كەزدەسۋدى سەناتور, كوميتەت توراعاسى مۇرات باقتيار ۇلى جۇرگىزىپ وتىردى.
مادەنيەت جانە سپورت ءمينيسترى اقتوتى رايىمقۇلوۆا دەپۋتاتتاردىڭ ساۋالدارىنا جاۋاپ بەرە كەلىپ, ەلىمىزدىڭ كىتاپ قورى مەن كىتاپ قويمالارىنىڭ جاي-كۇيى, سونداي-اق كىتاپحاناشىلار مەن مۇراعات قىزمەتكەرلەرىنىڭ جالاقىسى تۋرالى ەگجەي-تەگجەيلى ايتىپ بەردى.
سەناتور نۇرتورە ءجۇسىپ وسى ماسەلەگە بايلانىستى ەلىمىزدە ارحيۆتەردى دامىتۋعا جەتكىلىكتى كوڭىل بولىنبەيتىنىن, سوندىقتان ولاردىڭ جاعدايى قازىرگى زامانعى ستاندارتتارعا سايكەس كەلمەيتىنىن اتاپ ءوتتى. بۇل سالادا ماماندار جەتىسپەۋشىلىگى دە وتكىر ماسەلەگە اينالىپ وتىر.
سەناتور كىتاپحانالاردا ەرەكشە قاجەتتىلىكتەرى بار ادامدارعا قاجەتتى جاعدايلار جاسالماعانىنا نازار اۋداردى. «كوزى كورمەيتىن جانە ناشار كورەتىن ادامدارعا ارنالعان كىتاپحانالارعا ەرەكشە نازار اۋدارۋ قاجەت. 46,5 مىڭ زاعيپ جانە ناشار كورەتىن ازاماتتاردىڭ ەلىمىزدىڭ قوعامدىق-ساياسي ومىرىنە ارالاسۋ جانە لايىقتى ءبىلىم الۋ قۇقىقتارى شەكتەلمەۋى ءتيىس», دەدى ول.
جينالعاندار تاريحي ماڭىزدى قولجازبالاردىڭ, سيرەك باسىلىمدار مەن كىتاپتاردىڭ كوشىرمەلەرىن ىزدەۋ مەن ساتىپ الۋدى قارجىلاندىرۋدىڭ ماڭىزدىلىعى تۋرالى ايتتى. كەزدەسۋ سوڭىندا سەناتورلار مادەنيەت قىزمەتكەرلەرىنىڭ جالاقىسىن كوتەرۋ ماسەلەسىن قاراستىرۋ جانە سيرەك كىتاپتار مەن قولجازبالار ساقتالاتىن ۇلتتىق ورتالىق قۇرۋدى ۇسىندى.
