«Heart Rhythm» عىلىمي جۋرنالىندا سمارتفوندى جىلدام قۋاتتاۋ ءۇشىن ورناتىلعان MagSafe ماگنيتى كارديوستيمۋلياتوردىڭ جۇمىسىنا كەدەرگى كەلتىرۋىمەن قاتار, ونى ءوشىرۋى مۇمكىن دەگەن پىكىرلەر ايتىلدى.
گەنري فورد اتىنداعى جۇرەك-قان تامىرلارى ينستيتۋتىنىڭ عالىمدارى بىرقاتار ەكسپەريمەنت جۇرگىزىپ, ولاردىڭ بولجامدارى راستالدى. عالىمدار iPhone 12 سمارتفونىن Medtronic كارديوستيمۋلياتورى قويىلعان ناۋقاستىڭ كەۋدەسىنە جۇرەككە جاقىن ەتىپ ورنالاستىرعان. ناتيجەسىندە, iPhone تاراتقان ماگنيت ءورىسى كارديوستيمۋلياتوردى ءوشىردى.
ءبىر قىزىعى, 12-ءشى iPhone ءوندىرۋشىسىنىڭ ءوزى ونىڭ قاۋپى تۋرالى ەسكەرتىپ وتىر.
«iPhone-دا ماگنيتتەر مەن ەلەكتروماگنيتتىك ورىستەر شىعاراتىن كومپونەنتتەر بار. ولار مەديتسينالىق قۇرىلعىلاردىڭ جۇمىس ىستەۋىنە كەدەرگى كەلتىرۋى مۇمكىن», دەلىنگەن ءوندىرۋشىنىڭ رەسمي سايتىندا.
مەديتسينالىق قۇرىلعىلارعا كەدەرگى كەلتىرمەۋ ءۇشىن Apple كومپانياسى جاڭا iPhone قۇرىلعىسىن ولاردان الىس ۇستاۋعا كەڭەس بەرەدى.
ايتولقىن مىرزاكاريم
