قويىلعان كۇنىنەن باستاپ قولدانىسقا ەنگىزىلەدى.

قازاقستان رەسپۋبليكاسىنىڭ

پرەزيدەنتى ق.توقاەۆ

نۇر-سۇلتان، اقوردا، 2021 جىلعى 28 قاڭتار

№ 501

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز