الماتىدا 10 كىتاپحانا جاڭارتىلدى

ايماقتار • 25 قاڭتار، 2021

الماتىدا 10 كىتاپحانا جاڭارتىلدى

28 رەت كورسەتىلدى

سوڭعى ۋاقىتتا الماتى كىتاپحانالارىنىڭ جاڭا تىنىس اشىلدى، دەسەك تە بولادى. قالا اكىمى باقىتجان ساعىنتاەۆتىڭ تاپسىرماسىمەن مەگاپوليستىڭ كىتاپحانا جۇيەسىن مودەرنيزاتسيالاۋ جالعاسۋدا، دەپ حابارلايدى Egemen.kz.

ايناش ەسالى

الماتى قالاسىنىڭ اكىمى باقىتجان ساعىنتاەۆ ءوزىنىڭ Instagram پاراقشاسىندا كىتاپحانالاردى جاڭارتۋ جانە ولاردىڭ بازاسىندا بالالار مەن جاستارعا پايدالى بوس ۋاقىتتى وتكىزۋ ورتالىقتارىن قۇرۋ تۋرالى ايتتى.

وتكەن جىلى كىتاپحانالار جۇيەسىن جاڭعىرتۋدى باستاپ، 10 كىتاپحانا تولىقتاي جاڭارتىلدى.

«قازىر بۇل ورىندار شاڭ باسقان كىتاپ قويماسى ەمەس، زاماناۋي كىتاپ ۇيىنە اينالدى. التىنسارين داڭعىلى، 37 مەكەن-جايىندا ورنالاسقان قازاقستاندىق جازۋشىلار كىتاپحاناسىنا بارعانىمدا اكىمدىكتىڭ قولداۋىمەن شىعارىلعان ءسوز شەبەرلەرىنىڭ باسىلىمى تانىستىرىلدى. جالپى تارالىمى 65 مىڭ دانا بولاتىن 30 ءتۇرلى كىتاپ قالانىڭ بارلىق كىتاپحانالارىنا تاراتىلدى»، - دەپ جازدى ب. ساعىنتاەۆ.

سونداي-اق قالا اكىمى الاتاۋ اۋدانىنداعى جاڭارتىلعان №44، تۇركسىبتەگى №26 مەن №1 كىتاپحانالاردا بولدى.

«كىتاپ ساقتاۋدىڭ زاماناۋي جۇيەسى ونداعى بوس ايماقتى ءتيىمدى پايدالانۋعا، ياعني شىعارماشىلىق، شەبەرلىك سىنىپتارىن، وتباسىلىق وقۋ ساعاتتارىن وتكىزۋگە ورىن بولۋگە مۇمكىندىك بەرەدى. ءبىز كىتاپحانالاردىڭ جۇمىس ۋاقىتىن بارىنشا ۇزارتىپ، دەمالىسسىز قىزمەت كورسەتۋىنە تىرىستىق. كىتاپحانانىڭ بارىنشا قولجەتىمدى ءارى كەلۋشىلەر ءۇشىن قىزىقتى بولۋىنا ءمان بەردىك»، - دەپ تىلگە تيەك ەتتى مەگاپوليس اكىمى.

وسى ماقساتتا تانىمال جانە جاس جازۋشىلارمەن كەزدەسۋلەر، شىعارماشىلىق كەشتەر مەن تاقىرىپتىق ۇيىرمەلەر وتكىزىلەدى.

«جاڭعىرتۋدان كەيىن وقىرماندار سانى 25%-عا، كەي جەردە 50%-عا كوبەيدى. اسىرەسە، ونىڭ كوبى بالالار ەكەنى قۋانتادى»، - دەپ اتاپ ءوتتى ب. ساعىنتاەۆ.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز