«بيىل ەگەمەندىگىمىزگە 30 جىل تولعالى وتىر. وسى جىلدارى 1 ملن 70 مىڭ 300 ەتنيكالىق قازاق اتاجۇرتىنا ورالدى. ونىڭ سىرتىندا بۇكىل دۇنيەجۇزىلىك قاۋىمداستىعى قۇرىلدى. پرەزيدەنت قاسىم-جومارت توقاەۆتىڭ قولداۋىمەن شەتەلدەن اتامەكەنگە قايتقان ازاماتتاردىڭ مارتەبەسى ارتىپ, قانى ءبىر باۋىرلارىمىزدى «قانداستار» دەيتىن بولدىق. وسى كۇنى ول قانداستارىمىز ەكونوميكانىڭ ءار سالاسىندا جەمىستى قىزمەت ەتىپ جاتقانى دا راس», دەدى دەپۋتات عازيز قۇلاحمەتوۆ ۇكىمەت باسشىسى اسقار ءماميننىڭ اتىنا جولداعان ساۋالىندا.
دەپۋتات قۇجاتتارى جوق قانداستاردىڭ كوپتەگەن قيىندىققا تاپ بولاتىنىن اتاپ ءوتتى.
«جەكە قۇجاتتارىندا ۇلتى جازىلماعان قانداستارىمىزدىڭ الدى 9 جىل, سوڭى 2 جىل ارالىعىندا ازاماتتىق الا الماۋىنىڭ ناقتى سەبەبىن تۇسىندىرۋگە نە كەدەرگى. ولاردىڭ ءبارى بالالارىن مەكتەپكە بەرۋگە, دارىگەرلەرگە قاراتىپ, بالا-باقشاعا تىركەلۋ كەزىندە كوپ قيىندىقتاردىڭ بارىن اشىنىپ ايتىپ وتىر. ەلگە ورالعىسى كەلەتىن جانە ورالعان ازاماتتار وتباسىلارىنان اجىراپ, ەكى-ءۇش مەملەكەت تەرريتورياسىندا ءومىر سۇرۋگە ءماجبۇر ەكەنى دە اششى شىندىق. مۇنداي وتباسىلار رەسپۋبليكانىڭ ءار ايماعىندا بار دەسەك, قاتەلەسپەسپىز. ال, ولاردىڭ قازاقستاندا دۇنيەگە كەلىپ, بالالارىنىڭ قۇجاتتارىن راسىمدەمەگەنىن ەسكەرەتىن بولساق, تىركەۋدە جوق بۇلدىرشىندەردىڭ ناقتى ەسەبىن كىم ايتىپ بەرە الادى؟», دەدى عازيز قۇلاحمەتوۆ.
«وسى جاعدايدى ەسكەرە وتىرىپ, قر ىشكى ىستەر, سىرتقى ىستەر, ەڭبەك جانە حالىقتى الەۋمەتتىك قورعاۋ مينيسترلىكتەرى بىرلەسە وتىرىپ, ۆەدومستۆوارالىق كوميسسيادا تۋ تۋرالى كۋالىگى جوق, رەسمي تىركەۋدە جوق ازاماتتاردىڭ ناقتى سانىن انىقتاپ, ساۋالدا كورسەتىلگەن ازاماتتاردىڭ قۇجاتتاندىرۋ ماسەلەسىن قاراستىرۋدى جانە رەسمي ءتيىستى بارلىق شارالار قولدانىپ, قانداستارىمىزدىڭ وزگە دە پروبلەمالارىنا تەرەڭ بويلاپ, جان-جاقتى جاعداي جاساۋىڭىزدى سۇرايمىز!», دەدى ول.
