وكىنىشكە وراي, الماتى قالاسىندا ونكولوگيالىق ناۋقاستار سانى 2019 جىلمەن سالىستىرعاندا 1733-كە ادامعا كوبەيگەن. وتكەن جىلى بۇل كورسەتكىش 14546 ناۋقاستى قۇراسا, 2019 جىلى 12813 ناۋقاس ەمدەلدى. 2020 جىلعى كورسەتكىشتەر بويىنشا قاتەرلى ىسىكتىڭ ەڭ كوپ تارالعان ءتۇرى – ءسۇت بەزى قاتەرلى ىسىگى, ودان كەيىنگى ورىنداردا ىشەك پەن اسقازان قاتەرلى ىسىكتەرى.
«الماتى ونكولوگيالىق ورتالىعىنىڭ حيرۋرگتارى اپتاسىنا 45-55 وتا جاسايدى. ماسەلەن, وتكەن جىلى 2514 وتا جاسالعان. ولاردىڭ ىشىندە كەۋدە قۋىسى, ءىش, ونكوۋرولوگيا, باس جانە مويىن ىسىكتەرىنە ارنالعان وتالار بار. ولاردىڭ 40% ءينۆازيۆتى, ياعني لاپاروسكوپيالىق جولمەن جاسالاتىن وتالار», - دەيدى ونكوحيرۋرگيا ءبولىمىنىڭ مەڭگەرۋشىسى نۇرلان بالتاەۆ.
بۇگىندە الماتىلىق ماماندار ىسىكتى جويۋ وتالارىن جاساپ قانا قويماي, اناتوميالىق اقاۋلاردى پلاستيكالىق جولمەن جويۋدى جۇزەگە اسىرىپ ءجۇر. ماسەلەن, بىلتىر ءتىلدىڭ ءتۇبىرىنىڭ قاتەرلى ىسىگى دياگنوزى قويىلعان ناۋقاسقا وتا ۇستەلىندە اناتوميالىق اقاۋلاردى پلاستيكالىق جولمەن جويا وتىرىپ, كۇردەلى وتا جاسالىندى. وتالاۋ بينوكۋليارلىق وپتيكا استىندا 7 ساعاتقا سوزىلدى. كولەمى 20 سم بولعان ىسىكتى دارىگەرلەر تەرىمەن بىرگە الىپ تاستادى. وتا ءساتتى ءوتىپ, ناۋقاس قازىرگى ۋاقىتتا تەك سويلەي عانا ەمەس, سونىمەن قاتار وزدىگىنەن تاماقتانا الادى.
