ەلوردا • 26 قاڭتار، 2021

ەلوردا دارىگەرلەرى قالا تۇرعىندارىنا ۇندەۋ جاسادى

45 رەت كورسەتىلدى

كوروناۆيرۋسپەن كۇرەستە الدىڭعى قاتاردا جۇرگەن ەلوردالىق جۇقپالى اۋرۋلار ماماندارى قالا تۇرعىندارىن سانيتارلىق-ەپيدەميالىق نورمالاردى ساقتاۋعا شاقىردى، دەپ حابارلايدى Egemen.kz

كوروناۆيرۋسپەن اۋرۋحاناعا تۇسۋشىلەردىڭ كوبەيۋىن ەسكەرە وتىرىپ، مەديتسينا قىزمەتكەرلەرى كارانتين رەجيمىن ساقتاۋ بويىنشا الدىن الۋ شارالارىن ۇمىتپاۋ كەرەكتىگىن ەسكە سالدى.

«كۇزدە ناۋقاس سانى از بولدى. كەيبىرى ءتىپتى ۆيرۋس توقتادى دەپ تە ويلاعان بولسا كەرەك. بىراق ينفەكتسيا تۇبەگەيلى جويىلعان جوق. كوروناۆيرۋس ۇدەپ تۇرعان شاقتا كۇن مەن ءتۇندى ايىرا الماعان كەزىمىز بولدى. ۋاقىتقا قاراپ، قاي شاقتا جۇمىس ىستەۋىمىز كەرەكتىگىن ويلاعان جوقپىز. كوروناۆيرۋستىڭ كۇرت ءورشۋى مەن تارالۋىنىڭ قايتالانۋىنا جول بەرمەۋىمىز كەرەك. كەيبىرى قالا ءىشىن بەتپەردەسىز ارالاپ، سانيتارلىق نورمالاردى ەلەمەي جاتقاندارى بار. ال ءبىز مۇندا كۇن سايىن ناۋقاستاردىڭ دەنساۋلىعى مەن ءومىرى ءۇشىن كۇرەسىپ ءجۇرمىز»، دەيدى قالالىق جۇقپالى اۋرۋلار ورتالىعىنىڭ دارىگەرى.

ستاتسيوناردا كوروناۆيرۋستان ەمدەلىپ جاتقان ايگەرىم ءومىرجانوۆا اۋرۋحانا توسەگىنە تاڭىلاتىنىنا سەنبەگەن ەكەن:

«بۇل قاۋىپتى ۆيرۋستىڭ ەلىمىزگە زيان تيگىزگەنىنە ءبىر جىلعا جۋىق ۋاقىت بولدى. وسى ۋاقىت ىشىندە مەن الاڭسىز ءجۇرىپ، دەنساۋلىعىم تۋرالى ويلاعان ەمەسپىن، ۆيرۋس جوق دەپ تە ويلادىم. بىراق ءوزىمدى ناشار سەزىنگەن ساتتەن باستاپ، بىردەن مەديتسينالىق كومەككە جۇگىندىم. وكىنىشكە قاراي، مەنەن كوروناۆيرۋس شىقتى. شىنىمدى ايتسام، مۇنداي جاعدايعا تاپ بولامىن دەپ ويلاماعان ەدىم. بۇل ەشقانداي دا ءازىل ەمەس ەكەن»، دەپ ا.ءومىرجانوۆا ءوز ويىمەن ءبولىستى.

ەستەرىڭىزگە سالا كەتەيىك، قالادا بىرقاتار كارانتيندىك شەكتەۋ شارالارى بار. قالا تۇرعىندارى ماسكا رەجىمىن، الەۋمەتتىك قاشىقتىقتى ساقتاۋى، قولدارىن انتيسەپتيكپەن وڭدەۋى قاجەت.

سوڭعى جاڭالىقتار

ۇقساس جاڭالىقتار