رۋحانيات • 22 قاڭتار، 2021

«ەر ەدىگە-نوعايلى ءداۋىرىنىڭ جىرى» اتتى مۋزىكالىق البوم جارىق كوردى

223 رەت كورسەتىلدى

نۇر-سۇلتان قالاسىندا ۇلتتىق اكادەميالىق كىتاپحانادا «ەر ەدىگە-نوعايلى ءداۋىرىنىڭ جىرى» مۋزىكالىق البومى تانىستىرىلدى، دەپ حابارلايدى Egemen.kz

بىرنەشە جىر-داستاندى قامتىعان جاڭا جيناق اقتوبە وبلىسىنىڭ اكىمدىگىنىڭ مۇرىندىق بولۋىمەن جارىققا شىعىپ وتىر.

«سوڭعى ەكى جىلدا اقتوبە وبلىسى اكىمدىگىنىڭ قولداۋىمەن، وبلىستىق مادەنيەت، ارحيۆتەر جانە قۇجاتتاما باسقارماسى نوعايلى ءداۋىرى جىرلارىنىڭ انتولوگياسىن شىعارۋدى قولعا العان بولاتىن. سول جۇمىستىڭ ناتيجەسىندە، 2020 جىلى قر ەڭبەك سىڭىرگەن قايراتكەرى، بەلگىلى جىرشى-جىراۋ الماس الماتوۆتىڭ جەتەكشىلىگىمەن «ەر ەدىگە» — نوعايلى ءداۋىرىنىڭ جىرى» اتتى مۋزىكالىق البوم جارىققا شىقتى»، دەپ اتاپ ءوتتى اقتوبە وبلىسى اكىمىنىڭ ورىنباسارى م.شەرماعانبەت نۇر-سۇلتاندا «ەر ەدىگە –نوعايلى ءداۋىرىنىڭ جىرى» اتتى عىلىمي-پراكتيكالىق كونفەرەنتسيادا.

«ەر ەدىگە» — تۇركى حالىقتارى اراسىندا ەڭ كوپ تاراعان جىرلاردىڭ ءبىرى. جيناققا ەنگەن جىرلاردا كوپتەگەن تاريحي تۇلعالاردىڭ ەسىمدەرى اتالىپ، ەرلىك ىستەرى باياندالعان. جيناققا «ەدىگە باتىر» ەپوسى، مۇرىن جىراۋ نۇسقاسىنداعى «قىرىمنىڭ قىرىق باتىرى» جانە «قاراساي-قازي» داستانى (قايروللا يمانعاليەۆ نۇسقاسى)، جانە باسقا دا ەل اراسىندا كەڭىنەن جىرلانىپ جۇرگەن كولەمدى داستاندار ەنگەن. جالپى سانى 40-تان استام جىرشىدان 60 ساعاتتىق جىر جازىپ الىنعان.

«ەلباسىمىزدىڭ «رۋحاني جاڭعىرۋ» باعدارلاماسى اياسىندا جارىق كورىپ وتىرعان «ەر ەدىگە» — نوعايلى ءداۋىرىنىڭ جىرى» مۋزىكالىق البومىنىڭ جارىق كورۋى – ۇلتتىق مۋزىكا تاريحىنداعى ەلەۋلى وقيعا دەسەك، قاتەلەسپەيمىز. ەدىگە باتىردىڭ ءومىرى مەن ەرلىك جولدارى قازاققا عانا ەمەس، ءيسى تۇركى حالىقتارىنا ورتاق مۇرا. وسى رەتتە اتاقتى ەپيك جىراۋ مۇرىن سەڭگىرباي ۇلىنىڭ ورىنداۋىنداعى «قىرىمنىڭ قىرىق باتىرى»، اقىن نۇرپەيىس بايعانيننىڭ جىرلارىنىڭ وسى جيناققا ەنۋى جوبانىڭ قۇنىن ارتا تۇسىرگەنى انىق. «ەر ەدىگە» — نوعايلى ءداۋىرىنىڭ جىرى» مۋزىكالىق جيناعى بۇگىنگى جانە بولاشاق ۇرپاقتى جاڭا ىزدەنىسكە باستاپ، الداعى ۋاقىتتا دا ءوز جالعاسىن تابارىنا سەنىم بىلدىرەمىن. وسى ورايدا اتالمىش شارانى ىسكە اسىرىپ، قولداۋ كورسەتكەنى ءۇشىن اقتوبە وبلىسىنىڭ اكىمى وڭداسىن سەيىل ۇلىنا مادەنيەت جانە سپورت مينيسترلىگى اتىنان ەرەكشە العىس ايتقىم كەلەدى»، دەدى مادەنيەت جانە سپورت ۆيتسە-ءمينيسترى نۇرعيسا داۋەشەۆ.

مۋزىكالىق داستان ەكى بولىكتەن تۇرادى، ءبىرىنشى كىتاپتا «قىرىمنىڭ قىرىق باتىرى» جانە ەدىگە باتىر تۋرالى تاريحي جىردى جەتكىزگەن جىراۋلاردىڭ ءومىربايانى قازاق، ورىس جانە اعىلشىن تىلدەرىندە بەرىلسە، ەكىنشى كىتاپتا جىر جازىلعان 10 ديسك ورنالاسقان.

«مۋزىكالىق البومنىڭ باسى-قاسىندا قازاقستاننىڭ جەتەكشى عالىمدارى، تاريحشىلار، بەلگىلى ولكەتانۋشىلار، ەتنوگراف، مۋزىكا زەرتتەۋشىلەرى قاتىسىپ، ءوز ۇلەستەرىن قوستى. جالپى يدەيا اۆتورى – وبلىس اكىمى وڭداسىن ورازالين، جوبانىڭ جەتەكشىسى – اتاقتى جىراۋ، قازاق ۇلتتىق ونەر ۋنيۆەرسيتەتىنىڭ پروفەسسورى الماسبەك الماتوۆ، جوبانىڭ عىلىمي جەتەكشىسى – س.بايىشەۆ ۋنيۆەرسيتەتىنىڭ پروفەسسورى، ەدىگەتانۋشى جۇمانازار اسان، ولكەتانۋشى بەكارىستان مىرزاباي، مۋزىكالىق رەداكتورى – قازاقكونتسەرت ءسوليسى كۇنسۇلۋ تۇرىكپەن، دىبىس رەجيسسەرى – داستان پالمانوۆ، مۋزىكالىق شىعارمالاردى وڭدەگەن – كومپوزيتور امانگەلدى ءساندىباي، البومدى باسىپ شىعارعان – «قازاق كىتاپتارى» جشس ديرەكتورى ورىنبەك انەسوۆ جانە ۇلتتىق ناقىشتا بەزەندىرۋشى – سۋرەتشى ايبەك ورىنباساروۆ»، دەپ ءتۇسىندىردى مەيرامبەك شەرماعانبەت.

مۋزىكالىق البوم 500 دانامەن جارىققا شىقتى جانە كىتاپحانالارعا تاراتىلادى.

سوڭعى جاڭالىقتار

«بارىس» ۇتىلىپ قالدى

سپورت • 06 ناۋرىز، 2021

ەلدوس سمەتوۆ كۇمىس الدى

سپورت • 06 ناۋرىز، 2021

«قايرات» – قولا جۇلدەگەر

ايماقتار • 06 ناۋرىز، 2021

ءار سالا ۇزدىكتەرىنە قۇرمەت تانىتتى

ايماقتار • 05 ناۋرىز، 2021

باعدات مۋسين شىمكەنتكە باردى

ايماقتار • 05 ناۋرىز، 2021

ۇقساس جاڭالىقتار