پارلامەنت • 26 قاڭتار، 2021

ماۋلەن اشىمباەۆ: ۆاكتسيناتسيا ءماجبۇرلى تۇردە جۇرگىزىلمەيدى

765 رەت كورسەتىلدى

Cەنات سپيكەرى ماۋلەن اشىمباەۆ بۇگىن پرەزيدەنتتىڭ توراعالىعىمەن وتكەن ۇكىمەتتىڭ كەڭەيتىلگەن وتىرىسىنا قاتىستى پىكىر ءبىلدىردى، دەپ حابارلايدى Egemen.kz بۇل تۋرالى سەنات سپيكەرى ءوزىنىڭ Facebook پاراقشاسىندا جازدى.

مەملەكەت باسشىسىنىڭ توراعالىعىمەن ۇكىمەتتىڭ كەڭەيتىلگەن وتىرىسى ءوتتى. الداعى باعىت-باعدار مەن نەگىزگى ماقسات-مىندەتتەر پىسىقتالدى. پرەزيدەنتىمىز ءوز سوزىندە قازاقستاندىقتاردىڭ ناقتى تابىسىن ارتتىرۋ، شاعىن جانە ورتا بيزنەستى قولداۋ، ەكونوميكالىق ءوسۋدى قامتاماسىز ەتۋ ماسەلەلەرىنە باسا ءمان بەردى. سونداي-اق، قاسىم-جومارت كەمەل ۇلى مەملەكەتتىك شىعىنداردى وڭتايلاندىرۋ، ازاماتتاردىڭ وتىنىشتەرىن قاراۋدىڭ تيىمدىلىگىن ارتتىرۋ جانە ينتەرنەتتىڭ ساپاسى مەن جىلدامدىعىنا قاتىستى ماسەلەلەردى شەشۋ جۇمىستارى بويىنشا تاپسىرمالار بەردى.

پرەزيدەنتىمىز ساتىپ الۋداعى جەرگىلىكتى ونىمدەردىڭ ۇلەسىن ۇلعايتۋ جانە ازاماتتاردى، اسىرەسە، اۋىل تۇرعىندارىن جۇمىسپەن قامتۋ بويىنشا اتقارىلعان شارالاردىڭ ولقى تۇستارىنا ەرەكشە توقتالدى. مەملەكەت باسشىسى كولەڭكەلى ەكونوميكامەن، جالعان كاسىپورىندارمەن جانە ادەيى سالىق تولەمەيتىن كاسىپكەرلەرمەن كۇرەس ماسەلەسىنە دە نازار اۋداردى. ينۆەستيتسيا تارتۋ جۇيەسىن جاقسارتۋ بويىنشا ۇسىنىستار ەنگىزۋدى تاپسىردى. وتىرىستا ەلىمىزدىڭ ءار وڭىرىندەگى ارنايى ەكونوميكالىق ايماقتاردىڭ تيىمدىلىگىنە قاتىستى ماسەلەلەر دە كوتەرىلدى.

سونىمەن قاتار، اشىق باسەكەلەستىككە كەدەرگى كەلتىرەتىن نەگىزگى پروبلەمالاردى شەشۋ ءۇشىن 2022 جىلدىڭ 1 قاڭتارىنا دەيىن ءتيىستى زاڭ قابىلداۋ جۇمىستارىن قامتاماسىز ەتۋ تاپسىرىلدى.

جەر كوميسسياسىنىڭ جۇمىسى قايتا جانداناتىن بولدى. بۇل باعىتتا مەملەكەت باسشىسى اۋىل تۇرعىندارىن الاڭداتىپ وتىرعان جايىلىمدار ماسەلەسىنە دە باسا كوڭىل ءبولدى. ەكولوگيا سالاسى بويىنشا اتقارىلىپ جاتقان جۇمىستارعا قوعامدىق باقىلاۋ جۇرگىزۋ ءۇشىن «جاسىل قازاقستان» ۇلتتىق جوباسى ازىرلەنەدى.

دەنساۋلىق ساقتاۋ جانە ءبىلىم بەرۋ سالالارىن ءارى قاراي رەفورمالاۋعا قاتىستى جاڭا باستامالار دا ايتىلدى. سونىڭ اياسىندا دەنساۋلىق ساقتاۋ ۇيىمدارىندا ينۆەنتاريزاتسيا جۇرگىزىلەدى جانە جىل سوڭىنا دەيىن 200 جاڭا مەكتەپ سالىنادى. ودان بولەك، قازاقستان تاريحى جانە دۇنيەجۇزى تاريحى پاندەرى بويىنشا بىرىڭعاي وقۋلىق ازىرلەنەدى.

مەملەكەت باسشىسى حالىقتى ۆاكتسيناتسيالاۋ ماسەلەسىن دە نازاردان تىس قالدىرمادى. بۇل تاقىرىپ قازىر قوعامدا جان-جاقتى تالقىلانىپ جاتقانى بەلگىلى.

وسى رەتتە دەنساۋلىق تۋرالى كودەكستى قابىلداۋ كەزىندە سەناتورلار ەمدەۋدەن جانە پروفيلاكتيكالىق ەكپەلەردەن باس تارتۋ مۇمكىندىگى تۋرالى تۇزەتۋلەر ەنگىزگەنىن اتاپ وتكەن ءجون. سوندىقتان الەۋمەتتىك جەلىلەردە ايتىلىپ جۇرگەن كەيبىر پىكىرلەرگە بايلانىستى قازاقستاندا ۆاكتسينا ەگۋدى ءماجبۇرلى تۇردە جۇرگىزۋ مۇمكىن ەمەستىگىن ايتقىم كەلەدى.

الايدا، تەك ۆاكتسيناتسيا ارقىلى عانا پاندەمياعا توسقاۋىل قويۋعا بولاتىنىن ءتۇسىنۋىمىز كەرەك. تاريحتا مۇنداي جاعداي العاش رەت بولىپ وتىرعان جوق. ىندەت جايلاعان كەزەڭدەردە ۆاكتسينا ادامزاتتى بىرنەشە رەت امان ساقتاپ قالدى. سوندىقتان قازىر تاڭداۋ جاساۋىمىز قاجەت. قانشا ۋاقىتقا جالعاساتىنى بەلگىسىز، ۇلكەن الەۋمەتتىك سالدارى بار كارانتيندىك شەكتەۋلەردى ءارى قاراي كۇشەيتكەن دۇرىس پا، الدە جاپپاي ۆاكتسيناتسيالاۋ ارقىلى ۇجىمدىق يممۋنيتەت قالىپتاستىرىپ، قالىپتى ومىرىمىزگە قايتا ورالعانىمىز جاقسى ما؟ جاۋاپ اركىمگە تۇسىنىكتى بولار.

ۆاكتسيناتسيالاۋ - ءماجبۇرلى شارا ەمەس. بىراق، تۇتاس حالىقتىڭ دەنساۋلىعىن ساقتاۋ تۇرعىسىنان وتە ماڭىزدى قادام. سوندىقتان مەملەكەتتىك اپپارات پەن قوعامدىق ينستيتۋتتار بۇل باعىتتا ءتۇسىندىرۋ جۇمىستارىن كەڭىنەن جۇرگىزۋگە ءتيىس.

بۇگىنگى وتىرىستا پرەزيدەنتىمىز بۇدان باسقا دا ماڭىزدى ماسەلەلەرگە توقتالىپ، ۇكىمەت پەن اكىمدەرگە ناقتى مىندەتتەر جۇكتەدى. وسىعان وراي سەنات الداعى ۋاقىتتا ماجىلىسپەن بىرلەسىپ، مەملەكەت باسشىسىنىڭ باستامالارى مەن تاپسىرمالارىن تابىستى ىسكە اسىرۋعا قاجەتتى زاڭدار قابىلداۋ جۇمىستارىنا باسىمدىق بەرەدى.

سوڭعى جاڭالىقتار

يتاليادا توعىز جۇلدە الدىق

سپورت • بۇگىن، 10:10

ءار سالا ۇزدىكتەرىنە قۇرمەت تانىتتى

ايماقتار • 05 ناۋرىز، 2021

باعدات مۋسين شىمكەنتكە باردى

ايماقتار • 05 ناۋرىز، 2021

ۇقساس جاڭالىقتار