جاڭا زاۋىت الداعى ءساۋىر ايىنان باستاپ ءوزىنىڭ وندىرىستىك تولىق قۋاتىنا شىعادى ەكەن. ياعني كاسىپورىن جىلىنا Yutong ماركالى 1 200 اۆتوبۋس پەن 400 بىرلىك ارنايى تەحنيكا مەن ارنايى كولىك شىعارۋدى جوسپارلاپ وتىر. كاسىپورىن باسشىسى, «QazTehna» جشس ديرەكتورى ارعۇلان مايكونوۆ زاۋىتتىڭ قازىردىڭ وزىندە تاپسىرىسپەن قامتاماسىز ەتىلگەنىن ايتادى.
– ماڭىزدى جوبا جوسپارداعى كەستەگە ساي جۇزەگە اسىرىلۋدا. قازىر ەكىنشى تسەحتى قايتا قۇرۋ جۇمىستارى قارقىندى جۇرگىزىلۋ ۇستىندە. ونى وسى جىلدىڭ ءساۋىر ايىندا ىسكە قوسۋدى جوسپارلاپ وتىرمىز. سوندا 600-گە جۋىق اۆتوبۋس شىعارىپ, وتكىزۋ ويدا بار. زاۋىت وسىنداي كولەمدى يگەرە الادى, – دەپ اتاپ ءوتتى ا.مايكونوۆ.
كاسىپورىن كۇشىنە مىنگەن ۋاقىتتا ونداعى جۇمىسشىلار سانى 1 مىڭنىڭ شاماسىندا بولادى دەگەن بولجام بار.
قاراعاندى وبلىسى,
ساران قالاسى
