تۇركىستان وبلىسى پوليتسيا دەپارتامەنتىنە قاراستى ارىس اپب-ءنىڭ كەزەكشىلىك بولىمشەسىنە جەرگىلىكتى تۇرعىننان ارىز تۇسەدى. ارىزدانۋشى جايىلىمدىق جەردەگى 12 باس جىلقىسىنىڭ ۇشتى-كۇيلى جوعالىپ كەتكەنىن ايتادى. جوعالعان جىلقىلاردى تەز ارادا تابۋ ءۇشىن اۋداندىق پوليتسيا ءبولىمىنىڭ تاجىريبەلى پوليتسەيلەرىنەن بىرنەشە موبيلدىك توپ قۇرىلدى. ولار اۋىلدىڭ شىعار جەرلەرىن تەكسەرىپ, جىلقىلار جايىلاتىن ايماققا قاراي بىردەن باعىت الىپ ىزدەستىرۋدى باستاپ كەتەدى.
اۋىل-ايماقتىڭ بارلىق جايىلىمدىق جەرلەرىنە ءتىنتۋ جۇرگىزىپ, كورگەن-بىلگەن تۇرعىنداردان سۇراق-جاۋاپتار الادى, سونىمەن قاتار مال بازارلار مەن مال تاسىمالدايتىن كولىكتەر تىڭعىلىقتى تەكسەرىلەدى. ناتيجەسىندە, بىلىكتى پوليتسەيلەر التى شاقىرىم جەردەگى “كوككوپىر” دەپ اتالاتىن جازىق دالادان جىلقىلاردى ءبىر كۇننىڭ ىشىندە تاۋىپ, اۋىلعا ايداپ اكەلەدى. وسىلايشا جوعالعان ءبىر ءۇيىر باس جىلقى يەسىنە تاپسىرىلدى. جىلقىلار جوعالعان ساتتەن باستاپ جەدەل ارەكەت ەتىپ, ۇرى-قارىنىڭ قولىنا تۇسپەۋىنە سەپتىگى تيگەن پوليتسەيلەرگە جابىرلەنۋشىنىڭ ايتار العىسى شەكسىز.
– ءتارتىپ ساقشىلارى 12 باس جىلقىمدى كۇن-تۇنگە قاراماستان ىزدەستىرىپ, تاۋىپ بەردى. تاجىريبەلى پوليتسەيلەردىڭ ارقاسىندا جىلقىلارىم ءدىن امان تابىلىپ وتىر. پوليتسەيلەردىڭ شىن مانىندە جەدەل قىزمەت ەتەتىنىنە كوز جەتكىزدىم. العىسىم شەكسىز. قىزمەتتەرىڭ ابىرويمەنەن اسا بەرسىن. راحمەت سىزدەرگە, – دەگەن مال يەسى ساقشىلارعا ريزاشىلىعىن جەتكىزدى.
ءوز كەزەگىندە وبلىس پوليتسەيلەرى مال جايىلىمىندا مالداردى قاراۋسىز قالدىرماۋعا جانە ۇقىپتى بولۋ كەرەكتىگىن ايتادى. سونداي-اق مال تۇراعىنىڭ شارۋاشىلىق جايى مۇقيات بەكىتىلىپ, قاجەتىنشە ەن سالىنىپ, تاڭبالانۋى ءتيىس. مال قورالاردى دا جاقسىلاپ قورشاپ, بەكىتىپ, جارىقتاندىرعان ءجون. ءتورت ت ۇلىك جوعالسا نەمەسە ۇرلانسا, ۋاقىت جوعالتپاي پوليتسيا بولىمىنە تەز ارادا حابارلاسقانىڭىز دۇرىس.
