COVID-19 ۆيرۋسىن جۇقتىرۋ بويىنشا جالپى الەمدىك رەيتينگتە قازاقستان 1 ملن ادامعا شاققاندا 221 مەملەكەتتىڭ ىشىندە 109-ورىندا تۇر. ءولىم-ءجىتىم بويىنشا قازاقستان رەيتينگتە 97-ورىندا، COVID-19 تەستىلەنۋشىلەر سانى بويىنشا — 69-ورىندا، ساۋىققاندار سانى بويىنشا — 87-ورىندا، اۋىر جاعدايلار سانى بويىنشا —  50-ورىندا.

«پاندەميا باستالعاننان بەرى قازاقستاندا  COVID-19 وڭ ناتيجەسىمەن 179 720 ناۋقاس جانە كۆي- ناتيجەسىمەن 47 445 جاعداي تىركەلدى. ناۋقاستاردىڭ 87%-ى ساۋىعىپ كەتتى. بۇگىنگى تاڭدا ينفەكتسيالىق ستاتسيونارلاردىڭ جۇكتەمەسى — 31%، رەانيماتسيالىق توسەك-ورىنداردىڭ جۇكتەمەسى 19% قۇرايدى»، — دەدى ۆەدومستۆو باسشىسى.

سونداي-اق، ونىڭ ايتۋىنشا، دەنساۋلىق ساقتاۋ مينيسترلىگى كۇن سايىن ماتريتساعا سايكەس ەپيدەميالىق جاعدايعا باعالاۋ جۇرگىزەدى. ماسەلەن، 26 قاڭتارداعى جاعداي بويىنشا «قىزىل ايماقتا» 8 ءوڭىر بار: اقمولا، اتىراۋ، قوستاناي، پاۆلودار، باتىس قازاقستان، سولتۇستىك قازاقستان وبلىستارى جانە نۇر-سۇلتان جانە الماتى قالالارى.

بۇل رەتتە اقمولا، پاۆلودار، قوستاناي وبلىستارىندا ەپيدەميولوگيالىق احۋالعا ءتيىستى باقىلاۋدىڭ جوقتىعى بايقالادى.

«ناتيجەسىندە، ەلدەگى اۋرۋلاردىڭ 40%-ى وسى ايماقتارعا تيەسىلى. وسىعان بايلانىستى وسى وڭىرلەردىڭ اكىمدەرى ءتيىمدى قوسىمشا شەكتەۋ شارالارىن قابىلداپ، ولاردىڭ ساقتالۋىن باقىلاۋدى قامتاماسىز ەتۋى قاجەت»، — دەدى ا. تسوي.

جالپى رەسپۋبليكا بويىنشا قاراشا ايىنان باستاپ كۆي اۋرۋىنىڭ ءوسۋى بايقالادى، جەلتوقسان ايىندا قاراشا ايىمەن سالىستىرعاندا 1،2 ەسە ءوسۋ بايقالدى. ورتاشا ءوسۋ ءۇردىسى قاڭتار ايىندا دا ساقتالدى. ماسەلەن، قاڭتار ايىندا كۆي-مەن اۋىرۋدىڭ 24 247 جاعدايى تىركەلگەن.

شىعىس قازاقستان وبلىسىن قوسپاعاندا، بارلىق وڭىرلەردە سىرقاتتانۋشىلىقتىڭ ءوسۋى بايقالادى.

ناۋقاستارعا كومەك كورسەتۋ ءۇشىن قازاقستاندا 74 مىڭنان استام دارىگەر تارتىلعان، ونىڭ ىشىندە 28 مىڭعا جۋىعى — بەيىندى ماماندار.

اۋىل حالقىنىڭ مەديتسينالىق كومەككە قولجەتىمدىلىگى قولدا بار جىلجىمالى مەديتسينالىق كەشەندەر ەسەبىنەن، ونىڭ ىشىندە 2020 جىلى قويىلعان 100 جمك ەسەبىنەن قامتاماسىز ەتىلەدى.

سونداي-اق، 2020 جىلى وڭىرلەرگە 1167 بىرلىك سانيتارلىق اۆتوكولىك كەلىپ ءتۇستى. ينفەكتسيالىق ستاتسيونارلارعا 5 مىڭنان استام ءوجج اپپاراتى جەتكىزىلدى، شامامەن 43 مىڭ توسەك-ورىن وتتەگىمەن قامتاماسىز ەتىلدى.

بۇدان باسقا، 15 ينفەكتسيالىق ستاتسيونار سالىندى، 3 قايتا بەيىندەلگەن نىساننىڭ جوندەۋ جۇمىستارى اياقتالدى، 1 نىساننىڭ قۇرىلىسىن اعىمداعى جىلدىڭ اقپان ايىندا اياقتاۋ جوسپارلانىپ وتىر.

بارلىق وڭىرلەردە جالپى سوماسى 17 ملرد تەڭگەگە تۇراقتاندىرۋ قورلارى قۇرىلدى.

«بىرىڭعاي ديستريبيۋتوردىڭ 4 حابىندا COVID-19 بويىنشا ءدارى-دارمەكتەردىڭ ەكى ايلىق جاڭارتىلاتىن قورى، 10 ملن ماسكا جانە 400 مىڭ جەكە قورعانىس قۇرالدارى قالىپتاستىرىلدى. تەستىلەۋ قۋاتى تاۋلىگىنە 40 مىڭنان 100 مىڭعا دەيىن ارتتى. وسىلايشا، قابىلدانعان شارالار COVID-19 اۋرۋىنىڭ اعىمداعى ءوسۋىن ەسكەرە وتىرىپ، حالىقتىڭ مەديتسينالىق كومەككە قولجەتىمدىلىگىن قامتاماسىز ەتۋگە مۇمكىندىك بەرەدى»، — دەدى دەنساۋلىق ساقتاۋ ءمينيسترى.

مەملەكەت باسشىسىنىڭ تاپسىرماسىنا سايكەس، 1 اقپاندا رەسپۋبليكادا ۆاكتسيناتسيا ناۋقانى باستالادى دەپ جوسپارلانۋدا.

«ۆاكتسيناتسيا ۆاكتسينانىڭ ءتۇسۋىن ەسكەرە وتىرىپ، كەزەڭ-كەزەڭىمەن جۇزەگە اسىرىلادى. جىل سوڭىنا دەيىن 6 ملن-عا جۋىق قازاقستاندىقتى ۆاكتسيناتسيالاۋ جوسپارلانعان. ءبىرىنشى كەزەڭدە ۆاكتسيناتسيا كۆي-مەن كۇرەسۋدەگى "العاشقى جەلى" قىزمەتكەرلەرىنە جاسالادى — بۇل مەديتسينا قىزمەتكەرلەرى، پەداگوگتار جانە كۇش قۇرىلىمدارىنىڭ قىزمەتكەرلەرى»، — دەپ اتاپ ءوتتى ول.

قازىرگى ۋاقىتتا ۆاكتسيناتسيانى باستاۋعا دايىندىق جۇمىستارى اياقتالۋدا. جۇيەلى ەسەپكە الۋ ماقساتىندا ۆاكتسيناتسيالاۋدىڭ ەلەكتروندىق پاسپورتى ازىرلەندى. ۆاكتسيناتسيا جۇرگىزۋ تۋرالى دەرەكتەر مينيسترلىكتىڭ ورتالىقتاندىرىلعان اقپاراتتىق جۇيەسىندە ەلەكتروندىق فورماتتا جۇرگىزىلەتىن بولادى.

«ۆەب-قوسىمشادا پاتسيەنت پەن مەديتسينا قىزمەتكەرىنىڭ m-gov ءموبيلدى قوسىمشاسىندا اقپاراتتى قولمەن ەنگىزۋگە مۇمكىندىگى بار»، — دەپ قوستى ا. تسوي.

