ايماقتار • 26 قاڭتار، 2021

قوردايداعى بيوفارماتسەۆتيكالىق زاۋىتتىڭ قۇرىلىسى قارقىن الدى

17 رەت كورسەتىلدى

مەملەكەت باسشىسى قاسىم-جومارت توقاەۆتىڭ تاپسىرماسىنا سايكەس، بۇگىندە قورداي اۋدانىنىڭ گۆاردەيسكي اۋىلىندا بيولوگيالىق قاۋىپسىزدىك پروبلەمالارى عىلىمي-زەرتتەۋ ينستيتۋتى بازاسىنداعى بيوفارماتسەۆتيكالىق زاۋىتتىڭ قۇرىلىسى جۇرگىزىلىپ جاتىر، دەپ حابارلايدى Egemen.kz

اتالعان كاسىپورىندا الەمدىك ستاندارتتار بويىنشا يممۋنوبيولوگيالىق پرەپاراتتار، ونىڭ ىشىندە كوروناۆيرۋستىق ينفەكتسياعا، تۇماۋعا، تۋبەركۋلەزگە، برۋتسەللەزگە، نودۋليارلىق دەرماتيتكە جانە باسقا دا ينفەكتسيالىق اۋرۋلارعا قارسى ۆاكتسينالار شىعارۋ جوسپارلانىپ جاتىر. ونىڭ جىلدىق ءوندىرىس كولەمى 30-60 ميلليون دوزا بيولوگيالىق ءونىمدى قۇرايدى.

جامبىل وبلىسىنىڭ اكىمى بەردىبەك ساپارباەۆ قورداي اۋدانىنداعى بيوفارماتسەۆتيكالىق زاۋىتتىڭ قۇرىلىسى بويىنشا كەڭەس وتكىزدى. كەڭەسكە قازاقستان رەسپۋبليكاسى پرەمەر-ءمينيسترى كەڭسەسى باسشىسىنىڭ ورىنباسارى ولجاس سماعۇلوۆ، دەنساۋلىق ساقتاۋ ءمينيسترىنىڭ ءبىرىنشى ۆيتسە-ءمينيسترى مارات شورانوۆ جانە ءبىلىم جانە عىلىم ءمينيسترىنىڭ ورىنباسارى ميراس داۋلەنوۆ قاتىستى.

سونىمەن قاتار باسقوسۋدا بيولوگيالىق قاۋىپسىزدىك عىلىمي-زەرتتەۋ ينستيتۋتىنىڭ باسشىلارى، مۇددەلى مەملەكەتتىك ورگانداردىڭ، ساراپشىلار مەن مەردىگەرلەردىڭ وكىلدەرى دە بولدى. كەزدەسۋ بارىسىندا جوبانى ىسكە اسىرۋداعى اعىمدىق ماسەلەلەر تالقىلاندى. سونداي-اق كەلۋشىلەر قۇرىلىس-مونتاجداۋ جۇمىستارى، وندىرىستىك جابدىقتى ساتىپ الۋ جانە ورناتۋ، ۆاليداتسيا جانە GMP سەرتيفيكاتتاۋ راسىمدەرىن جانە باسقا دا جايتتاردى سارالادى.

«زاۋىتتىڭ ستراتەگيالىق ماڭىزى بار. سوندىقتان جۇمىس ساپاسىنا جانە بەلگىلەنگەن مەرزىمدە اياتاۋعا باسا نازار اۋدارۋ قاجەت. زاۋىت وندىرىستىك تاجىريبەنىڭ حالىقارالىق ستاندارتتارىنا سايكەس كەلۋى ءتيىس. بۇل ءۇشىن بارلىق مەملەكەتتىك ورگاندار مەن قۇرىلىمداردىڭ ۇيلەسىمدى جۇمىسى قاجەت»، دەدى بەردىبەك ساپارباەۆ.

بۇدان كەيىن بەردىبەك ساپارباەۆ قورداي اۋدانىن گازداندىرۋ ماسەلەسى بويىنشا دا كەڭەس وتكىزدى. جيىندا وبلىستىق ەنەرگەتيكا جانە تۇرعىن ءۇي-كوممۋنالدىق شارۋاشىلىق باسقارماسىنىڭ باسشىسى قۇدايبەرگەن قورعانباەۆ وسى باعىتتا جۇرگىزىلىپ جاتقان جۇمىستار تۋرالى بايانداپ، قىس مەزگىلىنە قاراماستان، ەلدى مەكەندەرگە گاز قۇبىرىن تارتۋ جۇمىستارى جالعاسىپ جاتقانىن ايتتى.

جيىنعا مۇنداعى جوبالاردى جۇزەگە اسىرىپ جاتقان مەردىگەرلىك ۇيىمداردىڭ باسشىلارى دا قاتىستى. كەڭەس سوڭىندا اكىم قورداي اۋدانىنداعى ەلدىمەكەندەردى ودان ءارى گازداندىرۋ بويىنشا جاۋاپتى تۇلعالارعا بىرقاتار ناقتى تاپسىرمالار بەردى.

سوڭعى جاڭالىقتار

ۇقساس جاڭالىقتار