قازاقستان • 26 قاڭتار، 2021

يدم-دە سىبايلاس جەمقورلىق تاۋەكەلدەرىن جويۋ پروتسەستەرى كورسەتىلدى

9 رەت كورسەتىلدى

سىبايلاس جەمقورلىققا قارسى ءىس-قيمىل اگەنتتىگىنىڭ باستاماسىمەن اگەنتتىك پەن يندۋستريا جانە ينفراقۇرىلىمدىق دامۋ مينيسترلىگى باسشىلىعىنىڭ كەزدەسۋى ءوتتى. نەگىزگى كۇن ءتارتىبى مينيسترلىك جەتەكشىلىك ەتەتىن سالالاردا سىبايلاس جەمقورلىقتىڭ الدىن الۋ باعىتى بويىنشا ءوزارا ءىس-قيمىل ماسەلەلەرىنە باعىتتالعان، دەپ حابارلايدى Egemen.kz

بەينەكونفەرەنتسيا بايلانىسى ارقىلى ءىس-شاراعا سىبايلاس جەمقورلىققا قارسى قىزمەتتىڭ اۋماقتىق بولىمشەلەرى، يدم، ونىڭ ۆەدومستۆولارى مەن ۆەدومستۆولىق باعىنىستاعى ۇيىمدارى، سونداي-اق وبلىس اكىمدەرىنىڭ ورىنباسارلارى مەن جەرگىلىكتى اتقارۋشى ورگانداردىڭ بەيىندى باسقارمالارىنىڭ باسشىلارى قاتىستى.

يدم قىزمەتكەرلەرىنە قاتىستى تىركەلگەن بارلىق قىلمىستىڭ جارتى ۇلەسى تيەسىلى كولىكتىك باقىلاۋ سالاسىنداعى جوعارى سىبايلاس جەمقورلىق تاۋەكەلدەرىن ەسكەرە وتىرىپ، كولىك كوميتەتىنىڭ احۋالدىق ورتالىعىنىڭ جاڭا تاسىلدەرى تانىستىرىلدى. اتاپ ايتقاندا، كولىكتىك باقىلاۋدى تسيفرلاندىرۋ جانە اۆتوماتتاندىرۋ ارقىلى سىبايلاس جەمقورلىق تاۋەكەلدەرىن جويۋ پروتسەستەرى كورسەتىلدى.

يندۋستريا جانە ينفراقۇرىلىمدىق دامۋ ءمينيسترى بەيبىت اتامقۇلوۆ مەملەكەت باسشىسىنىڭ تاپسىرمالارىن ىسكە اسىرۋ اياسىندا سىبايلاس جەمقورلىقتىڭ الدىن الۋ بويىنشا بەلسەندى جۇمىس جۇرگىزىلىپ جاتقانىن اتاپ ءوتتى. بيزنەستى قورعاۋ جانە سىبايلاس جەمقورلىققا قارسى ءىس-قيمىل جونىندەگى جول كارتاسى جاسالدى، ىشكى اۋديت بولىمشەلەرىنىڭ جۇمىسى كۇشەيتىلدى، قوعامدىق كەڭەس جانداندىرىلدى، ۇكىمەتتىك ەمەس سەكتورمەن جانە بيزنەس-قاۋىمداستىقتارمەن ءوزارا ءىس-قيمىل جانە «كەرى بايلانىس» ىسكە اسىرىلدى، ازاماتتار مەن بيزنەس ءۇشىن قىزمەت كورسەتۋ جوسپارلى تۇردە اۆتوماتتاندىرىلىپ، ەلەكتروندىق فورماتقا كوشىرىلۋدە.

يدم-دە «ادالدىق الاڭى» جوبالىق كەڭسەسى جۇمىس ىستەيدى، ونىڭ اياسىندا سىبايلاس جەمقورلىق تاۋەكەلدەرىنە، اكىمشىلىك كەدەرگىلەر مەن بيۋروكراتيالىق راسىمدەرگە تالداۋ جۇرگىزىلەدى. مەملەكەتتىك ساتىپ الۋعا ەرەكشە كوڭىل ءبولىندى.

جوبالىق كەڭسەنىڭ جۇمىسىنا قوعام وكىلدەرى دە باعاسىن بەردى، قۇرىلعانىنا از ۋاقىت بولعانىنا قاراماستان، كەڭسەلەرمەن ەلەۋلى تابىستارعا قول جەتكىزىلگەن، ولاردىڭ ەڭ باستىسى – سىبايلاس جەمقورلىققا قارسى ءىس-قيمىل ماسەلەلەرىندە مينيسترلىك پەن ساراپشىلىق قوعامداستىقتىڭ كۇش-جىگەرىن شوعىرلاندىرۋ ەكەنىن اتاپ ءوتتى.

ءوز كەزەگىندە اگەنتتىك وكىلدەرى يدم-دە ءىس جۇزىندە اربىرەۋىندە سىبايلاس جەمقورلىق تاۋەكەلى جوعارى مەملەكەتتىڭ كەڭ اۋقىمدى، نەگىزگى فۋنكتسيالارى شوعىرلانعانىن اتاپ ءوتتى. كولىكتىك باقىلاۋ، اۆتوموبيل جولدارى، قۇرىلىس جانە تۇكش سالالارى، سونداي-اق ۆەدومستۆولىق باعىنىستاعى ۇيىمداردىڭ قىزمەتى ەرەكشە الاڭداۋشىلىق تۋدىرادى.

وسىعان بايلانىستى، اگەنتتىك قۇرىلىس جانە تۇكش ىستەرى كوميتەتىنىڭ، سونداي-اق «قازاۆتوجول «ۇك» اق قىزمەتىندەگى سىبايلاس جەمقورلىق تاۋەكەلدەرىنە سىرتقى تالداۋ جۇرگىزدى. اعىمداعى جىلى بۇل جۇمىس كولىك جانە اۆتوموبيل جولدارى كوميتەتتەرىندە جالعاسادى.

سىبايلاس جەمقورلىققا قارسى باستامالاردىڭ ىسكە اسىرىلۋ بارىسىن جاريا ەتە وتىرىپ، اگەنتتىك توراعاسى اليك شپەكباەۆ: «سىبايلاس جەمقورلىققا قارسى ءىس-قيمىل-بۇگىندە بۇل ۋاكىلەتتى ورگان رەتىندەگى اگەنتتىكتىڭ عانا مىندەتى ەمەس، بۇگىندە بۇل ءاربىر باسشىنىڭ مىندەتى. تەك بىرىگۋ ارقىلى عانا ءبىز جاعدايدى تۇبەگەيلى وزگەرتە الامىز. بۇدان مىناداي مۋلتيپليكاتيۆتىك اسەر بولادى: ەكونوميكانىڭ ءوسۋى، حالىقتىڭ ءال-اۋقاتىن ارتتىرۋ، ادامي كاپيتالدى دامىتۋ».

سىبايلاس جەمقورلىققا قارسى قىزمەتتىڭ مەملەكەتتىك ورگانداردىڭ اشىقتىعى، ايقىندىلىعى جانە كليەنتكە باعدارلانۋى بويىنشا جۇرگىزىپ جاتقان جۇمىستارى تۋرالى ايتا كەلىپ، ول مينيسترلىكتى سالالىق قىزمەتتەردىڭ ءتيىستى سپەكترىن كورسەتۋ جانە جۇرتشىلىقپەن ءوزارا ءىس-قيمىل جاساۋ ءۇشىن وڭىرلەردە سەرۆيستىك ورتالىقتار اشۋعا شاقىردى.

سوڭعى جاڭالىقتار

ۇقساس جاڭالىقتار