سونداي-اق، مينيستر 2021 جىلدىڭ سوڭىنا دەيىن ەپيدەميولوگيالىق احۋالدى دامىتۋ جونىندەگى بولجامدارىمەن ءبولىستى. ماسەلەن، مىندەتتى ماسكا رەجيمىن، الەۋمەتتىك ارا قاشىقتىقتى جانە كۇتىلەتىن ۆاكتسيناتسيانى قوسا العاندا، قولدانىستاعى شەكتەۋ شارالارىن ساقتاي وتىرىپ، اۋرۋ جاعدايلارىن تىركەۋدىڭ ىقتيمال ءورشۋى وسى جىلدىڭ ناۋرىز ايىنىڭ سوڭىندا ورىن الۋى مۇمكىن.

وپتيميستىك ستسەناري بويىنشا تاۋلىگىنە 3 مىڭ جاعدايعا دەيىن تىركەۋ كۇتىلۋدە، ال توسەك-ورىن قورىنىڭ قامتىلۋى 24 مىڭ توسەك-ورىنعا دەيىن جەتۋى مۇمكىن.

پەسسيميستىك ستسەناري بويىنشا تىركەۋ تاۋلىگىنە 9 مىڭ جاعدايعا، ال توسەك-ورىن قورىن قامتۋ 45 مىڭ توسەك-ورىنعا دەيىن جەتۋى مۇمكىن، بۇل دەنساۋلىق ساقتاۋ جۇيەسىنىڭ شامادان تىس جۇكتەمەلەنۋىنە جول بەرمەۋ ءۇشىن قاتاڭ كارانتين شارالارىن ەنگىزۋدى قاجەت ەتۋى مۇمكىن.

بولجام بويىنشا، ءبىرىنشى جارتىجىلدىقتا 2 ملن ادامدى ۆاكتسيناتسيالاۋ 40 مىڭعا دەيىن تىركەلەتىن جاعدايدى ازايتادى. ۆاكتسيناتسيادان بولاتىن اسەر ءبىرىنشى كەزەڭدە يممۋنيتەتتى قالىپتاستىرۋعا قاجەتتى ۋاقىتپەن جانە حالىقتىڭ كوپ سانىن ءبىر مەزەتتە ۆاكتسيناتسيالاۋدىڭ مۇمكىن ەمەستىگىمەن شەكتەلەتىن بولادى. كەيىننەن ۆاكتسيناتسيانىڭ اسەرى كۇشەيىپ، ەلدەگى ەپيدەميولوگيالىق جاعدايدىڭ تۇراقتانۋىنا اسەر ەتەدى.

پرەزيدەنت قاسىم-جومارت توقاەۆتىڭ سۇراقتارىنا جاۋاپ بەرە وتىرىپ، دەنساۋلىق ساقتاۋ ءمينيسترى الەكسەي تسوي باسەكەلەستىكتى قورعاۋ جانە دامىتۋ اگەنتتىگىمەن بىرلەسىپ جۇمىس ىستەگەننەن كەيىن دارىلىك پرەپاراتتاردىڭ باعاسىن 27%-عا تومەندەتۋگە قول جەتكىزىلگەنىن ايتتى.

سونداي-اق، «حالىق دەنساۋلىعى تۋرالى» كودەكسكە تۇزەتۋلەر ەنگىزۋ، اتاپ ايتقاندا، بولشەك ساۋدا نارىعىنداعى باعالاردى رەتتەۋدى جويۋ جوسپاردا بار. ءمينيستردىڭ ايتۋىنشا، وسىنىڭ ارقاسىندا بولشەك سەگمەنتتەگى باعانى تومەندەتۋ ءۇشىن قوسىمشا نەگىز قۇرۋعا بولادى. سونداي-اق، دەنساۋلىق ساقتاۋ ءمينيسترى سىبايلاس جەمقورلىق تاۋەكەلدەرىنە سىرتقى تالداۋ جۇرگىزۋ تۋرالى باياندادى.

