1 اقپاننان باستاپ الماتى تولىعىمەن تسيفرلى تەلەحابارعا كوشەدى

تەحنولوگيا • 25 قاڭتار، 2021

1 اقپاننان باستاپ الماتى تولىعىمەن تسيفرلى تەلەحابارعا كوشەدى

4 رەت كورسەتىلدى

1 اقپاننان باستاپ الماتى قالاسى تولىعىمەن تسيفرلى ەفيرلىك تەلەحابارعا كوشەدى، دەپ حابارلايدى Egemen.kz قالا اكىمدىگىنە سىلتەمە جاساپ.

ايىم ءداۋىت

2021 جىلدىڭ 1 اقپانىندا الماتى قالاسىندا «كوكتوبە» تەلەمۇناراسىندا تسيفرلىق ەفيرلىك تەلەحابار تاراتۋ جەلىسىنە كوشۋ بويىنشا ءىس-شارا وتەدى. وڭىردە تسيفرلى ەفيرلىك تەلەحابار تاراتۋ جەلىسىن ەنگىزۋ مەملەكەتتىك جوباسى جۇزەگە اسىرىلدى.

قۇرىلىم الەمدەگى سەيسموتۇراقتى مۇنارا بولىپ سانالادى. «كوكتوبە» تەلەمۇنارالاردىڭ الەم رەيتينگىسىندە 14-ءشى ورىندى يەلەنەدى. ونىڭ قۇرىلىسى 9 جىلعا سوزىلىپ، العاش رەت 1984 جىلى سيگنال تاراتقان بولاتىن. قازىرگى ۋاقىتتا مۇنارا ەلىمىزدە تەلەۆيزيا سيگنالىن تسيفرلى فورماتقا اۋىستىرۋ ۇدەرىسىنە قاتىساتىن ماڭىزدى نىسانداردىڭ ءبىرى. بۇكىل قازاقستان بويىنشا تەلەراديوحابار تاراتۋ جەلىسىن باقىلاۋ جانە مونيتورينگتەۋ ورتالىعى كوكتوبەدە ورنالاسقان.

العاش رەت ەلىمىزدە تسيفرلى تەلەۆيزيا 2012 جىلى 3 شىلدەدە تۇڭعىش پرەزيدەنت نۇرسۇلتان نازارباەۆتىڭ قاتىسۋىمەن وتكەن «يندۋسترياليزاتسيا كۇنى» شاراسى اياسىندا ىسكە قوسىلعان بولاتىن. سودان بەرى ەلىمىزدە راديوتەلەۆيزيالىق ستانسا سالىپ، مودەرنيزاتسيا قارقىندى تۇردە جۇرگىزىلىپ كەلەدى.

الماتى قالاسى مەن الماتى وبلىسىندا 90 راديوتەلەۆيزيالىق ستانسا قولدانىسقا ەنگىزىلدى. بۇل رتس-تەر 736 ەلدى مەكەندى تسيفرلىق تەلەسيگنالمەن قامتاماسىز ەتىپ وتىر، ياعني قالا مەن وبلىس تۇرعىندارىنىڭ 99 پايىزى، شامامەن 3،8 ملن تۇرعىن تسەتۆ جەلىسىندە ارنالاردى تاماشالۋعا مۇمكىندىگى بار.

بۇگىنگى تاڭدا تسيفرلى ەفيرلىك تەلەحابار تاراتۋ جەلىسى بارلىق وبلىس ورتالىقتارىندا جانە بىرقاتار وبلىستا قولجەتىمدى: ماڭعىستاۋ، جامبىل، تۇركىستان، الماتى، پاۆلودار، قوستاناي وبلىستارىندا جانە شىمكەنت قالاسى تولىقتاي كوشىپ قويعان. ەندى 1 اقپاندا الماتى قالاسى مەن سولتۇستىك قازاقستان وبلىسىن تولىق كوشىرۋ جوسپارلانىپ وتىر. بۇكىل قازاقستان بويىنشا انالوگ تەلەحابار تاراتۋ جەلىسىن ءوشىرۋ ءۇشىن 827 راديوتەلەۆيزيالىق ستانساا تۇرعىزىلىپ، مودەرنيزاتسيالانۋ كەرەك. قازىرگى ۋاقىتتا 546 راديوتەلەۆيزيالىق ستانسا ىسكە قوسىلدى. سونىڭ ناتيجەسىندە تسەتۆ-نىڭ قامتۋ اۋماعى ەل حالقىنىڭ 91 پايىزىن قۇراپ وتىر. تسيفرلىق ەفيرلىك تەلەحابار تاراتۋ جەلىسىن ەنگىزۋ جوباسى 2022 جىلى اياقتالادى دەپ جوسپارلانعان. تسەتۆ-گە كوشۋدىڭ مەرزىمدەرى مەن كەزەڭدەرىن قر مەملەكەتتىك قۇزىرلى ورگان بەكىتەدى.

1 اقپاندا الماتى قالاسىمەن قاتار سولتۇستىك قازاقستان وبلىسى دا تسيفرلىق ەفيرلىك تەلەحابار تاراتۋ جەلىسىنە كوشەدى. سونىمەن قاتار 1 جەلتوقسانعا دەيىن نۇر-سۇلتان قالاسى مەن قاراعاندى وبلىستارى كەزەكتە تۇر.

جوبانى جۇزەگە اسىرۋ 2022 جىلى اياقتالادى دەپ جوسپارلانعان.