ەل پرەزيدەنتى ءوز سوزىندە جىل سايىن بولىنەتىن 50 مىڭ گرانت قاجەتتى ماماندىقتار سۇرانىسىنا سايكەس كەلمەيتىنىنە نازار اۋداردى. بۇل ولقىلىق بيۋدجەت قارجىسىنىڭ بوسقا كەتۋىنە اكەلىپ سوعادى. مەملەكەت قارجى سالۋعا قىزىعۋشىلىق تانىتاتىن ماماندىقتاردى تاڭداۋ ماسەلەسى بارعان سايىن كۇردەلەنە تۇسۋدە. ءبىر جاعىنان, كوپ جاعدايدا بالالارىن وقىتۋ ءۇشىن اقشا تولەيتىن اتا-انالاردىڭ ءداستۇرلى تاسىلدەرى بار. ەكىنشى جاعىنان, ەڭبەك نارىعىنىڭ قۇرىلىمى تەز وزگەرىپ, جاڭا, كەيدە تۇسىنىكسىز بولىپ كورىنەتىن ماماندىقتارعا سۇرانىستىڭ ارتۋى بايقالادى. سونىڭ سالدارىنان ءبىز ۋنيۆەرسيتەتتەر ۇسىناتىن مامانداردىڭ ۇلتتىق ەكونوميكانىڭ ناقتى قاجەتتىلىكتەرىنە سايكەس كەلمەۋ پروبلەماسىنا تاپ بولدىق. ءداستۇرلى كاسىپتەردە دە ماماندار تاپشىلىعى بايقالادى. بۇعان پاندەميا كەزىندە سۇرانىسقا يە بىرقاتار ماماندىق بويىنشا مەديتسينا قىزمەتكەرلەرىنىڭ جەتىسپەۋشىلىگى سەزىلگەندىگى ايعاق.
مەملەكەت باسشىسىنىڭ ۇكىمەت الدىنا قويعان تاعى ءبىر مىندەتى – قازاقستاندىق جوعارى ءبىلىمنىڭ جوعارى ساپاسىن قامتاماسىز ەتەتىن شەشۋشى شارالاردى قابىلداۋ. بۇعان دەيىن ساپاسىز ءبىلىم بەرۋ قىزمەتىن ۇسىناتىن ۋنيۆەرسيتەتتەردى جابۋ تۋرالى شەشىم قابىلدانعان بولاتىن. الايدا پروتسەسس باياۋ جۇرۋدە. «كەيبىر ۋنيۆەرسيتەتتەر ءارتۇرلى پروتسەدۋرالىق ارەكەتتەردى قولدانا وتىرىپ, جابىلۋ پروتسەسىن ءبىر جارىم جىلعا دەيىن «سوزادى» جانە وسى باعىتتاعى ءبىلىم جانە عىلىم مينيسترلىگىنىڭ شەشۋشى قادامدارىنا قارسى تۇتاس اقپاراتتىق ناۋقان ءجۇرىپ جاتىر», دەپ اتاپ ءوتتى مەملەكەت باسشىسى. ۇلتتىق ستاتيستيكاعا سايكەس, سوڭعى ءۇش جىلدا ەلدەگى ۋنيۆەرسيتەتتەردىڭ سانى ازايۋدىڭ ورنىنا, 122-دەن 125-كە دەيىن وسكەن. بۇل رەتتە ەل پرەزيدەنتى ۇكىمەتكە ءتيىستى شارالاردى قابىلداۋ, سونىڭ ىشىندە اكادەميالىق ادالدىقتى بۇزۋشىلىق پەن سىبايلاس جەمقورلىق قۇقىق بۇزۋشىلىقتارعا قاتىستى ۋنيۆەرسيتەتتەردىڭ جاۋاپكەرشىلىگىن ودان ءارى كۇشەيتۋ, ءتىپتى ليتسەنزيادان ايىرۋعا دەيىنگى شارالاردى قابىلداۋ تۋرالى تاپسىرمالار بەردى.
وسى ماڭىزدى ماسەلەلەردىڭ بارلىعىن ۇكىمەت جاڭا وقۋ جىلى باستالعانعا دەيىن شەشۋى كەرەك. 1 شىلدەگە دەيىن ۇكىمەت قارجىلاندىرۋدىڭ تاسىلدەرى, كەزەڭدەرى مەن كولەمدەرى كورسەتىلگەن ەگجەي-تەگجەيلى جول كارتاسىن ازىرلەپ, ۇسىنادى.
زارەما شاۋكەنوۆا,
پرەزيدەنت جانىنداعى قازاقستان ستراتەگيالىق زەرتتەۋلەر ينستيتۋتىنىڭ ديرەكتورى
