بيزنەس • 26 قاڭتار، 2021

«ورتالىق ازيا» حالىقارالىق ساۋدا ورتالىعىنىڭ قۇرىلىسى قاشان باستالادى؟

18 رەت كورسەتىلدى

پرەزيدەنت قاسىم-جومارت توقاەۆ ۇكىمەت باسشىسىنا «ورتالىق ازيا» حالىقارالىق ساۋدا ورتالىعىن تەزىرەك سالۋدى جۇكتەدى، دەپ حابارلايدى Egemen.kz

«ازىق-ت ۇلىك قاۋىپسىزدىگى ماسەلەسى وزەكتى بولا ءتۇستى. ول ماسەلەنى تەحنولوگياسى جوعارى اۋىل شارۋاشىلىعىنسىز جانە باسەكەگە قابىلەتتى وڭدەۋشى ءوندىرىسسىز شەشۋ مۇمكىن ەمەس. بۇل – اكسيوما. بىلتىرعى 11 ايدىڭ ىشىندە ازىق-ت ۇلىك يمپورتىنىڭ كولەمى 3،6 ملرد دوللارعا جەتتى. بۇل كورسەتكىش 2019 جىلعى (12 ايلىق) كورسەتكىشتىڭ وزىنەن 9 پايىزبەن وزىپ كەتىپ وتىر. ونىڭ ۇستىنە اوك-تى دامىتۋدىڭ 2017-2021 جىلدارعا ارنالعان مەملەكەتتىك باعدارلاماسى شەڭبەرىندەگى دەكلاراتسيالانعان كورسەتكىشتەرگە ءالى دە جەتە الماي كەلەمىز. بىلتىر حالىقتىڭ تابىسى ازايعان كەزدە ازىق-ت ۇلىك باعاسى كەرىسىنشە قىمباتتاي بەردى. مەملەكەتتىك ورگانداردىڭ باعالاردى ساقتاپ قالۋ بويىنشا شارالارى، سونداي-اق ساۋدا جەلىلەرىنە جەڭىلدەتىلگەن نەسيە بەرۋ – وڭ ناتيجە بەرگەن جوق. الەۋمەتتىك ماڭىزى بار ازىق-ت ۇلىكتىڭ باعاسى 11 پايىزعا ارتتى. جالپى ينفلياتسيانىڭ ىشىندەگى ولاردىڭ ۇلەسى – 60 پايىزعا جەتتى. ۇكىمەت نارىقتىق مەحانيزمدى نەگىزگە الا وتىرىپ، جوعارىدا اتالعان ماسەلەنى شەشەتىن شارالاردى قابىلداۋى كەرەك»، دەدى قاسىم-جومارت توقاەۆ ۇكىمەتتىڭ كەڭەيتىلگەن وتىرىسىندا.

سونىمەن قاتار پرەزيدەنت 24 جاپپاي تاراتۋ ورتالىقتارىن ىسكە قوسۋدان تۇراتىن ۇلتتىق تاۋار وتكىزۋ جۇيەسىن تەزىرەك جولعا قويۋدى جۇكتەدى.

«قازىرگى تاڭدا كوكونىستىڭ 90 پايىزىن وزبەكستاننان يمپورتتاپ وتىرمىز. سونىمەن قاتار بۇل مەملەكەتتىڭ رەسەيمەن ساۋدا قارىم-قاتىناسى دا ءبىزدىڭ ەلدىڭ اۋماعى ارقىلى وتەدى. وسىعان بايلانىستى «ورتالىق ازيا» حالىقارالىق ساۋدا-ەكونوميكالىق ورتالىعىنىڭ جوباسى جاريالانعان ەدى. بۇل ورتالىق بيزنەسكە تۇراقتى تۇردە اقشا تابۋعا كومەكتەسۋى كەرەك. ال مەملەكەت ول ارقىلى بيۋلدجەتتى تولىقتىرۋى ءتيىس»، دەدى قازاقستان پرەزيدەنتى.

بۇدان وزگە، قاسىم-جومارت توقاەۆ بۇل باستامانى كەزىندە ەلباسىنىڭ ءوزى تاپسىرعانىن، بىراق 3 جىلدىڭ ىشىندە كەلىسسوزگە قول قويۋدان باسقا ەشتەڭە ىستەلمەگەنىن ءمالىم ەتتى.

«پرەمەر-مينيستر بۇل ماسەلەنى جەكە باقىلاۋىنا الىپ، بۇل ورتالىقتى قۇرۋ ءىسىن تەزدەتۋى كەرەك. ول جونىندەگى قابىلدانعان شارالار جايلى ءبىر ايدىڭ ىشىندە اقپارات بەرىڭدەر»، دەدى مەملەكەت باسشىسى.

سوڭعى جاڭالىقتار

ۇقساس جاڭالىقتار