كوللاجدى جاساعان قونىسباي شەجىمباي, «ەQ»
يناكتيۆتى ۆاكتسينانىڭ پلاتفورماسى قاۋىپسىز بولىپ سانالادى. حالىقتىڭ كوپشىلىگى ۆاكتسينانىڭ قۇرامىنداعى كومپونەنتتەردى باسقا دا ۆاكتسينالار ارقىلى بۇعان دەيىن دە قابىلداعان. QazCovid-in پرەپاراتىن ازىرلەۋ بارىسىندا پايدالانىلعان جالعىز جاڭا كومپونەنت – بەلسەندى ەمەس ۆيرۋس.
«يناكتيۆتى ۆاكتسينانى دايىنداۋ تەحنولوگياسى قاراپايىم. بۇل باسقا ۆاكتسينالارعا قاراعاندا قاۋىپسىز ءارى ءتيىمدى اسەر ەتەدى. ۆاكتسينانى ەگۋ ناتيجەسىندە مىقتى يممۋنيتەت قالىپتاسادى. مىسالى, اۋىرىپ, كەيىن ساۋىققان ادامدا پايدا بولاتىن يممۋنيتەتپەن سالىستىرۋعا بولادى. يناكتيۆتى ۆاكتسينانى دايىنداۋ ءۇشىن پايدالانىلعان كومپونەنتتەردىڭ باسىم بولىگى ونداعان جىلدار بويى عىلىمي تۇرعىدا پايدالانىلىپ كەلەدى. ونىڭ زيانى بولماعان. سوندىقتان ءبىز QazCovid-in ازىرلەۋ ءۇشىن ۆاكتسينانىڭ يناكتيۆتى ءتۇرىن تاڭدادىق», دەدى بيولوگيالىق قاۋىپسىزدىك عىلىمي-زەرتتەۋ ينستيتۋتىنىڭ جەتەكشى عالىمى, ۆيرۋسولوگ, دوكتور, پروفەسسور لەسپەك كۇتىمبەتوۆ.
بۇعان دەيىن ۆاكتسينانى ازىرلەگەن عالىمدار, ءبىلىم جانە عىلىم ءمينيسترى اسحات ايماعامبەتوۆ, قازاقستان رەسپۋبليكاسى پرەزيدەنتىنىڭ كومەكشىسى ەرلان قارين, جامبىل وبلىسىنىڭ اكىمى بەردىبەك ساپارباەۆ جانە س.اسفەندياروۆ اتىنداعى قازاق ۇلتتىق مەديتسينا ۋنيۆەرسيتەتىنىڭ رەكتورى تالعات نۇرعوجين كلينيكالىق زەرتتەۋلەردەن تىس, ەرىكتى تۇردە وتاندىق ۆاكتسينانى سالدىرعان بولاتىن.
