مەديتسينا • 22 قاڭتار، 2021

باتىس قازاقستاندا ۆيرۋسقا قارسى ەكپە 180 مىڭنان اسا ادامعا ەگىلەدى

14 رەت كورسەتىلدى

باتىس قازاقستان وبلىسىندا كوروناۆيرۋسقا قارسى 180 مىڭنان استام ادامدى ەگۋ جوسپارلانىپ وتىر، دەپ حابارلايدى Egemen.kz

وبلىستىق سانيتارلىق-ەپيدەميالىق باقىلاۋ دەپارتامەنتى باسشىسىنىڭ ورىنباسارى نۇرلىبەك مۇستاەۆتىڭ ايتۋىنشا، وڭىردە جوسپارعا سايكەس دايىندىق جۇرگىزىلىپ جاتىر.

كوروناۆيرۋسقا قارسى ءبىرىنشى كەزەكتە جۇقپالى اۋرۋلار ستاتسيونارى، جەدەل جاردەم، سانيتارلىق-ەپيدەميالىق قىزمەت ماماندارى، پوليتسيا، ءبىلىم بەرۋ جانە مەديتسينا سالاسىنىڭ قىزمەتكەرلەرى ەگىلەدى.

نۇرلىبەك ەرمەك ۇلىنىڭ سوزىنە قاراعاندا، اقپان ايىندا رەسەي فەدەراتسياسىندا جاسالعان «سپۋتنيك V» ۆاكتسيناسىن ەگۋ باستالادى. ەكپە ەكى رەت جاسالادى. ياعني العاشقى رەت ەگىلگەن كەزدە ادامنىڭ كوروناۆيرۋسقا قارسى يممۋنيتەتى جارتىلاي، 21-ءىنشى كۇنى ەكىنشى رەت سالىنعاندا تولىق قالىپتاسادى.

سونىمەن قاتار قازاقستاندا «Kazcovid-in» ۆاكتسيناسى ءبىرىنشى جانە ەكىنشى كەزەڭدە سىناقتان ءوتتى. ءۇشىنشى كەزەڭنەن ءساتتى وتسە، ونى دا ەگۋ كوزدەلىپ وتىر.

«ەكپە ەرىكتى تۇردە جاسالادى. ەشكىمدى ماجبۇرلەمەيدى. ادام ەگىلەر الدىندا مەديتسينا قىزمەتكەرىنەن قانداي ۆاكتسينا ەكەنىن، ونىڭ قالاي اسەر ەتەتىنىن سۇراپ، تولىق ءبىلىپ الۋعا، سونداي-اق جاساتۋدان باس تارتۋعا قۇقىلى»، دەدى ن.مۇستاەۆ.

ەسكە سالا كەتەيىك، بۇدان بۇرىن بقو-دا جىل باسىنان بەرى مىڭعا جۋىق ادامنان كوروناۆيرۋس تابىلعانىن جازعان بولاتىنبىز.

سوڭعى جاڭالىقتار

ۇقساس جاڭالىقتار