«قازىر ناقتى جوسپار ازىرلەندى، ول سىبايلاس جەمقورلىققا قارسى قىزمەتتىڭ باقىلاۋىندا. ءبىز قۇرامىنا ازاماتتىق قوعام وكىلدەرى مەن دەپۋتاتتار قاتارىنان 23 ادام كىرەتىن قوعامدىق جۇمىس توبىن قۇردىق. سونداي-اق، ءبىزدىڭ “سق-فارماتسيا”-نىڭ باقىلاۋشى كەڭەسى قوسىمشا قوعام وكىلدەرىن دە قوستى. دارىلىك زاتتاردى ساقتاۋ جانە تاسىمالداۋ بويىنشا قىزمەتتەردى ەلەكتروندىق ساتىپ الۋعا كوشۋ وتە ماڭىزدى. قازىر ول تولىقتاي ەلەكتروندى. بيىل ءبىز ءدارى-دارمەكتەردى ساتىپ الۋ پروتسەسىن تولىعىمەن اۆتوماتتاندىرۋدى جانە ونى 100% جاڭا فورماتقا كوشىرۋدى جوسپارلاپ وتىرمىز، بۇل دا وڭ ناتيجەسىن بەرەدى»، — دەدى ول.

ا. تسويدىڭ ايتۋىنشا، وسى وزگەرىستەردىڭ ارقاسىندا وتكەن جىلمەن سالىستىرعاندا شامامەن 32،7 ملرد تەڭگە ۇنەمدەلدى. سونداي-اق، «سق-فارماتسيا»-نى قايتا جۇكتەمەلەۋدىڭ جەكە باعدارلاماسى ازىرلەندى. قازىر دامۋدىڭ جاڭا ستراتەگيالارى جاسالدى. ماسەلەن، وتكەن جىلى سالانى ىنتالاندىرۋ ءۇشىن وتاندىق تاۋار وندىرۋشىلەرمەن 24 ۇزاق مەرزىمدى كەلىسىمشارت جاسالدى. دارىلىك زاتتار مەن بۇيىمداردىڭ 1465-كە جۋىق جاڭا اتاۋى مالىمدەلىپ، قازاقستان ىشىندە شىعارىلاتىن بولادى.

مەديتسينالىق مەكەمەلەردىڭ ۆاكتسيناتسيالاۋعا دايىندىعىنا قاتىستى، دەنساۋلىق ساقتاۋ ءمينيسترى بارلىق مەديتسينالىق ۇيىمداردىڭ ءتيىستى وقىتۋدان وتكەندىگى تۋرالى باياندادى. ولاردىڭ ارقايسىسى ۆاكتسيناتسيا بويىنشا بارلىق مۇمكىن سۇراقتاردى تالداپ، «سۋىق» تىزبەكتى قامتاماسىز ەتتى.

«4 گرادۋستان 8 گرادۋسقا دەيىنگى تەمپەراتۋرالىق رەجيمدە بۇل لوگيستيكالىق جەلى سالىنعان. ول جۇمىس ىستەيدى. ءبىز ءۇشىن تىزبەكتى -20 فورماتىندا قامتاماسىز ەتۋ قوسىمشا قيىندىق بولدى، ويتكەنى العاشقى ۆاكتسينا رەسەيلىك "سپۋتنيك V" بولادى. وڭىرلەرمەن ءتيىستى جۇمىستار جۇرگىزىلدى، قوسىمشا توڭازىتقىش جابدىقتارى ساتىپ الىندى. وڭىرلەردەگى “سق-فراماتسيا”-نىڭ بارلىق حابتارىندا بۇل جابدىق بار. قازىر لوگيستيكا تەكسەرىلۋدە»، — دەدى دەنساۋلىق ساقتاۋ ءمينيسترى.

سونداي-اق، ول مەديتسينا قىزمەتكەرلەرىن وقىتۋ بويىنشا وپەراتسيالىق پروتسەدۋرانىڭ ارنايى ستاندارتى جانە ۆاكتسينانى قولدانۋ جونىندەگى نۇسقاۋلىقتىڭ جاسالعانىن ايتتى. سونىمەن قاتار، قازىرگى ۋاقىتتا مينيسترلىك باق-تا جاريالاۋ جانە حالىققا ۆاكتسيناتسيانىڭ پايداسى، كەزەڭدەرى، كورسەتكىشتەرى مەن قارسى كورسەتىلىمدەرى، مەديتسينالىق قارسى كورسەتىلىمدەرى تۋرالى اقپاراتتى جەتكىزۋ ءۇشىن ماتەريالدار دايىندادى.