ايماقتار • 26 قاڭتار، 2021

شىعىس قازاقستاندا تۇرعىن ۇيدەگى جەرتولەدەن ءورت شىقتى

7 رەت كورسەتىلدى

شىعىس قازاقستان وبلىسى گلۋبوكوە اۋدانىندا كوپقاباتتى تۇرعىن ءۇيدىڭ جەرتولەسىندە ورنالاسقان دۇكەندە ءورت شىقتى، دەپ حابارلايدى Egemen.kz

شقو توتەنشە جاعدايلار دەپارتامەنتى ءباسپاسوز قىزمەتىنىڭ مالىمەتىنە سۇيەنسەك، 26 قاڭتاردا بەلوۋسوۆكا كەنتىندەگى يۋبيلەينايا كوشەسىندە ءورت شىققان. وقيعا ورنىنا بىردەن ءورت سوندىرۋشىلەر اتتاندى. بەلگىلى بولعانداي، قىزىل جالىن بەسقاباتتى تۇرعىن ءۇيدىڭ جەرتولەسىندە ورنالاسقان دۇكەندى شارپىعان. «قۇتقارۋشىلار 16 ادامدى، ونىڭ ىشىندە 4 بالانى ەۆاكۋاتسيالادى. ولار ءىشى جىلى «ۆاحتا» اۆتوكولىگىنە ورنالاستىرىلدى. سونداي-اق 3 جانە 5 جاسار ەكى بالا ءتۇتىن تۇمشالاعان پاتەردەن كورپەگە ورالىپ، سىرتقا شىعارىلعان»، دەپ حابارلادى ۆەدومستۆو وكىلدەرى.

كوپ ۇزاماي ءورت سوندىرۋشىلەر جالپى اۋدانى 10 شارشى مەترگە جەتكەن ءتىلسىز جاۋدى اۋىزدىقتادى. زارداپ شەككەندەر جوق.

الدىن الا مالىمەت بويىنشا، ءورتتىڭ شىعۋىنا ەلەكتر جابدىقتارىن مونتاجداۋ جانە پايدالانۋ كەزىندە ءورت قاۋىپسىزدىگى تالاپتارىنىڭ ساقتالماۋى سەبەپ بولۋى مۇمكىن.

سوڭعى جاڭالىقتار

ۇقساس جاڭالىقتار